Read Hadiyya 1Adlilluwwi kitaaba 12 Bible Online

1Adlilluwwi kitaaba 12 - Hadiyya bible

1Adlilluwwi kitaaba 12

¹Hanaa'n qaranne yo'i Isra'ee'l minaadab hundim Oroobi'aama adil issiteena Seekeemanne wixxita'a egetta'a hee'llo'o. Oroobi'aamim Seekeema marukko.

²Salamooniinsi gibaa Gibxi uulla maraa hee'u Naabaax beet Yoorbi'aam ka woshsha macceesaa waarukko.

³Ixxom Isra'ee'l uullanne hanaa'n qarinne hee'llam sulluwwi weeshisso'o; ixxuwwim Yoorbi'aaminne maqirem Oroobi'aam beyyo hincita'a

⁴«Kiyyanni Salamoon neesenne gassika kee'mmaalli gaanjaqqa iyyiisaa neese u'nnisaa hee'ukko. At kaba ka kee'mmaalli kiyyanni gassi gaanjaqqa sholliissaa neese hee'nnoommi heechchi ogora axissita'n neese kiina ijaajammoommo» yito'o.

⁵Oroobi'aamim «Kaba mallehe. Sas balliinsi lasonnem daba'llitakka'a waallehe» yukko. Ee bikkina minaadab daba'llaa marukko.

⁶Ee lasage adil Oroobi'aam «Ka minaadabina dabaroommisina iina uwwitakkam sogitan maha?» yaa ixxi anni Salamoonina gassaan hee'llo'i lommanna wixxaa'aa xa'mmukko.

⁷Oo lommannim «At kaba ka minaadabina ijaajantaa awwaaddita'nnii ixxuwwi xa'mmichchinam laboo dabachcha uwwitta'nnii ku minaadab amman hundam amma'nnanchinne awwaaddamo» yita'a dabatto'o.

⁸Ihukkaarem Oroobi'aam oo lommanni soggo'i sogitano uraa illageen ixxenne maqire li'lla'a kaba ixxo gassaan ikko'i woraaxxi beyyo maraa

⁹«An issimmi hasisoo luwwi bikkina iina mah sogitano uwwitakkamo? Ka kiyyanni neesenne kee'mmisu gaanjaqqa sholliise yita'a xa'mmito'i minaadabina maha dabaro?» yaa xa'mmukko.

¹⁰Ixxuwwim «At uwwitoo dabachchi ‹Iikki hoffi maxxaachchi iyyanni lamadiinsi loboka geejjookko.

¹¹Iyyanni ki'nnuwwanne kee'mmaalli gassi gaanjaqqa iyyiisaa hee'ukko. An odim oo gassi gaanjaqqi lobakata kee'mmoo'isa issoommo. Ookkoomim iyyanni halanginne ganam hee'ukko. Ihukkaarem an ginxaa yakkam daqquuchchisa qasoo halanginne ganummuuyyi u'nnisoommo› yihe» yita'a soggo'o.

¹²Oroobi'aam «Saxxi ayyaamina daba'llehe» yaa issu jinni ayyaamonne Yoorbi'aamii minaadabii hundim ixxi beyyo daba'llita'a waatto'o.

¹³Adil Oroobi'aamim lommanni soggo'i sogitano gennihona uraa minaadaba quuqisoo sagarinne wocimma asheerukko.

¹⁴Woraadduwwi soggo'isinne «Iyyanni ki'nnuwwanne kee'mmaalli gaanjaqqa iyyiisaa hee'ukko. An odim ku gassi gaanjaqqi gaassaanniinsi loboka kee'mmoo'isa issoommo. Iyyanni ki'nnuwwa halanginne ganam hee'ukko. Ihukkaarem an ki'nnuwwa ginxaa yakkam daqquuchchisa qasoo halanginne ganummuuyyi u'nnisoommo» yaa dabarukko.

¹⁵Ku woshshi ka'isa ihu mashka'i Seeloo yakkam beyiinsi waaru hiraagaanchi Akiiyanne ihaa Naabaax beet Yoorbi'aamina Waa'i wocukkok wo'mmoo'isinatte. Adil Oroobi'aam minaadaphphi sawwita aa'ubee'i mashka'i Waa'i ka dabassancha isseena qoodu bikkinatte.

¹⁶Isra'ee'l minaadab hundim adil Oroobi'aam ixxuwwi xa'mmito'i xa'mmichcha aa'imma sabukkisa moo'llo'i ammanenne adilina «Niina Daawiitinne mah sharad hee'aa Issayyi beetiinsidu maha siindoommo! Isra'ee'l minaadaba! Ki mine elle'e! Daawiita, ka lasage ki mine ege'lle!» yita'a dabatto'o. Ee bikkina Isra'ee'l minaadab min mine elle'llo'o.

¹⁷Ee bikkina Oroobi'aam xale'i Yihuxxi uullanne hee'llam minaadabina adil ihukko.

¹⁸Ee lasage adil Oroobi'aam malaayyi baxo baxxu'uuyyi hee'llam keenina awwonsaanchi hee'u Adooniiraama Isra'ee'l minaadaphphi beyyo marona asse'ukko. Ihukkaarem ixxo kininne aphphissa'a shito'o. Ee ammanenne Oroobi'aam qaqqisaa faraxxi gaarre'enne aagaa Yerusaalee'm kolli gibaa xorukko.

¹⁹Ee ammaniinsi ki'isaa hanaa'n qaranne yo'i minaadab Isra'eela yakkam summinne Daawiit shumo'i adilla'n gasso sabbo'o.

²⁰Isra'ee'l minaadabim Yoorbi'aam Gibxiinsi daba'llaa waarukkisa macceesso'i ammanenne ixxuwwi dummichcha aagoona manna asse'lla'a weeshissa'a Isra'ee'l minaadabina adil issito'o. Yihuxxi sulliinsi bagaan Daawiit shumo'o awwonukkok mullek hee'ukkoyyo.

²¹Oroobi'aam Yerusaaleema waaraa afu ammanenne Yihuxxi sulliinsii Biiniyaam suullinsii mat xibbee sadeentayyi kum gaadaanoo weeshaa wixxaa'ukko. Eehid issukkokim Isra'ee'l sulluwwa qasaa gassi uulla ixxi anganne dabareena qoodaa hee'u bikkinatte.

²²Ihukkaarem Waa'ik sagar hiraagaanchi Shamaa'iyyanne dillukko.

²³Yihuxxi adil Salamoon beet Oroobi'aamina, Yihuxxaanninaa Biiniyaam moollinaa ee'isam gatu minaadab hundinaa

²⁴«Waa'i ‹Ki'nnuwwina abbaayyuwwi ikko'i Isra'ee'l minaadaba qassakkotte; hundim annannichchi minem elle'llehe. Ku woshshi ihukkuuyyi yookkok i kollinnetti ihu bikkina qasantakkeena fittakkotte› yoolla» yukko. Ixxuwwim Waa'i sagara macceessa'a ijaajanta'a ixxuwwi mine daba'llita'a elle'llo'o.

²⁵Isra'ee'l adil Yoorbi'aam duunaam Efiree'm uullanne Sekkee'm beero'o girbisaa ee beyyonne hofqax ammaninam afuurukko. Odim ee beyyiinsi ki'aa Phanu'eel beero'o girbisaa baxukko.

²⁶Yoorbi'aamim ixxi sawwitenne «Ku woshshi hundim ka'isa ihaa hee'ukkuuyyim I minaadab Yerusaaleema matta'a Keesammi Minenne Waa'ina kitima hincaa'llaman ihulas Yihuxxi adil Oroobi'aamina amma'nnanto'oo keen ikka'a tiiro ixxi kollonne dabatta'a eese shitamo; ku adillanim Daawiit mine daba'llookko» yukko.

²⁸Adilim ka woshsha atooraraa lasonne lam labeennuwwi misila worqinne baxisaa Isra'ee'l minaadaba kanniinsi illageen issitakkamee'llakko'isa otossitakkeena Yerusaaleem afeebe'e marimmi gatookko; ki'nnuwwa Gibxi uulliinsi fissito'i waa'uwwi kuno'o kakeeno» yukko.

²⁹Ee lasage worqinne baxanto'i lamem labeennuwwi misilluwwam matoo Beeteelanne; la'mmekam Daananne uullisukko.

³⁰Oohim ixxuwwina baaxiil ihukko; minaadabim ee qophpha'n waa'ina otosseena Daan afeebe'e marukko.

³¹Yoorbi'aam odim duunnuwwanne otossakkam beyyuwwa baxaa Leewi'i sulli ikkobee'i moolliinsi ayyi manchom qeessichchi issaa doo'llukko.

³²Yoorbi'aam Yihudanne iham hee'u uguxxisam sadeenti agan aagu tommonnee onti ballannee qophpha'n waa'ina ugud ihoo'isa qoodukko. Worqinne baxisu misilluwwinam Beeteelanne hee'oo kiti'm beyyonne yoo labee'n misilina kitima hincaa'ukko. Ee Beeteelannem otossimmina baxisu beyyuwwanne awwaaddam qeessuwwa dissukko.

³³Ugud ihoo'isina ixxi gagim qoodu sadeenti agan aagu tommonnee onti ballannee Beeteela marukko. Ee beyyonnem Isra'ee'l oosina qoodaa hee'ukkisanne uguda lonseena kitima hincaa'akkam beyyonne kitimukko.