Read Hadiyya 1Adlilluwwi kitaaba 20 Bible Online

1Adlilluwwi kitaaba 20 - Hadiyya bible

1Adlilluwwi kitaaba 20

¹Sooriy uulli adil Benhadaad ixxi gaadaano hundam wixxaa'ukko. Lobakat faradii faraxxi gaarre'uwwii yoo sadinnee lam adilluwwinnee hara'mmamaa gaadimminne Isra'ee'l lob beero'i ihu Samaare'e kibbaa qasukko.

²Ee lasage adil Benhadaad ee beero'onne yoo Isra'ee'l adil Aki'aabina «Beenhadaad

³‹Ki birii worqii, kiikki danaam meentii qoxxaalli oosii iihane› yoolla» yita'a kuttam asse'amaano asse'aakko.

⁴Aki'aabim «I moollanni ikkitti adila, yittaannonne hundannem iittamoommo. Anii iina yoo luwwi hundimii kiihane» yaa dabarukko.

⁵Hofqax ammaniinsi lasonne oo asse'amaan adil Benhadaadiinsi mulli ijaajom amadda'a odim Aki'aab beyyo waatto'o. Ijaajoomim «Ki biraa worqaa, Meentoo oosoo iina uwwitona asse'aa hee'ummo.

⁶Kabadem odim ki adilla'n mininnee ki uulli gassaa'n mininnee hee'oo awwaadoo mu'uta hundam haassa'a amadda'a waattona i gaaxxi awwonsaano asse'oommo. Ixxuwwim sooxxi dara kido'i ammanenne eekke'e affamo» yoohan hee'ukko.

⁷Isra'ee'l adil Aki'aabim ixxi uulli lommanna hundam weeshaa «Ku manchi woshsha hinkaa'nna hasuda'e moo'llehe! Kanniinsi illageen i meentoo i oosoo, i biraa worqaa uwwona xa'mmukkaare uwweena iittamaa hee'ummo» yukko.

⁸Lommannii minaadabii hundim «Ixxi yoo luwwina hundinam beyyo uwwititte; ixxi woshsham aa'llitte» yito'o.

⁹Ee bikkina Aki'aab Benhadaad asse'amaanina «I moollanni ihu adilina ‹Kanniinsi illageen xa'mmitti xa'mmichchanne iittamaa hee'ummo. Ihukkaarem kaba la'm xa'mmichchanne iittamoommoyyo yaakko yitakka'a kullehe» yukko. Asse'amaanim daba'llita'a matta'a ee dabachcha kutto'o.

¹⁰Benhadaadim «Samaare'i beero'i buchchiinsi mat mat fooccim afeena xanoobee'i qax gaadaano amadaa ki hanenne waarumbeelas waa'uwwi eese shitona!» yoo baddishshi asso asse'ukko.

¹¹Adil Aki'aabim waatto'i asse'amaanina «Hanqo'i gaadaanchi diraamimmi hasisookkok o'l kaachchiinsi lasonnette bagaan oriinsi illageeneyyo yitakka'a adil Beenhadaadina kullehe» yaa dabarukko.

¹²Benhadaadii ixxena o'l besh ikko'i mulli adilluwwii ixxuwwi gaqqi dukkaannuwwannetti ikka'a agu'uuyyim Aki'aab assi afukko. Ee ammanenne Benhadaad ee beero'o qasseena ixxi manni guddona ijaajukko. Ee bikkina ixxuwwi qaqqissa'a gudda'a beyyi beyyo amaddo'o.

¹³Ee ammanenne mat hiraagaanchi adil Aki'aab beyyo hincaa «Waa'i ‹Benhadaad gogoxxi dutoo'm bikkina baddititte; an kaballa ka gogota kaa'lloo'isa issoommo; atim an Waa'i ihummisa eehanninne laqqootto› yoolla» yukko.

¹⁴Aki'aabim «Gaadina ayyi illag ihon?» yaa xa'mmukko. Hiraagaanchim «Waa'i ‹uulli gassaanina ijaajantam harde'i gaadaan illag ikka'a gaaddona› yoolla» yukko. Adilim «Orancha gaassaa ayyi asheerona» yaa xa'mmukko. Hiraagaanchim «At ki gagim asheere» yukko.

¹⁵Ee bikkina adil xale'i lam xibbee sadee lam gaadaano uulli gassaanina ijaajantam harde'uwwa weeshukko; ee lasonne lamar kum ihoo qax Isra'ee'l gaadaano weeshukko.

¹⁶Benhadaadii ixxena o'l besh ikko'i sadii lam adilluwwii ixxuwwi gaqqi dukkaa'n woronne agginne dimbita'a yo'aannonne samgud ballanne Isra'ee'l o'l gogot fitto'o.

¹⁷Oo harde'i gaadaanim illagenne ikka'a higga'a awwonsito'o. Benhadaad asse'aa hee'u shaashshaanim «Mat gaadaa'n gaalchi Samaare'iinsi firaa kid waaroolla» yita'a kutto'o.

¹⁸Benhadaadim «Ee waattam keeno orinam ihukko xummina waatto'aarem foorinnem amaddakka'a i beyyo eebbehe» yaa ijaajukko.

¹⁹Oo harde'i gaadaanim Isra'ee'l gadaa'n illagenne ikka'a fitto'o.

²⁰Annannichchim orameena firu diinakkichcho shukko. Sooriy uulli mannim fiikkaa gibukko. Isra'ee'l mannim hollansimma asheetto'o; ihukkaarem Benhadaad farashshonne saa'llaa hofqax faradaaninne maqirem gibaa xorukko.

²¹Adil Aki'aabim oramaa diina'i faradoo faraxxi gaarre'uwwaa qeefadukko. Sooriy uulli mannannem kee'mmaalli hawwo afisimminne ixxuwwa kaa'ukko.

²²Ee lasage hiraagaanchi adil Aki'aab illage hincaa «Daba'llitaa mattaa ki gaadaano qooroominne qoxxaallisa issitaa orina gudise. Mashka'oomim Sooriy adil waaroo hiinchina qaraax agananne la'mmekam qaseena waarookko» yukko.

²³Sooriy uulli adil Benhadaadina gassaan ikko'i awwaadaan «Isra'ee'l minaadaphphi waa'uwwi duu'n waa'uwwa; ixxuwwi neese kaa'lleena xanto'ok ee bikkinatte. Ihukkaarem neese ixxuwwinne biir uullanne orammumlas kaa'nnoommo.

²⁴Ee bikkina kaba sadee lamem adilluwwam daannoomiinsi dilliissaa ixxuwwi bikkenne mulli ijaajaano doo'lle.

²⁵Kanniinsi illageen beeddukkaanni qax lobakat gogota, ee'isam gaassi qax faradoo faraxxi gaarre'uwwaa gudise. Ee lasage Isra'ee'l minaadaba biir uullanne orammaa kaa'nnoommo» yito'o. Adil Benhadaadim ixxuwwi sogitanonne iittamukko. Eekka isseenam murte'ukko.

²⁶Ee bikkina waaroo qaraax agananne ixxi gaadaano matissaa wixxaa'aa Isra'ee'l minaadaba qasimmina Afeeq beero'o marukko.

²⁷Isra'ee'l minaadabim weeshanta'a hasisoo gooqqi hurbaataa o'l mu'utaa amaxxita'a orina guddo'o; ixxuwwim o'l beyyo gaadda'a lam beyyonne baxxanta'a Sooriy manni illagenne yoo uullanne wixxito'o. Isra'ee'l gaadaa'n xigim uulli hundannem wo'mmu Sooriy o'l gogoxxi xiginne akeekamoohaare lam beyyonne baxxansakko'i fella'i hoffi allaachcha labam hee'ukko.

²⁸Mat Waa'i hiraagaanchi adil Aki'aab beyyo hincaa «Waa'i ‹Sooriy uulli manni «Waa'i duu'n Waa'a bagaan biir uulli Waa'ayyo» yito'ookko; ee bikkina an ixxuwwika ee hore'em lobakat ihu gogota at kaa'lloo'isa issoommo. Atii ki minaadabim an Waa'i ihummisa laqqakkamo› yoolla» yukko.

²⁹Sooriy mannii Isra'ee'l mannii kolli kollinnem gudda'a wiiddanto'isam lamar balli afeebe'e afuutto'o. Lama'l ballannem orancha asheetta'a Isra'ee'l manni ee balla mat xibbi kum Sooriy manna shito'o.

³⁰Lehiinsi gatto'i Sooriy manni gibba'a Afeeq beero'o aaggo'o. Ee beyyonnem lamiyyee lamar kumaa ihoo qax gaadaa'n hanenne ee beero'i oot toroshamaa hanenne ubaa beeddito'o. Benhadaadim xoraa ee beero'o aagaa mat mi'nnaannonne firkixxi kollinne yoo koshanne maaxamukko.

³¹Ixxi gassaan ikko'i ixxi uulli daannuwwim ixxi kolli hincita'a «Isra'ee'l adilluwwi haafitam keen ikko'isa macceensaammo. Ee bikkina ni lamadonne kichchechchi eddechcha lade'nnaah, ni gaanjennem usa issaqinaahii Isra'ee'l adi'l beyyo mallaahii urato niina issona xa'mminoommisa isse. Ayyi la'ukko ixxi keese shoo'n gatiseena xanookko» yito'o.

³²Ee lasage ixxuwwi lamadonne kichchechchi eddechcha lade'llahii ixxuwwi gaanjennem usa ka'llita'ahii adil Aki'aab beyyo matta'a «Ki awwaadaanchi Benhadaad haafita issitaa ixxo uttoo'isina uunxoolla» yito'o. Aki'aabim «Ixxi kabad afeebe'em foorinne yoohonnihe? Eehid ihaakkoolas erane! Ka lasage ixxi iina iyyabbaayyisa!» yaa dabarukko.

³³Adil Beenhadaad gassaan haafixxi asso egetta'a hee'llo'i bikkina Aki'aab «Iyyabbaayyo» yukkuuyyi macceesso'i ammanenne eekka aa'lla'a at yittisam Benhadaad hanqinam kiyyabbaayyo!» yito'o. Aki'aabim «I beyyo eebbehe!» yukko. Benhadaadim waaru ammanenne Aki'aab ixxi faraxxi gaarre'enne aagaa afuurona Benhadaada weeshukko.

³⁴Benhadaadim Aki'aabina «Iyyanni kiyyanniisi massu beero'uwwa kiina dabaroommo. Iyyanni Samaare'enne issukkisa atim Damaasqo'onne ki gagina dadda'llitoo beyyo baxaqqiteena xantooto» yukko. Aki'aabim «Eehannata'i ka woshshanne sagara aangumlas anim keese xummam fatakkoommo» yaa dabarukko. Aki'aabim ee'isinne ixxenne maqire sagara aagaa iittamu bikkina xummam marona fatakukko.

³⁵Hiraagaa'n moolliinsi ihoo mat hiraagaanchi Waa'i ijaajinne ixxi beshichchi hee'u mulli hiraagaanchina «Eese aphphise» yukko. Ihukkaarem oo hiraagaanchi ixxo aphphisimma sabukko.

³⁶Ee bikkina oo hiraagaanchi «Waa'i ijaajo wonshimma sabbitti bikkina iinniinsi annanni ikkaa mattittuuyyim mat hobbichchi keese shookko» yukko. Yukkisam ixxeensi annanni ihaa marukkuuyyi hobbichchi dangonnem siidaa shukko.

³⁷Ee lasage oo hiraagaanchi mulli mancho siidaa ixxi beyyonne hincaa «Eese aphphise» yukko. Oo manchim «Ihona» yaa malaayyaamisa aphphisaa madoo'isa issukko.

³⁸Oo hiraagaanchim ixxo la'akkambee'isa horoorenne eddechcha gunguu'llukko. Eeheen higoo Isra'ee'l adila egereena mat gooqqi gammalanne maraa uullukko.

³⁹Ixxim adil ixxi gadaninne higukkuuyyi weeshaa «Adila, an o'l lambe'enne oramummuuyyi hee'ummo. Ee ammanem gaadaaniinsi mat diina'i kolliinsi mat mancho qeefadaa eebaa ‹Ka mancho egere; ihukkaarem ixxi xorukkaa'lleensi ixxi bikkenne at letootto te'im sadee soor kiilo'o ihoo kin bira guzumo'antootto› yukko.

⁴⁰Ihukkaarem iina bax lophphaa kidii ekkidii daba'llamumuuyyim oo manchi xoraa marukko» yukko. Adilim «Ki gaganne oogattitti bikkina at guzumo'anchi hasisookko» yukko.

⁴¹Oo hiraagaanchim illenne gunguu'llaa hee'u eddechcha qaqqisaa hoorukko. Adilim oo manchi hiraagaa'n moolliinsi mat ihukkisa ee ammanem la'ukko.

⁴²Ee lasage oo hiraagaanchi adilina «Waa'i ‹An lehoo'isina oogatummi mancho xoroo'isa issitti bikkina at ixxi bikkenne lehinne guzumo'antootto. Ki gaadaanim ee manchi gaadaan xotta'a mattamisa issito'i bikkina beedditamo› yoolla» yukko.

⁴³Adilim kichche'imminnee nadadimminnee Samaare'enne hee'oo ixxi adilla'n mine daba'llaa marukko.