Read Hadiyya 1Adlilluwwi kitaaba 11 Bible Online

1Adlilluwwi kitaaba 11 - Hadiyya bible

1Adlilluwwi kitaaba 11

¹Adil Salamoon Gibxi adil landichchoonsi higaa lobakat mulli minaadab uulli meento eebukko. Oo meentim Hiite'ane, Moo'aaphphane, Amoo'nnane, Eedoo'mmanee siidoo'n meentoo hee'llo'o.

²Waa'i Isra'ee'l oosina «Ki'nnuwwi tiiro agga'a ixxuwwi waa'anne awwontakkamisa issitam bikkina hanqo'i Waa'a laqqambee'i minaadabinne maqire eebaqantakkotte» yaa qoxxisaa hee'ukko. Salamoon iittaa hee'u meenti Waa'i eebaqqantambee'isa hooru minaadaphphi lambe'iinsette. Ihukkaarem Salamoon ixxuwwi iittinne qaashamukko.

³Ixxenam adilluwwi landi ikko'i lamar xibbi meentii sas xibbi bakki meentii hee'llo'o. Oo meentim Salamoona Waa'iinsi qee'lloo'isa issito'o.

⁴Hore'oomam Salamoon lomma'nnukkuuyyi maru ammanenne mulli waa'uwwanne otossoo'isa issito'o. Salamoon ixxi anni Daawiit amma'nnamaa Moollanni Waa'ina awwaadukkisa amma'nnamaa hee'ukkoyyo.

⁵Ixxim Siidoo'n manni meentichchi waa'i hee'u Astaarootannee Moolooka yakkam shigigaa'oo Amoo'n manni waa'annee otossukko.

⁶Salamoonim Waa'i illagenne jor baxo baxukko. Ixxim ixxi anni Daawiitisa Waa'a xabbeenoominne awwonukkoyyo.

⁷Yerusaaleemiinsi eelliinchi firinne yoo duunanne shigigaa'oo Kaamoosh yakkam Moo'aaphphi manni waa'inaa Mooloka yakkam Amoo'n manni waa'inaa otossakkam beyyuwwa gudisukko.

⁸Ee'isam mulli uulliinsi eebu meenti hundinam qophpha'n waa'uwwina aduruusa wiriissitam beyyoo kitima hincaa'llam beyyoo baxukko.

⁹Isra'ee'l Moollanni Waa'i lam ammane ixxena moo'amaa mulli qophpha'n waa'uwwanne otossoobee'isina ijaajukkan ihukkaarem Salamoon Waa'ina ijaajamukkoyyo; hore'oomam ixxi wodano Waa'iinsi qeessukko. Ee bikkina Waa'i Salamoonanne quuqukko.

¹¹Waa'i Salamoonina «At iinninne maqire aaggitti hidi'l sagara ginditti bikkinaa i ijaajom egettitbee'i bikkinaa ki adillano kiinniinsi hooraa ki awwaadaaniinsi matina uwweena murte'aammo.

¹²Ihukkaarem kiyyanni Daawiit bikkina yaa ki adilla'n doollenne eekka issoommoyyo. Oo woshshim ki beet adilla'n doollenne ihookko.

¹³Ihukkaarem kiyyanni Daawiit bikkinaa i gagina annanni issaa doo'llummi Yerusaalee'm beero'i bikkinaa yummuuyyi mat sullo ki beetina uwwoommo bagaan adillano hundoomam hooroommoyyo» yukko.

¹⁴Waa'i Eedoo'm adilluwwi Shumo'iinsi ihu Haadaada Salamoonanne diinakkichchi issaa ki'isukko.

¹⁵Daawiit Eedoo'm uulli manninne oramam hee'u ammane gaaxxi awwonsaanchi hee'u Yoo'aab oranne leto'i keeno waammeena maraa hee'u ammane ixxii ixxenne maqire hee'llo'i mannii Eedoomanne hee'u goona shita'a guulliteebe'e loh agana massukko.

¹⁷Hadaad ciilichchi hee'ukkuuyyi Hadaadii ixxi an awwaadaan hee'llo'i hofqax Eedoo'm mannii gibba'a Gibxi uulla matto'o.

¹⁸Ixxuwwim Miidiyaamiinsi ki'lla'a Faaraana matto'o. Ee beyyonnem hofqax mannim ixxuwwanne exxito'o. Ee lasage Gibxi uulla matta'a adil Faari'oon beyyo hincito'o. Adilim Hadaadina hofqax uulla, mat minee hurbaataa uwwukko.

¹⁹Hadaadim adilina iitti manchi ihukko. Ee bikkina adil ixxi meentichchotti hee'llo'i Xaafinees aayya Hadaadina ladiisukko.

²⁰Isem Ganubaata yakkam goonchi beeto ixxena qatto'o. Ee ciilam Xaafineese massita'a adilla'n minenne li'isso'o. Ganubaatim adi'l goo'n oosinne maqirem li'ukko.

²¹Hadaad Gibxi uullanne hee'ukkuuyyi Adil Daawiitikaa ixxi gogoxxi awwonsaanchi Yoo'aabikaa leho macceessu ammanenne «I uulla daba'llaa marona eese geegeese» yaa adila xa'mmukko.

²²Faari'oonim «Mahina mattoohane? Ki uulla matteena sawwittok kiina mah hoffe'aate?» yukko. Hadaadim «Iina mahim hoffe'ukkoyyo. Ihukkaarem i uulla maroommisa isse» yaa adilina dabarukko.

²³Odim Waa'i Raazoona yakkam Eeli'aad beeto Salamoonanne diinakkichchi issaa ki'isukko. Raazoon Xooba'i uulli adil hee'u ixxi moollanni Hadaadi'eezeriinsi gibaa

²⁴faanno'uwwina awwonsaanchi ihaa hee'ukko. Mashka'oomim Daawiit Hadaadi'eezera kaa'aa ixxenne oranne besh hee'llo'i Sooriy manna guullaa lasonnette hee'ukko. Raazoonii ixxi awwonaanii Damasiqo'o matto'o. Ee beyyonne hee'llu'uuyyim ixxo Sooriy uulli adil issito'o.

²⁵Salamoon doollenne hundannem Haadaad afisu hawwiinsi mullek odim Raazoon Isra'ee'l minaadabina diinakkichchi ihukko. Ee bikkina Raazoon Sooriyina adil ihaa Isra'eelannem diina'oomano qoxxisukko.

²⁶Salamoonanne bangujjaatinne ki'u mulli manchi odim Efiree'm uullanne Xaareeda yakkam beyyonne qaramu Naabaax beet Yoorbi'aamatte. Ixxim Salamoonina awwaadoo keeniinsi mat hee'ukko. Ixxi amam aro'i lehaakkoo Xiru'aa yakkam meentichchotte hee'llo'o.

²⁷Yoorbi'aam bangujjaatinne ki'u mashka'i ka'isa. Ee ammane Salamoon Yerusaaleemiinsi eelliinchi firinne yoo Miilo yakkam cebbi beyyo wonshimminne shiraashirukkuuyyii Daawiit beero'i ootam qoxxisukkuuyyii hee'ukko.

²⁸Yoorbi'aamim shiqqeen bax lachchi yoo qoxxaalli woraadichchi hee'ukko. Salamoonim ixxi baxonne galaxxamaakkoo qoxxaalli manchi ihukkisa moo'u ammanenne Yooseef sulli gassinaa malaayyi baxo baxxam keenina ijaajaanchi issukko.

²⁹Mat balla Yoorbi'aam Yerusaaleemiinsi firaa marukkuuyyi haareechchi weyyakka edde'aakkoo See'lo'o yakkam beero'iinsi waaraakkoo hiraagaanchi Akiiy beero'iinsi tochchonne yoo googonne mullam marukkuuyyi edamukko.

³⁰Akiiyim edde'aa hee'u haareechchi weyyakka tommonnee lam beyyonnee muransukko.

³¹Yoorbi'aaminam «Ka muransummi weyyakkika tommi qaafunta ki gagina massaqqe. Mashka'oomim Isra'ee'l Moollanni Waa'i ‹Adillano Salamooniinsi hooraa tommi sullo kiina uwwoommo.

³²Iina awwaadaanchi Daawiit bikkinaa Isra'ee'l uulliinsi hundiinsim i gulummi issaa doo'llummi Yerusaalee'm beero'i bikkinaa yummuuyyi Salamoonina mat sullo gatisaammo.

³³Eekka issoommok Salamoon eese uraa mulli qophpha'n waa'uwwanne Astaaroota yakkam Siidoo'n manni waa'ina, Kaamoosha yakkam Moo'aaphphi manni waa'inaa Miilko yakkam Amoo'n manni waa'inaa otossu bikkinatte. Salamoon iina ijaajamukkoyyo. Ixxi anni Daawiit iina ijaajamam hee'ukkisa I Seeraa Ijaajoo egerimma sabaa hawwodaakko.

³⁴Ihukkaarem Salamooniinsi adillano hundam hooroommoyyo. Foorinne hee'ukkuuyyi adillaninne hee'oo'isa issoommo. Kaka issoommokim I seelluwwaa ijaajjuwwaa egeru an doo'llumm I awwaadaanchi Daawiit bikkinaa yaatette.

³⁵Ee bikkina adillano Salamoon beetiinsi hooraa kiina tommi sullo uwwoommo.

³⁶Ihukkaarem i summi weeshamoo'isina doo'llummi Yerusaalee'm beero'onne i awwaadaanchi Daawiitina i illagenne mat shumo'i hee'oo'isina ixxi beetina mat sullo uwwoommo.

³⁷Yoorbi'aama, an keese Isra'eelanne adil issoommo. At doo'llitti beyyonne hundannem adil ikkootto.

³⁸I awwaadaanchi Daawiit issukkisa an ijaajummi luwwi hundam wo'm wodaninne ijaajantitaare i seerannee ijaajonnee qoxxitaa hee'lliitaare, i illagennem xabbeen luwwa issittaare an hundi ammanem kiinninne ihoommo. Isra'eelannem adil issoommo. Daawiitina issummisam ki shumo'im kiinniinsi lasonne adil ihoo'isa issoommo.

³⁹Salamoon baaxii'l mashka'inne Daawiit shumo'o guzumo'oommo. Ihukkaarem heer heerina guzumo'oommoyyo› yoolla» yukko.

⁴⁰Ee bikkina Salamoon Yoorbi'aama sheena hasukko. Ihukkaarem Yoorbi'aam Gibxi uulli adil hee'u Shiishaaq beyyo gibaa xorukko. Ixxim Salamoon leheebe'e ee beyyonne afuurukko.

⁴¹Salamoon issu mulli luwwii baxu baxii ixxi qooroomii hundim Salamoon aganni kitaabanne kitaabamaakko.

⁴²Salamoon ixxi heechchi beyyo Yerusaaleemanne issaa Isra'eela hundam sor hiincho gassukko.

⁴³Ee lasage Salamoon lehukko. Ixxi anni Daawiit beero'onnem waammamukko. Ixxi beet Oroobi'aamim ixxi beyyonne adil ihukko.