Read Hadiyya 1Adlilluwwi kitaaba 22 Bible Online

1Adlilluwwi kitaaba 22 - Hadiyya bible

1Adlilluwwi kitaaba 22

¹Eehanniinsi ki'isaa yoo sas hiinchina Isra'ee'llaannonnee Sooriy lambe'ennee hee'u or uullaa xummi leeraa hee'ukko.

²Ihukkaarem saxxi hiinchonne Yihuxxi adil Yoosaafix Isra'ee'l adil Aki'aaba moo'eena marukko.

³Aki'aab ixxi gassaan ikko'i gassaanina «Gala'aadanne yoo Raamoota Sooriy adiliinsi daballeena matem mikmikaatom issinumbee'ek mahinatte? Raamoot ni uullana'e!» yukko.

⁴Yoosaafixinam «Raamoota qansoommisina iinninne maqire gaaddoohonnihe?» yaa xa'mmukko. Yoosaafixim «An ki'isame; i minaadabim ki minaadaphphisame; i faradim ki faraxxisame.

⁵Ihukkaarem gaassitaa Waa'i doo'lla xa'mme» yaa dabarukko.

⁶Ee bikkina Aki'aab Soor xiibbe ihoo qox hiraagaano weeshaa «Raamoota maraa qasonnii uro?» yaa xa'mmukko. Ixxuwwim «Mattaa qase; Moollannim kiina kaachcha uwwookko» yita'a dabatto'o.

⁷Ihukkaarem Yoosaafix «Waa'ika doo'lla xa'mminoommi mulli hiraagaanchi bee'ennihe?» yaa xa'mmukko.

⁸Aki'aabim «Yimila'i beet Mikiyaasa yakkam mulli hiraagaanchi yookko. Ihukkaarem an ixxo ha'yyoombee'ane. Mashka'oomim ixxi iina ayyi ammanem ihuta'n joriinsi bagaan er hiraago hiraagaa la'ooyyo» yaa dabarukko. Yoosaafixim «Adil eehid yimmi hasisooyyo» yukko.

⁹Ee lasage Aki'aab ixxi adilla'n mi'n gassaaniinsi mato weeshaa «Mikkiyaasa hassaa qaqqisaa keyye waaroo'isa isse» yukko.

¹⁰Ee ammane Isra'ee'llekii Yihuxxekii lamem adilluwwim ixxuwwi adilla'n eddechcha edde'lla'a Samaare'i beero'i ooxxi gooc gadanonne yoo wixxixxi beyyonne ixxuwwi gaqqi adilla'n barcumanne afuutta'a hee'llo'o. Ee ammane hiraagaan hundim adilluwwi illagenne hiraago woccam hee'llo'o.

¹¹Ee hiraagaaniinsim mat hee'u Kanaa'in beet Sedeeqiyaas, Xaariinsi buudduwwa baxaa amadaa Aki'aabina «Waa'i ‹Xaariinsi baxamu ka buudduwwinne Sooriy manna qassaa guullitaa kaa'llootto› yoolla» yukko.

¹²Mulli hiraagaanim ixxi wocukkoka bakkiissa'a «Raamootanne gaade; Waa'i ki anganne higisaa uwwoo bikkina kaa'llootto» yito'o.

¹³Mikkiyaasa weesheena maraa hee'u asse'amaanchim ixxena «Mulli hiraagaan hundichchim mat sagarinne adil Aki'aab kaa'oohan ihukkisa hiraaggo'ookko. Ee bikkina atim ixxuwwisam yitoo'isina keese uunxoommo» yukko.

¹⁴Ihukkaarem Mikkiyaas «An Waa'i iina caakkisookkoka xale'e wocoomman ihukkisa hee'oo Waa'i summinne hide'oommo!» yaa dabarukko.

¹⁵Mikkiyaas adil Aki'aab illaggenne hincukkaare adil «Mikkiyaasa, Adil Yoosaafixii anii Raamoota mallaa qansonnii ullo?» yaa xa'mmukko. Mikkiyaasim «Gaaddaa qase hanqo'isam kaa'llootto; Waa'im kiina kaachcha uwwookko» yaa dabarukko.

¹⁶Ihukkaarem Aki'aab «At Waa'i summinne Hiraaqqi woshsha iina woccoohaare hanqo'i woshsha woce, yaa an kiina mee'i ammane kuroommo?» yukko.

¹⁷Mikkiyaasim «Isra'ee'l minaadab hundim allaaraan bee'i gereebbisa duunnuwwanne binnito'oo moo'ummo. Waa'im ‹Ka minaadabina awwonsaan bee'e. Ee bikkina hundim ixxi gaqqi mine xummanne daba'llona› yaakko» yaa dabarukko.

¹⁸Aki'aabim Yoosaafixina an kiina «Ixxi i bikkina hundi ammanem joriinsi bagaan er hiraaqqi sagara wocooyyo yaa hee'ummoyyonnihe?» yukko.

¹⁹Mikkiyaasim «Oono'o, Waa'i yoo woshsha macceese! Waa'i iimanenne yoo ixxi adilla'n barcumanne afuuraa ixxi asse'amaanim ixxi makkinnee qeddinnee uullito'ookkoka moo'ummo.

²⁰Waa'im ‹Aki'aab Raamoota maraa ee beyyonne lehona ixxo huushiseena xanookkok ayyette?› yukko. Ixxi asse'amaaniinsi mat mat woshsha hincaa'oohaare mullek odim mulli woshsham hincaa'am hee'ukko.

²¹Ihukkaarem lasaanchonne mat ayyaan Waa'i illage hincaa ‹An huushanseena xanoommo› yukko.

²²Waa'im ‹Hinkid issitaa huushisseena xantootto?› yukko. Oo ayyaanim ‹Maraa Aki'aab hiraagaan hundim qophphano woccamisa issoommo› yaa dabarukko. Waa'im ‹Eehid ihukkaa'lleensi mattaa hushise; eehid issimmi kiina xanamookko› yaakko» yukko.

²³Mikkiyaasim «Oono'o, Waa'i ka ki hiraagaa'n suumenne hundaannonnem qophpha'n ayyaana issaakko. Ki hanennem Waa'i hawwo eebeena murte'aakko!» yukko.

²⁴Ee lasage kani'aan beet Sedeeqiyaas Mikkiyaas kolli hincaa oobo'inne aphphisaa «Hinki ammaniinsette ku Waa'i ayyaan eese uraa higaa keese atoorassukkok?» yukko.

²⁵Mikkiyaasim «Duubbonne yoo koshanne mattaa maaxamtoo ammane moo'llootto» yaa dabarukko.

²⁶Ee ammanenne adil Aki'aab gaaxxi awwonsaaniinsi matina «Mikkiyaasa amade! Ka beero'i gassaanchi Amoon beyyoo adi'l beet ihu Yoo'aash beyyoo masse.

²⁷Anim xummanne daba'lleembe'i afeebe'e karaxxi minenne aagisakka'a gogaalli injeeraa wo'oo xale'e uwwakku'uuyyi afuuroo'isa issakamisina i summinne kure» yaa ijaajukko.

²⁸Mikkiyaasim «At xumminne daba'llittaa'lleensi Waa'i i kollinne wocukkoyyo yimma!» yukko. Odim sagara shiqaa'aa «Ka beyyonne yoontakke'i minaadab hundim an wocummoka hundam qoossitakka'a macceessehe!» yukko.

²⁹Ee lasage Isra'ee'l adil Aki'aabii Yihuxxi adil Yoosaafixii gala'aaxxi uullanne yoo Raamoot beero'o qasseena gaaddo'o.

³⁰Aki'aabim Yoosaafixina «Orina malleena ki'nnoommi ammane an mulli mancho labaa moo'ameena mulli eddechcha edde'oommo. Ihukkaarem at adilla'n eddechcha edde'e» yukko. Ee bikkina Isra'ee'l adil Aki'aab mulli eddechcha edde'aa ixxi gagooma la'isoobee'isa ihaa gaadukko.

³¹Sooriy adil «Isra'ee'l adila Aki'aaba annanni issitakka'a qassehe bagaan mulli manna matom qassakkotte» yaa sadinnee lam faraxxi gaarre'uwwinnee oramoo gaaxxi awwonsaano ijaajaa hee'ukko.

³²Ee bikkina adil Yoosaafixa moo'llo'i ammanenne Isra'ee'l adila labu bikkina ixxo qasseena kibbito'o. Ihukkaarem laarukkuuyyi macceesso'i ammanenne

³³ixxi Isra'ee'l adil ihubee'isa qoossita'a ixxo qassoo'nnim utto'o.

³⁴Ihukkaarem dongonnem mat Sooriy gaadaanchi xiyya tokkosaa adil Aki'aaba o'l eddechchi edamoo beyyinne qasukko. Adil Aki'aabim faraxxi gaarre'e ushe'oohaannina «An mada aa'aammo! Ee bikkina ka faraxxi gaarre'e laso dabattaa ka qasanchi beyyiinsi tochchonne fisse!» yaa ijaajukko.

³⁵Or iibbamu ammanenne adil Aki'aab Sooriy manni illagenne faraxxi gaarre'enne bakke'aa hee'ukko. Madiinsi firoo xiigim ee faraxxi gaarre'enne dunamaa hee'ukko. Ee ayyaamom maaro'i ballanne lehukko.

³⁶Eelliinchi aageena hofqax ammanim gataakkoohaannonne «Manni annannichchim ixxi gaqqi uullaa ixxi gaqqi beero'oo daba'llaa marona» yoo ijaaj Isra'ee'l gaadaa'n awwonsaaniinsi kuramukko.

³⁷Adil Aki'aab eehido'isinne lehukko. Ixxi leesham Samaare'e massakka'a waammakko'o.

³⁸Ixxi afuuraa hee'u faraxxi gaarre'em Samaare'enne yoo wo'i delbanne aanshakko'o. Waa'i wocaa hee'u hiraaqqisannem ixxi xiiga wish aallukko. Odim ee wo'i delbannem buubbeesaan aanshaqqito'o.

³⁹Adil Aki'aab issu luwwi hundim adilla'n mine daane'i inqinne wereeggisaa baxukkisii baxisu beero'uwwi duuha'ii hundim Isra'ee'l Adilluwwi Aganni Kitaabanne kitaabamaakko.

⁴⁰Adil Aki'aab lehu bikkina ixxi beyyonne ixxi beet Akaaziyaas adil ihukko.

⁴¹Isra'ee'l adil Aki'aab adillano aa'u Soo'l hiinchonne Asa'i beet Yoosaafix Yihuxxi adil ihukko.

⁴²Ixxim ixxek umur sadee onti hiinchoo ihaakkoohaannonne adillano aa'aa lamiyyee onti hiinchoo Yerusaaleemanne afuuraa gassukko. Ixxi amam Azuubaa yakkamotan ikka'a Shiiliih landichchotte hee'llo'o.

⁴³Yoosaafix ixxeensi illageen hee'u Asa'asa Waa'i illagenne eran ihu luwwa hundam issukko. Ihukkaarem Waa'a laqqambee'i minaadab otossitam beyyo gindukkoyyo. Ee bikkina oo minaadab ee beyyuwwanne kitima hincaa'immaa aduruusa wiriissimmaa utto'oyyi hee'llo'o.

⁴⁴Yoosaafixim Isra'ee'l adilinne iittamaa hee'am hee'ukko.

⁴⁵Yoosaafix issu luwwii oranne moo'isu geedoommanii hundim Yihuxxi Adilluwwi Aganni Kitaabanne kitaabamaakko.

⁴⁶Ixxi anni Asa'i adilla'n doolliinsi ki'isaa gatu keeno Waa'a laqqambee'i minaadab otossitam beyyonne goon gooninne meentim meentinne saa'llam goonaa meentoo hundam bi'isukko.

⁴⁷Ee doollenne Eedoo'm uullina ixxi gaqqi adil hee'ukkoyyo. Eehanniinsi ki'ukkok Yihuxxi adil doo'llu gassaan gassam hee'ukko.

⁴⁸Adil Yoosaafix Cambalaqanne matta'a Oofiraa yakkam beyyiinsi worqa eebbam markabbuwwa baxisaa hee'ukko. Ihukkaarem oo markabbuwwi Eexiyoon Gaabiiraa yakkam beyyonne iiqamukko bagaan mareena xanukkoyyo.

⁴⁹Ee lasage Isra'ee'l adil Akaaziyaas ixxi markaba ushe'llam keen Yoosaafix markaba ushe'llam keeninne maqire baxxamisina sawwite hincaa'aa hee'ukko. Ihukkaarem Yoosaafix ixxeka sawwite aa'ukkoyyo.

⁵⁰Adil Yoosaafix ixxi anno'isam lehukko. Daawiit beero'onne hee'oo adilluwwa waammakkam beyyonne waammamukko. Ixxi beyyonnem ixxi beet Yooraam adil ihukko.

⁵¹Yihuxxi Adil Yoosaafix Adil ihu tommonnee lama'l hiinchonnee Aki'aab beet Akaaziyaas Isra'ee'l adil ihukko. Ixxi heechchi beyyom Samaare'i beero'onnette issaa lam hiincho gassukko.

⁵²Ixxim ixxi anni Aki'aabika, ixxi ama Eelzaabeelekaa ee'isam Isra'ee'l minaadab hundam baaxiilonne awwonsu adil Yoorbi'aamikaa jor kobi'llato awwonaa Waa'i illagenne baaxiilo baxukko.

⁵³Ixxeensi illageen hee'u ixxi annisam Ba'aala yakkam qophpha'n waa'ina otossimminnee awwaadimminnee Isra'ee'l Moollanni Waa'a quuqisukko.