Read Hadiyya 1Adlilluwwi kitaaba 21 Bible Online

1Adlilluwwi kitaaba 21 - Hadiyya bible

1Adlilluwwi kitaaba 21

¹Naabuute yakkam mat manchi hee'ukko. Ixxim Yizra'eelanne hee'oo adil Aki'aab adilla'n mi'n gadanonne woyina kaasakkam ixxi gaqqi uulli hee'ukko.

²Mat balla Aki'aab Naabuutena «Ki woyi'n kaashshi beyyo iina uwwe. I adilla'n mi'n gadanonnetti ihu bikkina i duubbi kaashshi beyyi issaqqeena hasaammo. Ixxi bikkennem eehanniinsi e'lloo woyi'n beyyo kiina uwwoommo. Biteesseena hassittaarem e'lloo er bito miqoommo» yukko.

³Naabuutem «Ka woyi'n beyyo lago aa'ummok gaassi iyyanno'iinsette; kiina uwwoommisa eekka Waa'im eeboone» yaa dabarukko.

⁴Yizra'ee'l Naabuute «Gaassi iyyanno'iinsi lago aa'ummi uulla fatakoommoyyo» yu bikkina Ahaab nadadaa qacqacukkuuyyi ixxi mine aagukko. Ixxi illem gortanni kollonne dabaraa ara'anne dufukko. Hurbaatam itimma sabukko.

⁵Ixxi meentichcho Eelzaabeelem ixxi gadano hincita'a «Keese ka'isa qaciqacaa'u luwwi maruwwa? Hurbaata ittoobee'ekdu mahinatte?» yita'a xa'mmito'o.

⁶Ixxim «Eese qacqacaa'ukkok Yizra'ee'l Naabuute iina dabaraakkoo dabachcha. Oohim ixxeka woyina kaasu beyyo bitaa'eena te'im hasulas e'lloo beyyo uwweena ixxo xa'mmummaare ee woyina kaasu beyyo ‹Ma'isinnem kiina uwwoommoyyo› yaa eese nadadiisaakko» yaa dabarukko.

⁷Eelzaabeelem «Eehannah at Isra'ee'l adil ikkaa hee'llittuuyyi ka'isa ihimmi kiina hasisoohonnihe? Kaba ki'llaa liiranchinne hurbaata ite; wo'om age. Yizra'ee'l Naabuuteka woyi'n kaashshi beyyo siiddoo'isa issoommo» yito'o.

⁸Ee lasage ise assikura kitaabba'a Aki'aab summinne mare'e issita'a ixxi koobo'inne koobbo'o. Ee askuram Naabuute hee'oo Yizra'ee'l daannuwwi beyyoo lommanni beyyoo asse'llo.

⁹Oo askurim «Mat balli soommano alallaattehe; minaadabam mat beyyonne wixxi'llehe. Naabuutenam minaadaphphi lambe'enne lombi beyyo uwwehe.

¹⁰‹Waa'aa adilaa duumaakko› yitam lam qophpha'n naqaashshuwwa gudissehe; ee lasage Naabuute beero'iinsi tochchonne fissitakka'a kininne aphphissakka'a shi'llehe» yoohan hee'ukko.

¹¹Yizra'ee'l daannuwwii lommannii Eelzaabeele ijaajjo'oka issito'o.

¹²Mat balli soommanom alallaatto'o; minaadabam mateeyyanne wixxaa'llo'o. Naabuutenam lombi beyyo uwwito'o.

¹³Lamem qophpha'n naqaashuwwim ki'lla'a «Naabuut Waa'aa adilaa duumaakko» yita'a minaadaphphi illagenne qophphano naqqasso'o. Ee bikkina ee beero'iinsi tochchonne fissita'a kininne aphphissa'a shito'o.

¹⁴Shita'a lasage «Naabuute kininne aphphisamaa lehaakko» yita'a Eelzaabeel beyyo asse'llo'o.

¹⁵Asse'amaan kurukkisam Eelzaabeele Aki'aabina «Yizra'ee'l Naabuute lehaakko; ee bikkina kaba mattaa kiina biteesimma sabu woyi'n kaashshi beyyo ki gaqqi uulli issitaa aa'lle» yito'o.

¹⁶Aki'aabim Naabuuteka woyina kaasakkam beyyo lago aa'eena ee ammanem ki'aa marukko.

¹⁷Ee lasage Waa'i Tiisbe'i uulli hiraagaanchi Eeliyaasena

¹⁸«Samaare'i uulli adil Aki'aab beyyo mare. Ixxim Naabuut woyi'n kaashshi hee'u beyyo lago aa'ukkuuyyi affootto.

¹⁹An Waa'i ixxena ‹Naabuute shittok hoffe'ukkaare kaba ixxi uulla lago aa'lleenannihe?› yoommoka kure. Odim ‹Wish Naabuut xiiga aallu beyyonne ee'isam ki xiigam aallookko!› yoolla» yukko.

²⁰Aki'aabim Eeliyaasa moo'u ammanenne «I diinakkichcho! Eese siiddituullannihe?» yukko. Eeliyaasim «Eeyya, siidaammo. Waa'i illagenne jor ihu luwwi hundam issimmina ki gaga baaxiilina biteessaatto.

²¹Ee bikkina Waa'i ‹Oono'o, ki hanenne boobana eeboommo; keesem i illagiinsi bi'isoommo. Ki abaroosiinsim goona hundam agishshom ihukko wolabichcho hundam guulloommo.

²²Ki abaroosim Naabaax beet adil Yoorbi'aam abaroosisaa Akiiy beet adil Baa'ish abaroosisaa bichchina gudaakkoohan ihookko. Mashka'oomim Isra'ee'l minaadab baaxiilo baxoo'isa issimminne eese quuqissaatto› yoolla.

²³Eelzaabeelinam ‹Iseka leesha Yizra'ee'l beero'onne wish itookko› yoolla.

²⁴Ki qarmanniinsi beero'i woronne lehookkoka ayyi manchom wish itookko. Hax uullanne lehookkokam ammar itookko» yaa dabarukko.

²⁵Waa'i illagenne jor baxo baximminne ixxi gaga baaxiilina higisaa biteesu Aki'aabi'nnookkok ayyim hee'ukkoyyo. Ee hundam issukkok ixxi meentichcho Eelzaabeele ixxo jollanne awwonsito'i bikkinatte.

²⁶Aki'aab issu jor baxiinsi hundiinsim lophphookkok Isra'ee'l minaadab ixxuwwi gaqqi uulla aaggo'i ammane Waa'i ixxuwwi illagiinsi xoqolaa hollu Amoore'i manni qophpha'n waa'anne otossimma.

²⁷Eeliyaas ee woshsha wocaa guullaa lasonne Aki'aab ixxi gaqqi eddechcha dereeraahii sheelaxxaahii uunjaa lasage xiddi eddechcha edde'ukko. Hurbaatam itimma sabukko. Kichchechchi eddechcha edde'ukkisam iinse'am hee'ukko. Taakke'ukkuuyyim lobakata kichche'immiinsi ki'ukkok illi heemachchaa moo'amam hee'ukko.

²⁸Waa'im hiraagaanchi Eeliyaasina

²⁹«Aki'aab i illagenne ixxi gaga hinkid hofiisukda'e moo'llitonnihe? Ixxi i illaggenne ixxi gaga hoffiisu bikkina foorinne hee'ukkuuyyi ixxonne boobana eeboommoyyo. Ihukkaarem ka yamamu jor luwwa ixxi abaroosanne ihoo'isa issoommok ixxi beet heechchi doollennette» yukko.