Read Hadiyya 1Adlilluwwi kitaaba 19 Bible Online

1Adlilluwwi kitaaba 19 - Hadiyya bible

1Adlilluwwi kitaaba 19

¹Eeliyaas baxu baxo hundamii Baa'aa'l hiraagaano hundam bisa'inne shisiisukkisaa adil Aki'aab ixxi meentichchona Eelzaabeelena kurukko.

²Ee bikkina ise «Ee hiraagaanonne issittoka anim soodo kido'i ammanenne keesenne issoo'n urumlas waa'uwwi eese eehid issona» yita'a Eeliyaas beyyo asso asse'llo'o.

³Eeliyaasim baddu bikkina ixxi gaga gatixxeena ixxi awwaadaanchinne maqirem Yihuxxi uullanne hee'oo Bersaabe'i beero'o marukko. Ixxi awwaadaanchom ee beyyonne uraa

⁴«Eeliyaase mat balli googo uulli udma'anne taakke'ukko. Ee lasage ixxi taakko uullisaa mat kitkixxi haqqi hafanne afuurukko. Ixxim leho mixaa «I Waa'a, kabada'i iina ihookko. Gaassi iyyanno'iinsi lophphoommoyyo i foore massee!» yaa Waa'a uunxukko.

⁵Ee lasage ee kitkixxi haqqichchi lugummonne laphaa hekkukkisam diriir massukko. Dangonnem Waa'i asse'amaanchi waaraa orachcho nakkaa ki'isaa «Ki'llaa ite!» yukko.

⁶Eeliyaasim ki'aa ixxi kululleeta moo'u ammanenne ki'n iibbanne saramaakkoo daabbo'ii mat harachchi wo'ii ixxi horoo'l baganne afuuraakkoo moo'aa itaahii agaahii lasonne daba'llaa iinse'ukko.

⁷Waa'i asse'amaanchim daba'llaa waaraa «Mattoo goog qee'l ihu bikkina ki'llaa ite» yaa la'mmaaggem ki'isukko.

⁸Eeliyaasim ki'aa ee hurbaata itukko; wo'om agukko. Ee hurbaata itaa siidu malaayyinne keesammi Siina'i duun afeebe'e sor ballaa sor hiimoo hundam taakke'ukko.

⁹Eekke'e afukkisam mat daawwa'anne aagaa ee beyyonne garukko. Dangonnem Waa'i «Eeliyaasa! Ka beyyonne maha issitoollaa?» yaa xa'mmukko.

¹⁰Eeliyaasim «Hundam xantoo gogoxxi Moollanni Waa'a! An ki Waa'oo'm bikkina lobakata to'achchaa hundi ammanem xale'i kiina awwaadoommo. Ihukkaarem Isra'ee'l minaadab kiinninne maqire aaggo'i hidi'l sagara gindito'ookko. Kiina kitima hincaa'akkam beyyom iiqansito'ookko. Ki hiraagaanom shito'ookko. Oono'o, kaba xale'i an gataammo. Eesem ihukkaare shiteena hassamuulla» yaa dabarukko.

¹¹Waa'im Eeliyaasina «Yoonti beyyiinsi fittaa duu'n ludonne i illagenne uulle» yukko. Ee lasage Waa'i ixxi gadaninne higukko. Waa'i illagennem kee'mmaalli hafachchi duunnuwwa diqansukko; kinneewwam iiqansukko. Ihukkaarem Waa'i ee hafachchi woronne hee'ukkoyyo. Ee hafachchiinsi lasage uulli huxe'ukko. Ihukkaarem Waa'i ee uulli huxechchi lambe'enne hee'ukkoyyo.

¹²Uulli huxe'aa lasonne giir waarukko; ihukkaarem ee gii'l woronne Waa'i hee'ukkoyyo. Giiriinsi lasonne hoffi sagar macceesamukko.

¹³Eeliyaas ee hoffi sagara macceesu ammanenne ille weyyakkinne ifiisukko. Daawwa'i goocanne firaa uullukko. Ee beyyonne uullukkisam «Eeliyaasa, ka beyyonne maha issitoolla?» yoo sagara macceesukko.

¹⁴Eeliyaasim «Hundam xantoo gogoxxi Moollanni Waa'a! An ki Waa'oo'm bikkina lobakata to'achchaa hundi ammanem xale'i kiina awwaadoommo. Ihukkaarem Isra'ee'l minaadab kiinninne maqire aaggo'i hidi'l sagara gindito'ookko. Kiina kitima hincaa'akkam beyyom iiqansito'ookko. Ki hiraagaanom shito'ookko. Oono'o, kaba xale'i an gataammo. Eesem ihukkaare shiteena hassamuulla» yaa dabarukko.

¹⁵Waa'im «Damaasqo'i beero'i gadanonne hee'oo udma'i uulla daba'llitaa mare. Eekke'e affaa lasage Azaaheela doo'llitaa Sooriy uulli adil isse.

¹⁶Niimiish beeto Iyyu'u doo'llitaa Isra'ee'l minaadabina adil isse. Aabeelmahool beero'iinsetti ihu Yoosaafaax beeto Elsa'am doo'llitaa ki beyyonne hiraagaanchi ihoo'isa isse.

¹⁷Azaa'ee'l angiinsi xoraa gatoo ayyi manchom Iyyu'u shookko. Iyyu'i angiinsi gataa xorookkokam Eelsa'a shookko.

¹⁸Ihona bagaan Ba'aalina otossitobee'i keenoo ee misilluwwam suunqitobee'i lamar kum mannaa Isra'ee'l uullanne i gagina gatisoommo» yukko.

¹⁹Eeliyaase ee beyyiinsi maraa lasage Yoosaafaax beet Eelsa'a lam mirgo'uwwa qaashaa abuullukkuuyyi edamukko. Ixxenne maqirem tomminnee mat qaash mirgo'uwwinnee abuullitam dawwaan hee'llo'o. Eelsa'am tommaanninnee la'm qaashinnee abuullam hee'ukko. Eeliyaasim ixxi weyyakka sheelataa Eelsa'anne eddeesukko.

²⁰Ee ammanenne Eelsa'a ixxi mirgo'uwwa uraa Eeliyaas kollonne geeraa «Iyyannaa iyyummaa suunqaa xummanne hee'llehe yaa lasage keese awwonoommisa isse» yukko. Eeliyaasim «Ihona; mattaa waare an hooroommoyyo» yaa dabarukko.

²¹Ee lasage Eelsa'a ixxeka mat qaash mirgo'uwwa durukko. Qaashaa hee'u gaanjaqqa giiraa ee maara saraa mannina hincaa'ukko. Ixxuwwim itto'o; ee lasage Eeliyaase awwonaa maraa ixxena hara'mmaanchi ihukko.