Read Hadiyya 2 Saamu'eel Kitaaba 8 Bible Online

2 Saamu'eel Kitaaba 8 - Hadiyya bible

2 Saamu'eel Kitaaba 8

¹Hofqax ammaniinsi lasage adil Daawiit Filisxee'm minaadaba kaa'ukko. «Meeteeg Amaa» yakkam beero'om ixxuwwiinsi hooraa ixxi gulummi issukko.

²Odim adil Daawiit Moo'aaphphi minaadaba kaa'ukko. Qeefadanto'i ee uulli mannam uullanne laphitamisa issaa sas sasiinsi lam lamooma shaa mat matooma gatisukko. Ee bikkina Moo'aaphphi manni ixxena ijaajanta'a gibittam hee'llo'o.

³Ee lasage Daawiit Sooriy gassi woronne yoo Xoobi'i adil hee'u Rahoob beet Hadaadi'eezera kaa'ukko; Hadaadi'eezeera kaa'u ammane Efiraaxiis daajjiinsi hanaa'n kollinne hee'oo uulla dabareena marukkuuyyatte hee'ukko.

⁴Daawiitim Hadaadi'eezerika mat kumaa lamar xibbi faradaanoo lamiyyi kum lokkaanoo qeefadukko. Gaare'e gosaassam mat xibbi farado gatisaa mulli qaxika mogole'i nigga muraa awwaad bee'i keen issukko.

⁵Damaasqo'onne hee'llam Sooriy mannim adil Hadaadi'eezerina hara'mmiteena gogota asse'llo'aare Daawiit lamiyyee lam kum gogotaa shukko.

⁶Ee lasage ixxuwwi gassi woronne gaadaan wiiddantam beyyuwwa gudisukko. Sooriy mannim ixxena ijaajanta'a gibitto'o. Waa'im Daawiitina maru beyyi hundannem kaachcha uwwukko.

⁷Daawiit Hadaadi'eezer gaaxxi awwonsaa'nneka worqinne baxamaakkoo agilluwwa qeefadaa Yerusaaleema massukko.

⁸Ee'isam Hadaadi'eezer gassi woronne hee'oo Beexaahaa Beerootaayyaa yakkam beero'uwwiinsi lobakat naas xaara massukko.

⁹Haamaaxxi adil Too'i'i Daawiit Hadaadi'eezer gogota hundam kaa'ukkisa macceesukko.

¹⁰Daawiit Hadaadi'eezera kaa'u bikkina xummaatoo liirammatoo hincaa'oo'isina Too'i ixxi beet Yooraama Daawiit beyyo asse'ukko. Eehanniinsi illageen Too'i'i Hadaadi'eezerinne oramam hee'ukko. Yooraamim biriinsi, worqiinsii naas xaariinsii baxamaakkoo annanni annanni irifo'o Daawiitina amadaa waarukko.

¹¹Adil Daawiit kaa'u Eedoo'mmaanniinsi, Moo'aaphphaanniinsi, Amoo'nnaanniinsi, Filisxee'mmaanniinsi, Amaaleeq uulliinsii Hadaadi'eezeriinsii qeefadaa massu biraa worqaa Yooraam eebu luwwinnem edaa Waa'ina keesukko.

¹³Daawiit Sooqixxi Cebba yakkam beyyonne tommoo sadeenti kum Eedoo'm mannaa shaa daba'llu ammanenne ixxek sad la'amukko.

¹⁴Eedoo'm uullanne hundoomannem lobakat wiidda'n beyyuwwa gaadaanina gudisukko. Ee beyyuwwanne hee'llam Eedoo'm minaadabim hundim ixxena ijaajanto'o. Waa'i Daawiitina maru beyyonne hundannem kaachcha uwwukko.

¹⁵Isra'ee'l minaadab hundim hanqo'i oogato siiddamisa issukkuuyyi Daawiit adil ihaa gassukko.

¹⁶Xaruy beet Yoo'aab gogotina awwonsaanchi hee'ukko; Ahiluud beet Yoosaafix aganna kitaaboohan hee'ukko.

¹⁷Ahiixoob beet Saadooqii Abiyaataar beet Abemeeleekii qeessuwwi hee'llo'o. Saraayyim ee'isam adi'l minina kitaabaanchi hee'ukko.

¹⁸Yoodaah beet Baanaay Daawiitika lombi waardiyya ijaajaanchi hee'ukko; Daawiit oosim adilla'n mi'n sogaan hee'llo'o.