Read Hadiyya 2 Saamu'eel Kitaaba 9 Bible Online

2 Saamu'eel Kitaaba 9 - Hadiyya bible

2 Saamu'eel Kitaaba 9

¹Mat ayyaamo Daawiit «Saa'ool miniinsi lehiinsi gatu manchi yoohonnihe? Ayyi la'ukko yoolas Yoonaataan bikkinaa yaa eroomma issoommo» yukko.

²Saa'ool mi'n awwaadaaniinsi Siibaa yakkam mat awwaadaanchi hee'ukko. Ixxim Daawiit beyyo waarona weeshakko'o. Daawiitim «At Siiba'attennihe?» yaa xa'mmukko. Siiba'am «Moollanna! Eeyya, an ki awwaadaanchi Siiba'atte» yaa dabarukko.

³Adilim «Waa'ina sagara aagumsinnem eroomma issoommisina Saa'ool abaroosiinsi lehiinsi gatu manchi yoohonnihe?» yaa Siiba'a xa'mmukko. Siiba'am «Yoonaataan goo'n oosiinsi mat kabadem foorinne yookko; ixxim lokko shiihaa» yaa dabarukko.

⁴Adilim «Hannonnette yookkok?» yaa xa'mmukko. Siiba'am «Loodaabaaranne Ami'eel beet Maakiir minenne yookko» yaa dabarukko.

⁵Ee bikkina adil Daawiit Mafiiboosheeta Lodabaaranne yoo Ami'eel beet Maakiir miniinsi wossiisukko.

⁶Saa'ool beetina beet Yoonaataan beet Mafiiboosheet waaru ammane Daawiit illagenne uullanne heeshaa ixxena lomba uwwukko. Daawiitim «Mafiiboosheeta!» yaa weeshukko. Mafiiboosheetim «I Moollanna! An ki awwaadaancho!» yaa dabarukko.

⁷Daawiitim «Baddititte! Kiyyanni Yoonaataan bikkina eroomma issoommo. Ki lobanni Saa'ool amaxxi hee'u uulla hundam kiina dabaroommo; hundi ammanem iinninne hurbaata ittootto» yukko.

⁸Mafiiboosheetim odim uullanne heeshaa anga ki'isaa «I moollanna! An lehu wishichciinsi e'lloombee'ane; eehannah iina kaa'n eroomma issitoottok mahinatte?» yukko.

⁹Ee lasage adil, Saa'oolina awwaadaanchi hee'u Siiba'a weeshaa «Saa'oolanee ixxi abaroosanee hee'u amaxxa hundam mat luwwim gatoo'n ki moollanni beet, beet ihu Mafiiboosheetina uwwaammo.

¹⁰At, ki goo'n oosii ki awwaadaanii ki moollanni beet beet itoo luwwa siidona uulla abuullitakka'a hurbaaxxi atoota Mafiiboosheetina aagissehe; ihukkaarem ki moollannina beet beet Mafiiboosheet amman hundam iinninne itookko» yukko. Siiba'anam tommii onti goo'n oosii lamiyyi awwaadaanii hee'ukko.

¹¹Siiba'am «Adila! An at ijaajji luwwi hundam issoommo» yaa dabarukko. Ee'isinne Mafiiboosheet adi'l oosiinsi matisa ihaa adi'l maaddiinsi itam hee'ukko.

¹²Mafiiboosheetina Miikaa yakkam woraadichchi beet hee'ukko. Siiba'i abaroos hundim Mafiiboosheetina awwaadaan ikko'o.

¹³Ee bikkina lamem lokkim shiih ihu Mafiiboosheet adi'l maaddiinsi itukkuuyyi Yerusaaleemanne hee'ukko.