Read Hadiyya 1Adlilluwwi kitaaba 2 Bible Online

1Adlilluwwi kitaaba 2 - Hadiyya bible

1Adlilluwwi kitaaba 2

¹Daawiit lehoo amman afukkaare ixxi beet Salamoona weeshaa

²«Oono'o, an lehoommi ayyaam hincaakko. Ee bikkina qoxxe! Murte'aalli manchi ihe.

³Ki Moollanni Waa'i issitona keese ijaajoo luwwi hundam isse. Mattoo beyyi hundannem issitoo luwwi hundim taaphanoo'isina Muse'enne uwwamaa kitaabamu Waa'ika ijaajo, Seera, oogato'oo siyya'aa hundam egere.

⁴Ka hundam ijaajantaa egettilas ‹Ki shumo'i qoxxaa ege'llimminne ixxuwwi wo'm wodaninnee sawwitinnee i illagenne xabbeenoominne daba'llantolas Isra'ee'l adilla'n barcumanne adil ihaa gassookkok ki shumo'iinsi bee'ooyyo› yaa iina uwwu neeyyaxxi sagara wonshookko.

⁵«Xiruyyi beet Yoo'aab Isra'ee'l minaadaphphi gaaxxi awwonsaan hee'llo'i Neer beet Abaneerannee Yiteer beet Amaasannee issukkoka atim laqqootto; oohim o'l ammane dunamu xiiqqi baadina xummi ammanenne ixxuwwa shaa ixxi lade'u o'l mu'utaa caamma'aa xiiginne kolbaakko.

⁶Ee bikkina kiina uwwamu qooroominne ixxonne issimmi hasisoo'isa isse bagaan umura goddaa xumminne abo'aa lehona cawwititte.

⁷«Ihukkaarem Gala'aaxxi Barzilaay oos Abeseloomiinsi gibummi ammane iina eroomma issito'i bikkina atim ixxuwwina eroomma issimminne abooyye; ki maaddiinsi ittam keeninnem ittona.

⁸«Eehanniinsim mullek xadimmi hasisoobee'ek Biiniyaam gassi uullanne Baahuuriim beero'onne hee'oo Geera'i beet Shiimi'i ki angannette. Ixxi an Maahinaayima marummi balla eese jorisa game'llaakkoohane; ee'isa ihaa odim Yoordaanoos daajji gadanonne siidaa eese taqeebalukkaare ‹An keese shoommoyyo› yaa Waa'i summinne hide'aa hee'ummo.

⁹Ihukkaarem kiina uwwamu qooroominne ixxonne maha issimmi hasisooda'e laqqoo bikkina ixxo guzumo'lloo'n uttitte. Ixxo shimmi hasisoo'isam la'e» yaa ka lasaanchi ijaajo uwwukko.

¹⁰Daawiitim lehukko. Ixxan ihu Yerusaalee'm beero'onnem waammamukko.

¹¹Daawiit Isra'ee'l minaadaba adillaninne sor hiincho gassukko. Keebiroonanne lamar hiincho Yerusaaleemannem sadee sas hiinchoo adil ihukko.

¹²Salamoonim ixxi anni Daawiit adilla'n barcumanne afuurukko. Ixxi adilla'n gassim lobakata qoxxaakkoohan ihukko.

¹³Hagiit beet Adooniyaas Salamoon amatte ikko'i Beersaabeeh beyyo marukko. Isem «I beyyo xumminam waattaahinnihe?» yita'a xa'mmito'o. Ixxim «Eeyya an waarummok xumminatteme» yaa dabarukko.

¹⁴Odim «An keese xa'mmeena hasaammoo luwwi yookko» yukko. Isem «Maha?» yito'o.

¹⁵Adooniyaasim «Adillano amadimmi iina laboohan hee'ukkisaa eekkam Isra'ee'l minaadab hundim ege'llaa hee'ukkisaa atim laqqooto; ihukkaarem oo adillan Waa'i doo'l ihu bikkina iinniinsi higaa iyyabbaayyina uwwamaakko.

¹⁶«Kabadem keese uunxoommi luwwi yoo bikkina sabbaa eese tuussiissoobee'isina uunxoommo» yukko. Bersaabehem «Kure» yito'o.

¹⁷Ixxim «Adil Salamoon kiina saboobee'isa la'oommo. Ee bikkina Suunaa'm uullitan ikko'i Abiishaage yamantam landichcho iina ladiisona i bikkenne uunxe» yukko.

¹⁸Isem «Erane; eekka adilina kuroommo» yito'o.

¹⁹Ee bikkina Bersaabeh ee woshsha kutteena adil Salamoon beyyo aaggo'o. Adilim ki'aa taqeebalaa adilla'n barcumanne afuuraa lasage mulli barcuma eebisaa makki kollinne afuuttamisa issukko.

²⁰Isem «Iina issitona hasoommi gootto'i luwwi yookko. Ha'i sabbaa eese tuussiissitte» yito'o. Adilim «Iyyumma, keese tuussiisoommoyyo; maha?» yukko.

²¹Isem «Kiyyabbaayyi Adooniyaasina Abiishaage uwwe» yito'o.

²²Adilim «Abiishaage xale'e mahina xa'mmitoolla? I adillanom fatakihona mahina eddaa xa'mmittoyyo? Ixxi iina lob abbaayyo; qeessichchi Abiyaataarinaa Yoo'aabinam eroomma issona mahina eddaa xa'mmittoyyo!» yukko.

²³Ee lasage adil Salamoon «Adooniyaas kaka xa'mmu bikkina an ixxo shoo'n urummaa'lleensi Waa'i eese shihona.

²⁴Kabadem eese Waa'i iyyanni Daawiit adilla'n barcumanne qoxxaalli issaakko. Ka adillanom iinaa i shumo'inaa uwwimminne aagu hidi'l sagara egeraakko. Ee bikkina Adooniyaas kaballa lehoo'isa hee'oo Waa'i summinne hide'oommo!» yaa hide'ukko.

²⁵Ee bikkina adil Salamoon Yoodaah beet Baanaay Adooniyaasa shoo'isina ijaajukko. Baanaayim maraa Adooniyaasa shukko.

²⁶Adil Salamoon qeessichchi Abiyaataarina «At qarantitti uulla Anaatoota mare. At lehimmi hasisoohan hee'ukko. Ihukkaarem kaba an keese shoommoyyo. Mashka'oomim Moollanni Waa'i Hidi'l Sagara dissakkam Saaxina iyyanni Daawiit illagenne iyyitaa ixxennem hawwi hundam baxxantaatto» yukko.

²⁷Ee lasage Adil Salamoon Abiyaataara Waa'ina awwaadimminne hee'oo qeessooma'n daannoomiinsi hollukko. Ee'isinne Seelo'onne Waa'i qeessichchi Eeli'i bikkinaa ixxi shumo'i bikkinaa wocu sagar wo'mmukko.

²⁸Yoo'aabim ee woshsha macceesukko. Ixxim Adooniyaas woshsha aa'am hee'ukko bagaan Abeseloom woshsha aa'am hee'ukkoyyo. Yoo'aabim Keesammi Dukkaana gibaa marukko; ee beyyonne kiti'm beyyika buudo amadaa magannaato aagukko.

²⁹Adil Salamoonim Yoo'aab gibaa Keesammi Dukkaa'n beyyo marukkisaa kiti'm beyyi gadanonne yoo'isaa macceesaa Yoo'aaba shihona Baanaaya ijaajukko.

³⁰Baanaayim Keesammi Dukkaa'n beyyo maraa «Adil ka Dukkaaniinsi fittona ijaajaakko» yukko. Yoo'aabim «Keyyem lehoommo bagaan firoommoyyo» yukko. Baanaayim daba'llaa Yoo'aab wocu woshsha adilina kurukko.

³¹Adil Salamoonim Baanaayina mattaa «Ixxi yukkisam shitaa waamme; Yoo'aab kora'am dunu muccur kee'n xiigiinsi eesee iyyanni shumo'oo gatise.

³²Iyyanni Daawiit la'oo'nnim Yoo'aab ixxeensi e'llitam lam muccur gaaxxi awwonsaano oohim Isra'ee'l gaaxxi awwonsaancho Neer beet Abaneeraa Yihuxxi gaaxxi awwonsaancho Yeeteer beet Amaasaa bisa'inne shaakko. Ee bikkina Waa'i ee xiigina ixxo guzumo'aakko.

³³Yoo'aab ee manna shu bikkina ixxena uwwamu leh guzumo'i ixxonnee ixxi shumo'onnee heer heerinam qoxxaa hee'ona; ihukkaarem adilla'n barcumanne afuuroo Daawiit shumo'iinsi Waa'i xummi heer heerinam annanni ihoone» yukko.

³⁴Ee bikkina Baanaay ijaajamukkisannem Yoo'aaba shukko; ixxi mi'n gadanonne yoo udma'annem waammamukko.

³⁵Adil Salamoonim Yoo'aab bikkenne Baanaaya gaaxxi awwonsaanchi issaa Abiyaataar bikkennem Saadooqa qeessichchi issaa doo'llukko.

³⁶Ee lasage adil Salamoon Shiimi'a weeshisaa «Yerusaaleemanne mine baxxaa afuure; ka beero'iinsi mulli beyyo mattitte.

³⁷Ka beero'iinsimdu fittaa Qeediroo'n daajje higgaa siidantittaa'lleensi hanqo'isam letootto. Ee xiiginam xa'mmantoottok atetteme ikkitti bikkina ki xiig kora'am bi'ookko» yukko.

³⁸Shiimi'im «Adila, yittok eran ihu bikkina ee'isam issoommo» yukko. Ee bikkina Yerusaaleemanne lobakat doolle hee'ukko.

³⁹Sas hiinchiinsi lasage Shiimi'i awwaadaaniinsi lamo Gaat adi'l Ma'ak beet Akiish beyyo bi'lla'a matto'o. Shiimi'inam «Ki awwaadaan Gaatanne yo'o» yakka'a kurakko'o.

⁴⁰Shiimi'im hallichchonne koora issaa ixxi awwaadaano haseena Gaatanne hee'oo Akiishaa yakkam adi'l beyyo marukko; ixxuwwam ee beyyonne siidaa dabaraa ixxi mine eebukko.

⁴¹Salamoon Shiimi'i Yerusaaleemiinsi Gaata maraa waarukkisa macceesukko.

⁴²Adil Salamoon Shiimi'i weeshisaa «Yerusaaleemiinsi fittoobee'isa Waa'i summinne hidiisaa hee'ummoyyonnihe? Fittaa siidantitaa'lleensi hanqo'isam letoo'isa qoxxisaa kuraa hee'ummoyyonnihe? Ee woshshandu iitantaa i jaajo egetteena sagara aaggaa hee'llitoyyonnihe?

⁴³Eehannah Waa'i summinne hide'llaa lasonne Waa'i hidiro mahina egettittoyyo? I ijaajo mah bikkina lonsittoyyo?

⁴⁴Iyyanni adil Daawiitanne baxxitti jor baxo hundam laqqootto. At baxxitti jor bax bikkina Waa'i keese guzumo'ookko.

⁴⁵Ihukkaarem Adil Salamoon maasse'amaakkoohan ihookko; Daawiit adillanim Waa'i illagenne heer heerina qoxxaa hee'ookko» yukko.

⁴⁶Ee lasage adil Salamoon Yoodaah beet Baanaay Shiimi'i shihona ijaajukko; Baanaayim maraa Shiimi'i shukko. Ee'isinne Salamoon adillan qoxxukko.