Read Hadiyya 1Adlilluwwi kitaaba 18 Bible Online

1Adlilluwwi kitaaba 18 - Hadiyya bible

1Adlilluwwi kitaaba 18

¹Lobakat ammaniinsi lasage saxxi hiinchonne Waa'i Eeliyaasina «Mattaa adil Aki'aabina moo'ame; anim uullanne xeen ga'nnoo'isa issoommo» yukko.

²Eeliyaasim ijaajamukkisanne Aki'aab beyyo marukko. Ee ammane Samaare'i uullanne sibaar lobakata qoxxaa hee'ukko.

³Ee bikkina adil Aki'aab adi'l mi'n awwonsaanchi ihu Abdiyu weeshisukko. Abdiyim Waa'a lobakata baddoo manchi hee'ukko.

⁴Eelzaabeele Waa'i hiraagaano shisiissam hee'llo'i doollenne Abdiy mat xibbi Waa'i hiraagaano ontayyi ontayyi issaa lam beyyo baxxansaa daawwa'anne maaxaa hurbaataa wo'oo uwwam hee'ukko.

⁵Aki'aabim Abdiyina «Faradoo baqullaa lehiinsi gatinseena ayyi la'ukko ihoo hixe siindoomman ihaakkoolas ka uullanne yoo bu'uwwii daajjuwwii yoo beyyuwwa mattaa moo'e. Ayyi la'ukko ni diinate lehiinsi gatinsoommi ihookko» yukko.

⁶Lamem manchim mattam uulla baxxanta'a matteena iittanta'a lasage Aki'aabii Abdiyii mulli mullam annanni annanni googom matto'o.

⁷Abdiy marukkuuyyim dangonne Eeliyaasinne edamukko. Eeliyaasatte ihukkisa la'u ammanenne illillaachcha uullanne ubaa «I moollanna, Hanqinam Eeliyaas atettennihe?» yaa xa'mmukko.

⁸Eeliyaasim «Eeyya anette. Ka beyyonne yoommisa mattaa ki moollannina kure» yaa dabarukko.

⁹Abdiyim «Adil Aki'aab eese ki agishsho shoo'isina ixxi anganne higissaa uwwitoottok an maha hawwodummaarette?

¹⁰Adil keese hasukkuuyyi ka uullanne manna asse'u bee'i uulli bee'isa hee'oo ki Moollanni Waa'i summinne hide'oommo. Mat uulli gassaanchi at ee uullanne bee'isa kuroo amman hundam adil Aki'aab at ee uullanne bee'isa hide'aa la'isoo'isa issaakko.

¹¹Eehannah ku woshshi ka'isanne ihaa hee'ukkuuyyi at ka beyyonne yoontisa maraa ixxena kurona hassoohonnihe?

¹²An ka beyyiinsi marummisam ee ammanchom Waa'i Ayyaan keese an la'oombee'i beyyo massaa uruta'n an maha ihoommo? Mashka'oomim at ka beyyonne yoontisa Aki'aabina kuraa keese siidoo'n gatuta'n ixxi eese shookko. An oosoommaniinsi ki'isaa kaballi afeebe'e Waa'a baddoommi manchi ihummisa sawwihe.

¹³Odim Eelzaabeele Waa'ina awwaaddam hiraagaano shisiissam hee'llo'i ammane mat xibbi hiraagaano lam beyyonne baxxansaa ontayyi ontayyi issaa daawwa'i woronne maaxaa hurbaataa wo'oo uwwummuuyyi hee'ummisa macceessittoyyonnihe?

¹⁴Eehannah kaba at ka beyyonne yoontisa mattaa adil Aki'aabina kure yitoollannihe? Eekka issumlas adil eese shookko» yukko.

¹⁵Eeliyaasim «Kaballa an adilina moo'amoomman ihukkisa an awwaadoommi hundam xanoo Waa'i summinne sagara aagoommo» yaa dabarukko.

¹⁶Ee lasage Abdiy maraa adil Aki'aabina kurukko. Aki'aabim ki'aa Eeliyaasinne edameena marukko.

¹⁷Aki'aabim Eeliyaase moo'aa «Isra'eelanne kaa'n hawwi afoo'isa issittok atettennihe?» yukko.

¹⁸Eeliyaasim «Waa'ika ijaajjuwwa gindimminnee Ba'aala yakkam qophpha'n waa'i misilluwwina otossimminnee hawwi afoo'isa issitakko'ok atettee kiyyanni minee bagaan Isra'ee lanne hawwi afoo'isa issummok aneyyo.

¹⁹Isra'ee'l minaadaba hundam, Eelzaabeel maaddiinsi ittam soor xibbee ontayyi Ba'aa'l hiraagaanoo soor xibbi Ashee'l hiraagaanoo Qarmeeloos duunanne wixxaa'e» yukko.

²⁰Ee bikkina Aki'aab Isra'ee'l minaadabii hiraagaanii hundim Qarmeeloos duunanne wixxitamisa issukko.

²¹Eeliyaasem minaadaphphi illagenne hincaa «Hinki balli afeebe'e lameeqqitakku'uuyyi hee'llakkamo? Waa'i hanqo'an ihaakkoolas ixxena otossi'llehe; te'im Ba'aal hanqo'an ihaakkoolas ixxena otossi'llehe» yukko. Ihukkaarem minaadab maham dabarukkoyyo.

²²Ee lasage Eeliyaase minaadabina «Waa'i hiraagaaniinsi gatummok xale'i anette. Ihukkaarem soor xibbii ontayyi Ba'aa'l hiraagaanii oono'o, keyye yo'o.

²³Ee bikkina lam baa'l moolluwwa ebbakka'a matooma Ba'aa'l hiraagaan massita'a duttona; maarooma muransita'a haqqa tuubba'a ee haqqi hanenne issitona. Ihukkaarem giira xanqissoone. Anim la'm baa'l moora massaa ee'isa issoommo; giiram xanqisoommoyyo.

²⁴Ee lasage Ba'aa'l hiraagaan ixxuwwi waa'a uunxitona. Anim Waa'a uunxoommo. Uunxato macceesaa ee kitimanne giira dilliisookkok ixxi hanqo'i Waa'a» yukko. Minaadab hundim sagara iimaa'aa ee sawwitenne iittamukkisa la'isukko.

²⁵Ee lasage Eeliyaase Ba'aa'l hiraagaanina «Ki'nnuwwi dut ikkakko'i bikkina gaassitakka'a mat baa'l moora doo'llitakka'a duttakka'a ki'nnuwwi waa'a uunxehe. Ihukkaarem haqqanne giira xanqissakkotte» yukko.

²⁶Ixxuwwim ixxuwwina uwwamu baa'l moora massita'a kitimta'a balli kolli afeebe'e Ba'aala uunxito'o. «Ba'aala! Hay macceese!» yitu'uuyyi shuutto'o. Ee gudisso'i kiti'm kululleetanne shimmishimmitu'uuyyi hayyaatto'o. Ihukkaarem matem dabachcham siiddo'oyyo.

²⁷Samgud ballannem Eeliyaase «Ixxi waa'ayyonnihe? Sagara iimmaa'llakka'a shuuttakku'uuyyi uunxehe; ayyi la'ukko ixxo kee'mmaalli sawwit amadaatette ihookko. Te'im chireena firaat ihookko. Te'im qee'l uulla maraat ihookko. Te'im diriiraakkoolas baqaa'immi hasisookko» yukkuuyyi naacamukko.

²⁸Ee bikkina oo qophpha'n hiraagaan sagara iimaa'lla'a shuuttu'uuyyi ixxuwwi losa'nnisam ixxuwwiinsi xiig dunameebe'e ixxuwwi orachco billawwinnee bisa'innee madissam hee'llo'o.

²⁹Samgud balli higaa lasonne maaroo'i balli kitima hincaa'akkam amman afeebe'e hiraago woccu'uuyyi uunxitam hee'llo'o. Ihona bagaan matem dabachcham siiddo'oyyo; sagarim macceesamukkoyyo.

³⁰Ee lasage Eeliyaas minaadab hundinam «I kolli hinci'llehe» yukko. Minaadabim ixxi kululleetanne wixxito'o. Ixxim Waa'ina kitima hincaa'akkam gindamaa hee'u beyyo dabaraa baxukko.

³¹Ee lasage Eelyaase Waa'i «Isra'eela» yaa summa fissu Yaaqoobiinsi qaranto'i tomminnee lam sulli summinnee tommoo lam kinaa massukko.

³²Ee kinnewwinnem Waa'i summina kiti'm beyyo baxukko. Ee kit'm beyyi kululleetannem tommoo soor liitir wo'oo amadoo bare hinukko.

³³Ee kiti'm beyyonnem haqqa dahaa ee baa'l moo'l maara qaamafeettuwwanne muransaa haqqi hanenne issaa lasage

³⁴«Soor jaalo'i wo'o kiti'm hanennee haqqi hanennee dunnehe» yukko. Ixxuwwim ee'isam issito'o. «Odim eddehe» yukko. Ixxuwwim ee'isam issito'o. Ixxim «Kabadem odim mataagge eddehe» yukko. Ixxuwwim ee'isam issito'o.

³⁵Wo'im ee kiti'm beyyi kululleetanne daadukko; barennem wo'mmukko.

³⁶Maaro'i balli kitima hincaa'akkam ammanenne hiraagaanchi Eeliyaas kit'm beyyo hincaa «Abirihaamina, Yisaaqinaa Yaaqoobinaa Moollanni Waa'a! At Isra'eelina Waa'i ikkittisa, anim ki awwaadaanchi ihummisaa anim ka hundam issummok ki saga'llisannetti ihukkisaa at ki gagim la'ise.

³⁷I Waa'aa, ku minaadab at hanqo'i Waa'i ikkittisaa ixxuwwi wodanom ki kollonne dabattittok atetti ikkittisaa laqqona hay at iina dabachcha uwwe. I Moollanna, i uunxato macceese!» yaa uunxukko.

³⁸Ee lasage Waa'i giira asse'ukko. Oo giirim kitima, haqqa, kinaa buchchaa shokkiisukko. Barenne hee'u wo'om gokkisukko.

³⁹Minaadabim eekka moo'llo'i ammanenne illillaachcha uullanne ubba'a maalaltu'uuyyi «Waa'i Moollanna! Hanqo'i Moollanni Waa'i xale'i ixxotte!» yito'o.

⁴⁰Eeliyaasim «Ba'aa'l hiraagaaniinsi mat manchim xoroobee'isa amaddehe» yaa ijaajukko. Minaadabim hundam amaddo'o. Eeliyaasim Qiishoo'n daajje awwonsaa massaa ee beyyonne hundam dussiisukko.

⁴¹Ee lasage Eeliyaase adil Aki'aabina «Kaba mattaa itee agee; mashka'oomim an kaba kee'mmaalli xee'nnek gug hincukkisa macceesoommuulla» yukko.

⁴²Aki'aab iteenaa ageenaa marukkuuyyi Eeliyaas Qarmeeloos duunanne firukko. Ee beyyonnem ixxi lamem gurubbi lambe'ennem horoore aagisaa uullanne qubbukko.

⁴³Eeliyaasim ixxi awwaadaanchina «Mattaa dambalaq kolli moo'e» yukko. Ixxi awwaadaanchim moo'aa daba'llaa «Matem luwwim iina moo'amukkoyyo» yukko. Eeliyaas ixxi awwaadaanchi lamar kore daba'llamaa moo'ona» ijaajukko.

⁴⁴Ixxi awwaadaanchim lama'l korenne daba'llaa «Mat manchi angi oobbiinsi lophphoobee'i winxo'i duub dambalaqiinsi firukkuuyyi moo'ummo» yaa kurukko. Eeliyaasim «Adil Aki'aab beyyo mattaa ‹Xeen amadoo'n qaqqissaa ki faraxxi gaarre'enne saa'llitaa ki mine daba'llitaa mare› yitaa kure» yaa ijaajukko.

⁴⁵Hofqax ammaniinsi losonne iiman heemachchi duubinne ifiisamukko. Hafachchim hafachchimmaa kee'mmaalli xeenim ga'nnimmaa asheerukko. Adil Aki'aabim faraxxi gaarre'enne saa'llaa Yizra'eela marukko.

⁴⁶Waa'i Malaayyim Eeliyaasenne dillukko. Eeliyaasim ixxi eddechcha ixxi lamadonne xishshaa'aa lade'aa Yizra'eela aagakkam gooc afeebe'e Aki'aab illagenne higaa geeram hee'ukko.