Read Hadiyya 1Adlilluwwi kitaaba 17 Bible Online

1Adlilluwwi kitaaba 17 - Hadiyya bible

1Adlilluwwi kitaaba 17

¹Gala'aaxxi uullanne Tuubi'i yakkam beyyi hiraagaanchi Eeliyaas adil Aki'aabina «I Sagarinnetti ihubeelas waaroo lam hiinchonne te'im sas hiinchonne uullanne aash te'im xeen hee'oobee'an ihukkisa an awwaadoommi Isra'eelina Moollanni ihu hee'oo Waa'i summinne kuroommo» yukko.

²Ee lasage Waa'i Eeliyaasina

³«Ka beyyiinsi ki'llaa eelliinchi firoo kollonne mare; ee beyyonnem Yoordaanoos daajjiinsi eelliinchi firinne hee'oo Karaata yakkam cebbi woronne maaxame.

⁴Atim wo'o ee daajjiinsi aggootto. Kiinam ittoo hurbaata qooraanti eeboo'isa ijaajaammo» yukko.

⁵Eeliyaasim Waa'i ijaajukkisannem maraa Koraat cebbanne afuurukko.

⁶Ee beyyonnem qooraanti hundi ammanem daraa maaro'oo injeeraa maaraa eebam hee'ukko. Wo'om ee daajjiinsi agam hee'ukko.

⁷Hofqax ammaniinsi lasonne uullanne xeen hee'ubee'i bikkina oo daajji gogukko.

⁸Ee lasage Waa'i Eeliyaasina

⁹«Kaba ka beyyiinsi ki'llaa mattaa Siidoo'n uullanne hee'oo Saraaphphit beero'onne afuure. Oona'a, ee beyyonne hee'llam mat busar meentichcho kiina hurbaata uwwitona ijaajaammo» yukko.

¹⁰Ee bikkina Eeliyaas ee beyyiinsi ki'aa Saraaphphita marukko. Ixxim ee beero'i ooxxi goocanne hincu ammanenne mat busar meentichcho haqqa feettu'uuyyi moo'aa «He'i, agakkam wo'o eebe» yukko.

¹¹Wo'o eebbeena mattu'uuyyi odim weeshaa «He'i, gootto'i injeeram eddaa eebe» yukko.

¹²Isem dabatta'a «I minenne injeer ma'lluwwim bee'an ihukkisa hee'oo ki Moollanni Waa'i summinne hide'oommo. Qama dissoommi harachchonne yoo mat oobo'i qamiinsii humbullonne yoo cuungi wee'l zaytiinsii bagaan iina ma'llichchim bee'e. An keyye waarummok hofqax qoxaxxam fee'llaa mine daba'llaa ee yoo gootto'i qanchom i beetinaa i gaginaa sa'lleenatte. Oottem niina lasaanchi hurbaatichchotte. Ee lasage sibaarinne lehimmiinsi gantoombee'ane» yito'o.

¹³Eeliyaasim isena «Hawwititte! Mattaa ee hurbaata sare. Ihukkaarem gaassitaa iina gootto'i ongochcho'o sattaa eebe; gatukkokam ki gaginaa ki beetinaa sare.

¹⁴Mashka'oomim Isra'ee'l Moollan Waa'i ‹An xeena ga'nniseembe'e qam harachchiinsi zaytim humbulliinsi hore'em beeddooyyo› yaa wocaakko» yukko.

¹⁵Oo busar meentichchom matta'a Eeliyaas wocukkisam issito'o. Ee'isinne ise, is abaroosii Eeliyaasii lobakat ballina ihoo hurbaata siiddo'o.

¹⁶Waa'i Eeliyaasena uwwu neeyyaxxisannem qam harachchiinsi zaytim humbulliinsi beeddukkoyyo.

¹⁷Hofqax ammaniinsi lasonne ee busar meentichchi beet xissukko. Xissim baasukkuuyyi maru bikkina lehukko.

¹⁸Isem Eeliyaasina «Kaa Waa'i mancho, mahinatte eesenne kaka issittok? Keyye waattittok i baaxiilo Waa'ina tiissiissaa i beet lehoo'isa issiteenattennihe?» yita'a xa'mmito'o.

¹⁹Eeliyaasim «Ki beeto keyye eebe» yukko. Ee beetom ise qaaphphito'i beyyiinsi aa'aa ixxi hee'oo fooqanne fissaa ixxi ara'anne iinsiisukko.

²⁰Ee lasage Eeliyaas sagara iimaa'aa «I Moollanni Waa'a! Ka busar meentichchonne kaa'nna kichche'isoo kee'mmaalli luwwa mahina issitto? Ise eese koyyinano aa'imminne lobakat biijooma iina issito'ookko. Eehaare at mahina is beet lehoo'isa issito?» yaa Waa'a uunxukko.

²¹Ee lasage Eeliyaas ee leesh hanenne sasaagge biddiqaa «I Moollanni Waa'a! He'i, ka beeto lehiinsi ki'ise!» yaa Waa'a uunxukko.

²²Waa'im Eeliyaasika uunxato macceesukko. Ee beetikim foor daba'llaa oo beet lehiinsi ki'ukko.

²³Eeliyaasim ee beeto fooqiinsi amadaa uulla dillukko. Ixxom amana uwwaa «Ka moo'e, oono'o ki beet lehiinsi heechchanne daba'llaakko!» yukko.

²⁴Oo meentichchom Eeliyaasina «At Waa'i manchi ikkittisaa at woccoottokim hanqo'i Waa'i sagar hanqo'an ihukkisaa an kaba qoossaa la'ummo» yito'o.