Read Hadiyya 1Adlilluwwi kitaaba 13 Bible Online

1Adlilluwwi kitaaba 13 - Hadiyya bible

1Adlilluwwi kitaaba 13

¹Yoorbi'aam aduruusa wiriisseena kiti'm beyyi gadanonne uullaakkoohaannonne Waa'i ijaajinne asse'amaakkoo mat hiraagaanchi Yihudiinsi waaraa eekke'e afukko.

²Oo hiraagaanchim Waa'i ixxo ijaajukkisanne ee kiti'm beyyo sabimminne «Kiti'm beyyoo! Kiti'm beyyoo! Waa'i ki bikkina ‹Oono'o! Daawiit moolliinsi Iyyoosiyaasa yakkam beet qaramookko. Ixxim ee duunanne baxamu mulli minaadaphphi kiti'm beyyi awwaadaan ikka'a kiina aduruusa wiriissitam qeessuwwa ki hanenne durookko. Ee manni miqem ki hanenne shokkiisookko.

³Ee balla Waa'i ku kiti'm beyyi quruxxe'aa iiqamaa ubookko. Ixxi hanenne yoo gii'l buchchim binnookko› yoo mare'e uwwookko.

⁴Adil Yoorbi'aam ka woshsha macceesu ammanenne ixxi anga ki'isaa «Amaddehe!» yaa ijaajukko. Ee hiraagaanchi kollonne biddiqaa'u angi ee ammanchom gogaa xa'u bikkina ee anga ixxi gaganne dabareena xanukkoyyo.

⁵Oo hiraagaanchim wocu hiraaqqi saga'llisannem Waa'i kuru mare'i wo'mmukko. Kitima hincaa'akkam mu'utim ee ammanem butbutaa iiqamaa ubukko; hanenne hee'u gii'l buchchim uullanne fincamukko.

⁶Adil Yoorbi'aamim «Hay! I angi fayye'oo'isina ki Moollanni Waa'a uunxe» yaa hiraagaancho uunxukko. Hiraagaanchim Waa'a uunxukko; adi'l angim ixxi gaganne daba'llukko. Gaassisam ihukko.

⁷Ee lasage adil ee hiraagaanchina Waare «Iinninne maqirem i mine mallona, hurbaata ite; i amaxxiinsi uwwoommo» yukko.

⁸Oo hiraagaanchim adilina «Ki amaxxika iina kollo uwwitta'nnim ki mine maroommoyyo; kiinninne maqirem itoommoyyoo agoommoyyoo.

⁹Mashka'oomim ee beyyonne hurbaata ittitte wo'om aggitte waattitti googinnem daba'llitaa ki mine mattitte yaa Waa'i eese ijaajaakko» yaa dabarukko.

¹⁰Ee bikkina oo hiraagaanchi Beeteela waaru googo uraa mulli googinne daba'llaa marukko.

¹¹Ee ammane Beeteelanne hee'oo mat hiraagaanchi lommanchi hee'ukko. Ixxek goo'n oos ixxi kolli hincita'a Yihuxxi uulliinsi waaru hiraagaanchi Beeteelanne issu luwwi bikkinaa adil Yoorbi'aamanne wocu saga'l bikkinaa kutto'o.

¹²Oo hiraagaanchi lommanchim «Ee beyyiinsi ki'aa hinka'i googinne marukkahe?» yaa xa'mmukko. Ixxuwwim Yihudiinsi waaru hiraagaanchi maru googo moo'isso'o.

¹³Ee lasage ixxi oosina «Hallichchonne koora issehe» yukko. Ixxi oosim hallichchonne koora issito'aare saa'llaa marukko.

¹⁴Oo Yihudiinsi waaru hiraagaanchi maru googinne laseesaa mat qilxo'i hafanne afuuraakkoohaannonne afukko. Lommanchim «Yihuxxi uullinsi waattitti hiraagaanchi atettennihe?» yaa xa'mmukko. Hiraagaanchim «Eeyya anette» yaa dabarukko.

¹⁵Oo lommanchim «Iinninne maqirem mine mallona; hurbaatam ite» yukko.

¹⁶Ihukkaarem Yihudiinsi Waaru hiraagaanchi «Kiinninne mareena te'im gudissitti maadda iteenaa ageenaa hore'em xanoommoyyo.

¹⁷Mashka'oomim hurbaataa wo'oo ma'lluwwam suumenne aagisoombee'isa, waarummi googinnem daba'llaa maroombee'isa Waa'i eese ijaajaakko» yaa dabarukko.

¹⁸Ee lasage Beeteeliinsi waaru hiraagaanchi lommanchi «Anim ki'isam hiraagaancho; Waa'i asse'amaanchi an keese massaa i minenne hurbaata itisoommisina kuraakko» yukko. Ihukkaarem oo hiraagaanchi lommanchi ee woshsha wocukkok qophphanaatette hee'ukko.

¹⁹Ee bikkina Yihudiinsi waaru hiraagaanchi ee hiraagaanchi lommanchinne maqirem mine maraa ixxenne maqirem hurbaata itukko; wo'om agukko.

²⁰Hurbaata itimmina afuuramaa hee'amukkisam Waa'i sagar ee hiraagaanchi lommanchi beyyo waarukko.

²¹Yihudiinsi waaru hiraagaanchina sagara haraassaa «Waa'i ‹Waa'i sagara lonsittoyyo; Ki Moollanni Waa'i ijaaju ijaajo egettittoyyo.

²²Daba'llitaa hurbaata ittitte wo'om aggitte yummi beyyonne hurbaata ittaa wo'o aggitti bikkina letootto. Ki leeshim kiyyanni uullanne yoo waammi beyyo afooyyo» yaa shaaqukko.

²³Hurbaata itta'a lasonne hiraagaanchi lommanchi googiinsi dabaraa eebu hiraagaanchina hallichchonne koora issukko.

²⁴Ixxim ee hallichchonne saa'llaa marukko; marukkuuyyim googonne hobbichchi siidaa shukko. Ixxi leeshim googonne ubukko. Hallichchii hobbichchii lamim leesh gadanonne uullita'a hee'llo'o.

²⁵Mat mat manni eeheen higgu'uuyyi hiraagaanchika ubu leeshaa gadanonne uullu hobbichchoo moo'llo'o. Ixxuwwim ee woshsha hiraagaanchi lommanchi hee'oo Beetee'l beero'onne waatta'a moo'llo'i woshsha wocco'o.

²⁶Oo hiraagaanchi lommanchi ee woshsha macceesaa ki'aa «Oo manchi Waa'i ijaajo egeroo'n gatu hiraagaanchi ihookko. Waa'i wocu saga'llisam hobbichcho asse'aa ixxo aphphisaa iiqaa shaakkoo› yimma» yukko.

²⁷Ee lasage ixxi oosina «Hallichchonne koora issehe» yukko. Ixxuwwim koora issito'o.

²⁸Ixxim ee hallichchonne Saa'llaa marukko. Maraa afoohaare kabad afeebe'em hallichchii hobbichchii ee hiraagaanchi leeshi gadanonne uullito'isam, leeshim googonne dufukkisam afukko. Oo hobbichchi ee hiraagaanchi leesha itukkoyyo; hallichchom hawwodukkoyyi hee'ukko.

²⁹Oo hiraagaanchi lommanchim ee leesha ki'isaa hallichchonne iyyiisukko. Wi'llakkamisinaa waammamoo'isinaa dabaraa Beeteela massukko.

³⁰Oo hiraagaanchi lommanchim ixxi qaqqi abaroos waammi beyyonne massaa waammukko; ixxuwwim «Kiyyabbichchoo, kiyyabbichchoo!» yitu'uuyyi wi'llito'o.

³¹Ee leesha waammaa lasonne oo hiraagaanchi lommanchi ixxi oosina «An lehoommi balla ka waammanne waammehe; i leesham eddakka'a ixxi leesh gadannonne waammehe.

³²Beeteelanne yoo kiti'm beyyonne, Samaare'i hoffi beero'uwwannee ee duunnuwwanne yo'i otossakkam beyyuwwannee Waa'iinsi uwwamu ijaaccisanne ku hiraagaanchi wocu woshshi hanqo'isam wo'mmookko» yukko.

³³Kuk hundim ihukkaarem Isra'ee'l adil Yoorbi'aam issam hee'u jor baaxiiliinsi daba'llukkoyyo; hore'oomam ixxi baxu kiti'm beyyuwwanne awwaaddam Leewi'i shumo'iinsi tochchonne yo'i moolliinsi qeessuwwa doo'llimma urubee'i bikkina qeessichchi iheena hasu mancho hundam qeessichchi issam hee'ukko.

³⁴Ku baaxiilim Yoorbi'aam abaroos adillan uboo'isinaa uulliinsi bi'oo'isinaa mashka'i ihukko.