Read Hadiyya 2 Saamu'eel Kitaaba 3 Bible Online

2 Saamu'eel Kitaaba 3 - Hadiyya bible

2 Saamu'eel Kitaaba 3

¹Ee'isinne Saa'ool abaroos lambe'ennee Daawiit abaroos lambe'ennee lobakat ammanina or hee'ukko. Ihukkaarem Daawiit wodukkuuyyi marukko; Saa'ool abaroosim hoogukkuuyyi marukko.

²Daawiit Keebiroonanne hee'u ammane loh goo'n ooso qarukko. Ixxuwwim Yizra'ee'l Ahino'aameensi qaramu won beet Aminoonatte,

³la'mmek Qarmeeloos Naabaalina arette hee'llo'i Abigeeleensi qaramu Kiili'aabatte; saxxek Taalmaayaa yakkam Gashuu'l adi'l landichchotte hee'llo'i Ma'ikkaansi qaramu Abeseloomatte;

⁴soo'llek Hagiitaansi qaramu Adooniyaasatte, ontik Abiixaaleensi qarumu Shafaaxiyatte;

⁵lohik Egilaansi qaramu Yutiri'aamatte. Kukeen hundim qaranto'ok Keebiroonannette.

⁶Saa'ool abaroos lambe'ennee Daawiit abaroos lambe'ennee or edukkuuyyi marukko; ee'isam Abaneer Saa'ool abaroos lambe'enne wodukkuuyyi marukko.

⁷Ayya'i landichcho Riisifa Saa'oolina bakki meentichchotte hee'llo'o; Iyyaabustem Abaneerina «Iyyanni bakki meentichchonne mahina iinse'llitto?» yaa xa'mmukko.

⁸Abaneerim ee woshshanne lobakata quuqaa «An Saa'oola lagaa Ayihuxxi mannina awwaadummoka labissaatennihe? An kiyyannina, ixxi abbaayyuwwinaa ixxi qarmanninaa amma'nnamaammoohane. Keesem Daawiitina higisaa uwwummoyyo. Eehannah at eese ka meentichchi woshshanne acceeqassoohonnihe?

⁹Adillano Saa'ooliinsii ixxi shumo'iinsii hooraa Daawiitina uwwaa Daawiit adillanom Isra'eelannee Yihudannee Daaniinsi ki'isaa Beersaabe'i afeebe'e iimiimaa'eena

¹⁰Waa'i Daawiitina hide'aa uwwu neeyyaxxisnnea ani ihoo'isa issumbeelas Waa'i eesenne oogatona!» yukko.

¹¹Iyyaabustem lobakata baddaa hee'u bikkina Abaneerina matem sagaram dabarukkoyyo.

¹²Abaneerim ee ammanenne Keebiroonanne hee'oo Daawiit beyyo manna asse'aa «Ka uullina gassaanchi ihookkok ayyette? Ee bikkina kaba at iinninne iittame. Anim Isra'ee'l minaadab hundoomim kiina ijaajantamisa issaa hara'mmoommo» yukko.

¹³Daawiitim «Erane, kiinninne ka woshshanne iittamoommo. Ihukkaarem at iina gaassitaa issitoo luwwi yookko. Oohim at i beyyo waattoo ammane Saa'ool landichcho Meelkoole iina amaddaa waattibeelas i beyyo waattoobee'isa!» yaa dabarukko.

¹⁴Ee'isam Daawiit Saa'ool beet Iyyaabusti beyyo manna asse'aa «I meentichcho Meelkoole iina dabare; an isena mat xibbi Filisxee'm mannikka uraaga qootaammoohane» yukko.

¹⁵Ee bikkina Iyyaabusti manna asse'aa Meelkoole Laawiish beet hee'u is manchi Phaalxi'eeliinsi hooraa massukko.

¹⁶Phaalxi'eelim Baahuurim beero'i afeebe'e wi'llukkuuyyi ise awwonukko. Ihukkaarem Abaneer «Kaba ihookko ki mine daba'lle!» yukkaare uraa daba'llukko.

¹⁷Abaneer Isra'ee'l awwonsaa'n beyyo maraa «Daawiit ki'nnuwwina adil ihoo'isina lobakat ammane hassakka'a hee'llakko'o.

¹⁸Oono'o, kaba issehe. Odim Waa'i ‹I awwaadaanchi Daawiitinne i minaadab Isra'eela, Filisxee'm manniinsii mulli ixxuwwi diina'i hundiinsimii gatisoommo› yaa hee'ukkisa sawwi'llehe» yukko.

¹⁹Abaneer Biiniyaam sullina eekka kurukko. Ee lasage Biiniyaam minaadabii Isra'ee'l minaadabii issiteena iittanto'i luwwa Daawiitina kureena Keebiroona marukko.

²⁰Abaneerim lamiyyi manna awwonsaa Daawiit yoo beyyo Keebiroona waarukko. Daawiitim ee mannina maadda issukko.

²¹Abaneerim Daawiitina «I moollanna, kaba an maraa Isra'ee'l minaadab hundim keese awwontamisa issoommo. Ki adillanom hundim amma'nnita'a aa'llamo. Atim ki tiironne sawwittisam ka ulla hundam gassitootto» yukko. Daawiitim Abaneera xumminnem geegeesukko.

²²Hofqax ammaniinsi lasage Daawiit gaadaanii Yoo'aabii lobakat qeefajjo'o amadda'a gaadiinsi daba'llito'o. Ihukkaarem Daawiit xumminem geegeesaa hee'u bikkina ee ammane Abaneer Keebiroonanne hee'ukkoyyo.

²³Yoo'aabii ixxenne maqire hee'llo'i gaadaanii ee beyyo affo'isam Neer beet Abaneer adi'l beyyo waarukkisa, adil geegeesukkisaa ixxim xummam elle'ukkisaa Yoo'aab macceesukko.

²⁴Ee bikkina Yoo'aab adi'l beyyo hincaa «Ku baxxi bax maruwwa? Abaneer ki beyyo waarukkaare xumminne geegeessitok mahinatte?

²⁵Ixxi ka beyyo waarukkok keese qawwiseenaa maha baxxooda'ee hinkid yoontida'ee daadeeseenatte; atim ka woshsha erisa laqqootto!» yukko.

²⁶Yoo'aab Daawiit illagiinsi firaa maraa lasonne Abaneera ixxi beyyo eebakkamisina manna asse'ukko. Oo mannim ixxo Siira'i wo'i ba'l gadaniinsi dabatta'a wotto'o. Ihukkaarem Daawiit ee woshshi bikkina la'oo luwwi mahim hee'ukkoyyo.

²⁷Abaneer Keebiroona afu ammanenne Yoo'aab moqqo'onne atoorassoohaannisa issaa qashi gooc kolli shiqqaa'aa massukko. Ee beyyonnem godabo qasaa shukko. Yoo'aab eekka issu mashka'i Abaneer illageen ixxi abbaayyi Asa'eela shu bikkina baado fireena hasaatette.

²⁸Daawiitim Abaneera shakko'isa macceesu ammanenne «Anii i adilla'n gassi woronne yo'i minaadabii Abaneera shakko'i xiigiinsi muccur inkummisa Waa'i la'ookko.

²⁹Ee bikkina eehanni guzumo'i Yoo'aabannee ixxi abaroosannee dillona! Doolli hundannem ixxi abaroosiinsi sha'ixxek te'im oddomachchi jabbi yoo manchi bee'oone! Ee'isam dim, oranne lehookkok te'im sibaaraanchi bee'oone!» yukko.

³⁰Yoo'aabii ixxi abbaayyi Abiisii Abaneer ixxuwwi abbaayyi hee'u Asa'eela Gaba'oonanne hee'u oranne shu bikkina Abaneera shito'o.

³¹Ee lasage Daawiit kichchechchinne ixxuwwi eddechcha dereetta'a xiddi eddechcha edde'lla'a Abaneerina wi'llitamisina Yoo'aabaa ixxi awwonaanoo ijaajukko. Ixxo waammakkam ballannem adil Daawiit ixxi gagoomim leesha awwonaa marukko.

³²Abaneerim Keebiroonanne Waammamukko. Ixxi waammannem adil sagara iimaa'aa wi'llukko. Minaadab hundim ixxo moo'imminne qaraaraallisa wi'llukko.

³³Daawiitim Abaneerina «Abaneer mahina kora'i manchisa lehukko?

³⁴Ki angi karamukkoyyo; ki lokkim kuttubbamukkoyyo; at damigaa'n anganne lehoo manchisa letitto!» yaa sorukkuuyyi wi'llukko. Minaadab hundim ixxi bikkina odim wi'llukko.

³⁵Manni hundim Daawiit hurbaata itoo'isa isseena ee ayyaamo hundoomam yakukko. Ihukkaarem ixxi «Kaballi eelliinchi aagoo'n an hurbaata duuqummaare Waa'i eese guzumo'ona!» yaa hide'ukko.

³⁶Minaadabim eekka moo'aa liiramukko; hanqo'isam adil issu luwwi minaadaba liiransukko.

³⁷Yihuxxi sullii Isra'ee'l minaadabii hundim Abaneer lehonne adil Daawiit maham exxubee'isa qoossukko.

³⁸Adilim ixxi gassaan ikko'i Daannuwwina «Kaballa Isra'ee'llek mat la'amaakkoo geed lehukkisa qoossitakka'ahinnihe?

³⁹An Waa'i doo'llaakkoo adil ihummaarem kaballa hoogaanchi ihaammo; ku Xaaruyyi oos eese kaa'llo'ookko; ka xiiga dunto'i bikkina Waa'i ixxi gagoomim laboo guzumo'o uwwona» yukko.