Read Hadiyya 2 Saamu'eel Kitaaba 4 Bible Online

2 Saamu'eel Kitaaba 4 - Hadiyya bible

2 Saamu'eel Kitaaba 4

¹Saa'ool beet Iyyaabuste Keebiroonanne Abaneera shakko'isa macceesaa lobakata baddukko. Isra'ee'l minaadabim lobakata baa'ukko.

²Iyyaabustina gaadaano awwonsitam lam gaaxxi awwonsaan hee'llo'o. Ixxuwwim Biiniyaam sulliinsette ikka'a Ba'erootanne qaranto'oo Riimoon oos Ba'aanattee Reekaabattee hee'llo'o. Ba'eeroot Biiniyaam uulliinsi matisa xigamookko.

³Ba'eerootanne illageen hee'llo'i manni gibba'a Giitaayimanne kaballi afeebe'em yo'o.

⁴Saa'ool beet Yoonaataanina Mafiiboosheeta yakkam lokko shiihaakkoo beet hee'ukko. Ixxim Saa'oolaa Yoonaataanaa shakko'i ammane onti hiinchi beet hee'ukko. Ixxuwwa shakko'isa Yizra'ee'l beero'i manniinsi macceesso'i ammanenne li'issam meentichcho ixxo amadda'a gibbo'o. Ixxi shiihukkok ise gaaggaabba'a gibbam hee'llo'i bikkina is angiinsi ubaatette hee'ukko.

⁵Riim oos Reekaabii Ba'aanii Iyyaabusti mine matta'a samgud ballanne affo'o. Ee ammane ixxi balli usheexxatina laphaa hee'ukko.

⁶Ixxo egeraanchi meentichchom goocanne afuutta'a arasa ufeessu'uuyyim gissam hee'llo'o. Ee bikkina Reekaabii Ba'aanii shullita'a aaggo'o.

⁷Ixxuwwim aagga'a Iyyaabusti iinse'u beyyonnem qassa'a shito'o. Ixxi horoorem mutta'a massitto'o. Ee hiimo hundoomam taakke'lla'a Araba'i googinne higga'a matto'o.

⁸Iyyaabuuste'i horoorem Keebiroonanne hee'u adil Daawiitina hincaa'lla'a lasonne «Keese sheena hasam hee'u ki diinakkichchi Saa'ool beet Iyyaabustik horoor kuno'o! Adila, kaballa Saa'ooliinsii ixxi shumo'iinsii ki baado Waa'i miqisaakko» yito'o.

⁹Daawiitim Reekaabinaa ixxi abbaayyi Ba'aaninaa «Hawwi hundiinsim eese gatisu hee'oo Waa'i summinne hide'oommo!

¹⁰Xiqlaaganne i beyyo waaraa Saa'ool lehukkisa kuru manchi er woshsha kurukkoka labisaa hee'ukko. Ihukkaarem ixxo amadaa shisiisummo. Er woshsha yaa i beyyo waaru manchina an miqummok eehane.

¹¹Eehannah ixxi gaqqi minenne iinse'aa hee'u muccur mancho shito'i mannina miqamoo baad hinkaa'nna kee'mmaalla? Ixxo shitakko'i bikkina an ki'nnuwwa shaa uulliinsi bi'isaa xiiga miqisoommo» yaa dabarukko.

¹²Ee ammanem Daawiit ixxuwwa shitona ixxi gaadaano ijaajukko; ixxi gaadaanim Reekaabaa Ba'aanaa shito'o. Ixxuwwi angaa lokkom mutta'a Keebiroonanne yoo wo'i delbi gadanonne haqqanne saqalto'o. Iyyaabusti horoorem massita'a Keebiroonanne yoo Abaneer waammanne Waa'mmito'o.