Read Hadiyya 1Adlilluwwi kitaaba 15 Bible Online

1Adlilluwwi kitaaba 15 - Hadiyya bible

1Adlilluwwi kitaaba 15

¹Naabaax beet Yoorbi'aam adil ihu tommonnee sadeenti hiinchonnee Abiy Yihuxxi uullanne adil ihukko.

²Ixxi heechchi beyyom Yerusaaleemanne issaa sas hiincho gassukko. Ixxi amam Ma'ika yakkamotan ikka'a Abeseloomina landichchotte hee'llo'o.

³Abiyim ixxi lob anni Daawiitisa Waa'i illagenne muccurisinne amma'nnamaakkoo manchi ihaa hee'immi hasisukkuuyyi ixxi anni Oroobi'aam baxam hee'u baaxiilo ixxim baxam hee'ukko.

⁴Ihona bagaan ixxeensi lasage Yerusaaleemanne adil ihonaa Yerusaaleemam xumminne egeronaa ixxi Moollanni Waa'i Daawiit bikkinaa yaa Abiyina mat goonchi beeto uwwukko.

⁵Waa'i Daawiitina eekka issukkok ixxi Hiite'i uulli Ooriyonne baxu baaxiiliinsi bagaan Waa'a liiransoo luwwa issu bikkinattee ijaajom qoxxaa egeru bikkinattee.

⁶Abiy adilla'n doollenne hundannem Oroobi'aam lambe'ennee Yoorbi'aam lambe'ennee hee'u or uullukkoyyi hee'ukko.

⁷Abiy baxu mulli bax hundim Yihuxxi Adilluwwi Aganni Kitaabanne kitaabamaakko. Abiyii Yoorbi'aamii orantam hee'llo'o.

⁸Ee lasage Abiy lehukko; Daawiit beero'onnem waammamukko. Ixxi beyyonnem ixxi beet Asa'a adil ihukko.

⁹Yoorbi'aam Isra'eelanne adil ihu lamiyyi hiinchonne Asa'a Yihudanne adil ihukko.

¹⁰Ixxi heechchi beyyom Yerusaaleemanne issaa soree mat hiinchoo gassukko. Ixxi lob amam Maa'ika yakkamotan ikka'a Abeseloomina landichchotte hee'llo'o.

¹¹Asa'a ixxi lob anni Daawiitisam Waa'a liiransoo baxo baxukko.

¹²Adil Asa'a Waa'a laqqambee'i minaadab otossitam beyyuwwanne qophpha'n waa'i minenne saa'llam keeno hundam uulliinsi bi'isukko. Ixxi anno'i baxxo'i qophpha'n waa'uwwi hundam gindansaa uunjukko.

¹³Ixxi lob ama Maa'ika Asheeraa yakkam shigigaa'oo meentichchi qophpha'n waa'a baxxo'i bikkina ise adillaniinsi dilliisukko. Ee baxxo'i qophpha'n waa'am iiqansaa Qeediroo'n cebbanne shokkiisukko.

¹⁴Asa'a duunnuwwanne hee'u hanqo'i Waa'a laqqambee'i minaadab otossitam beyyuwwa hundam bi'isubee'aarem ixxi hee'u doollenne hundannem Waa'ina amma'nnamaakkoohan hee'ukko.

¹⁵Ixxi anni Waa'ina keesamaakkoohan issu keenoo ixxi gagim worqinnee birinnee baxisaa xale'i Keesammi Mi'n awwaadina ihoo'isa issu keesammi mu'uttuwwaa hundam Keesammi Mine aagisukko.

¹⁶Yihuxxi adil Asa'aa Isra'ee'l adil Baa'ishii ixxuwwi adilla'n doollenne hundannem orantam hee'llo'o.

¹⁷Baa'ish Yihuxxi uulla qasaa Raama'a girbisaa baxisukko. Eekka issu mashka'im Yihuxxi uulla ayyim aagoobee'isaa firoobee'isaa hoorimminatti hee'ukko.

¹⁸Ee mashka'inne adil Asa'a Keesammi Miniinsii ixxi adilla'n miniinsii gatu worqaa biraa hundam fissaa Damaasqo'i beero'onne hee'oo Xabriimoon beet hee'u Heezyoonina beet beet ihu Sooriy uulli adil Beenhadaadina ixxi gassaanonne asse'ukko.

¹⁹Ixxim «Iyyannii kiyyannii issitam hee'llo'isanne ni lambe'ennem mateeyyoom gindamoobee'isa issinona. Ku birii worqii kiina an asse'aammoohane. Ka lasage Isra'ee'l adil Baa'ish ixxi gaadaano i gassi uulliinsi fissoo'isina iina hara'mmiteena illageen ixxenne hee'u mateeyyooma kaba ginditoo'isina uunxoommo» yoo asso edaa asse'ukko.

²⁰Adil Benhadaadim Asa'a hincaa'u sawwitenne iittamaa gaaxxi awwonsaanoo gaadaanoo asse'aa Isra'ee'l beero'uwwa qassamisa issukko. Ixxuwwim Iyyoona, Daana, Abeelbeetmaa'ikka, Galii'l dambalaqa yakkam beero'uwwa, ee'isam Galii'l dambalaq gadanonne yoo uullaa Niftaalee'm gassi uullaa hundam amaddo'o.

²¹Adil Baa'ishim eekka macceesu ammanenne Raama'a girbimma uraa Tirixa'a marukko.

²²Adil Asa'am Yihuxxi uullanne hundannem alallaatisaa minaadab matim gatoo'n firaa Baa'ish Raama'a girbeena wixxaa'aa hee'u kinaa haqqaa ee beyyiinsi hara'mmita'a ki'issamisa issukko. Ee beyyiinsi ki'isso'i kininnee haqqinnee massaa Misiphphaa Biiniyaam gassi uullanne hee'oo Geeba'i beero'oo baxukko.

²³Adil Asa'a issu mulli luwwi hundim, geedoo'm baxii girbisu beero'uwwii Yihuxxi Adilluwwi Aganni Kitaabanne kitaabamaakko. Ihukkaarem adil Asa'a lommanna'n doollenne lokki xissam hee'u bikkina shiihaa hee'ukko.

²⁴Ixxim lehukko. Daawiit beero'onne yoo adilluwwi waammi beyyonne waammamukko. Ixxi beyyonnem ixxi beet Yoosaafix adil ihukko.

²⁵Asa'a Yihuxxi uulli adil ihu la'm hiinchonne Yoorbi'aam beet Naadaab Isra'ee'l adil ihaa lam hiincho gassukko.

²⁶Illageen hee'u ixxi annisam baaxiilo baximminne Waa'i illagenne jor baaxiilo baxukko. Isra'ee'l minaadaba baaxii'l googonne awwonsaa waa'i illagenne jor baxo baxukko.

²⁷Yisaakoor sullik Akiiy beet Baa'ish Naadaabanne bangujjaa shukko. Ee ammane Naadaabii ixxi gaadaanii Filisxee'm uullanne hee'oo Giibaatoo'n beero'o kibbittu'uuyyi hee'llo'o.

²⁸Oohim ihukkok Asa'a Yihuxxi adil ihu saxxi hiinchonnette. Ee'isinne Baa'ish Naadaab beyyonne Isra'ee'l adil ihukko.

²⁹Ixxi adil ihukkisam Yoorbi'aam abaroosa guullimma asheerukko. Waa'i Seelo'onne qaramu ixxi awwaadaanchi hee'u hiraagaanchi Akiiyinne wocu saga'llisam Yoorbi'aam abaroosa hundam shukko. Ixxuwwiinsi matim foorinne gatukkoyyo.

³⁰Mashka'oomim Yoorbi'aam ixxi gagoomim baxu baaxiilinnee Isra'ee'l minaadab baaxiilo baxxamisa issimminnee Isra'ee'l Moollanni Waa'a quuqisu bikkinatte.

³¹Naadaab baxu mulli luwwi hundim Isra'ee'l Adilluwwi Aganni Kitaabanne kitaabamaakko.

³²Yihuxxi adil Asa'aa Isra'ee'l adil Baa'ishii adillanonne hee'llo'i doollenne hundannem orantam hee'llo'o.

³³Asa'a Yihuxxi uullanne adil ihu saxxi hiinchonne Akiiy beet Baa'ish Isra'ee'l minaadabanne hundannem adil ihukko. Ixxi heechchi beyyom Tirxa'anne issaa lamiyyee soor hiinchoo gassukko.

³⁴Baa'ishim baaxiilo baximminnee Isra'ee'l minaadabam baaxiilo baxxamisa issimminnee ixxeensi illageen hee'u adil Yoorbi'aamisam Waa'i illagenne jor baxo baxukko.