Read Hadiyya 1Adlilluwwi kitaaba 3 Bible Online

1Adlilluwwi kitaaba 3 - Hadiyya bible

1Adlilluwwi kitaaba 3

¹Salamoon Gibxi uulli adi'l landichcho eebaa ee adilinne maqire qarooma amadukko. Isem adilla'n mine, Keesammi Minee Yerusaalee'm beero'i kululleexxi ootaa baxaa guulleebe'e Daawiit beero'onne dissukko.

²Ee ammane Keesammi Min baxamoo'nnim hee'ukko. Eehanniinsi ki'ukkok duunnuwwanne kitima hincaa'akkam hee'akko'o.

³Salamoonim Waa'a iittam hee'ukko. Ixxi anni Daawiit uwwu gassi awwonsam egeram hee'ukko. Ihona bagaan diinate kitimukkuuyyi annanni annanni duunnuwwanne kitima hincaa'amii aduruusam wiriissamii hee'ukko.

⁴La'amaakkoo kiti'm beyyi Gaba'oonanne hee'u bikkina mat balla adil Salamoon kitima hincaa'eena ee beyyo marukko. Illageenim ee beyyonne mat kum diinate shokkiisakka'a hincaa'akkam kitima kitimaa hee'ukko.

⁵Waa'i ee hiimo Gaba'oonanne Salamoonina haqaawwonne moo'amaa «Kiina maha uwwona hassootto» yaa xa'mmukko.

⁶Salamoonim «Ki awwaadaanchi hee'u iyyanni Daawiit erane, ama'nnamaakoohannee xabbeen manchoo ihu bikkina qoxxaalli ki iitto ixxena mo'issaa hee'llitto. Kaballam ixxi beyyonne ihaa adilla'n barcumanne afuuroo beeto uwwimminne lophphaakkoo qoxxaalli ki iitto ixxena moo'issaatto.

⁷Kabadem i Moollanni Waa'a! Oono'o, an ooshshichcho. Manna gassimikim losan iina bee'e. Ihukkaarem at eese iyyanni adillano aa'oommisa issitaatto.

⁸Oono'o, an ki awwaadaanchi yoommok xigakkeena xanakkambee'i at doo'llitti lophphaakkoo ki minaadaphphi lambe'ennette.

⁹Ee bikkina joraa erokaa annanni issaa ki minaadaphpheka hanqo'i oogato egeraa gassimma xanoommisina qoorooma uwwe; eehid ihubee'aa'lleensi ka ki haraar minaadaba hinkid gasseena xanoommo?» yukko.

¹⁰Salamoon eekka uunxu bikkina ookki Waa'a liiransukko.

¹¹Waa'im «Ki gagina qeeraa'l umuraa goddaa siiddeena te'im ki diina'i bi'oo'isina uunxittoyyo. Ihukkaarem gudaanchi hanqa egerimminne gassiteena qoorooma xa'mmitti bikkina

¹²oono'o, ki xa'mmichchisanne issoommo; hore'oomam ayyi manchim kanniinsi illageen siidukkaanniinsii ka lasagem siideena xanoohaanniinsii hanaan lophphaakkoo lachchaa qooroomaa kiina uwwoommo.

¹³Odim adilluwwiinsi ki'isa ihookkok ayyim hee'oobee'isa at uunxitbee'i goddaa lombaa hundam kiina uwwaammo.

¹⁴Kiyyanni Daawiit issukkisa iina ijaajantittaa'lleensi i seeraa i ijaajoo egettittaa'lleensi i googonnem mattiittaa'lleensi kiina qeeraa'l umura uwwoommo» yukko.

¹⁵Salamoon diriiriinsi baqaa ki'aa Waa'i haqaawwonne moo'amaa ixxo atoorassukkisa la'ukko. Eehanniinsi lasage Salamoon Yerusaaleema daba'llaa waaraa Waa'i Hidi'l Saga'l Saaxi'n illagenne uullaa shokkiisakka'a hincaa'akkam kitimaa mateeyyoo'm kitimaa Waa'ina hincaa'ukko. Ee lasage ixxi awwaadaan ikko'i gassaanina hundinam maadda issukko.

¹⁶Mat balla lam buubbeesaan waatta'a Salamoon illagenne uullito'o.

¹⁷Ee keeniinsim mate «I moollanna, tu meentichchoo anii mat minenne maqirem hee'nnummuuyyim an beeto qarummo.

¹⁸An qarummi saxxi ballanne isem goonchi beeto qatto'o. Ee minenne odim iinniinsii iseensii bagaan mullek matim hee'ukkoyyo.

¹⁹Mat ayyaamo hiimonne is ciil hanenne iinse'llo'aare lehukko.

²⁰Isem ee hiimom i ciilichcho qaaphphaa an iinse'ummi beyyiinsi massita'a is ara'anne iinsiissa'a iseka lehu ciilichcho i ara'anne i gadanonne iinsiisso'o.

²¹Daram ki'aa i ciilichcho anuuna iiciseena moo'ummi ammanenne lehaa hee'ukko; ihukkaarem da'l caakkanne qoossaa moo'oommaare i ciilayyi hee'ukko» yito'o.

²²Ihukkaarem oo la'm meentichcho «Ee'isayyo foorinne yoo ciilichchii iihane lehukokii kiihane› yito'o. Luxxete odim «Ee'isayyo lehu ciilichchii kiihane ihukaarem foorinne yookkok iihane» yito'o. Ee'isa yaqqantu'uuyyi adi'l ellagenne lamim fitanto'o.

²³Ee lasage adil Salamoon «Tute ‹Foorinne yookkok i beeto; oo lehukkok ki beeto› yitamuulla. Ottem odim ‹Ee'isayyo, ki beet lehaakko; ku foorinne yookkok i beeto!› yitamuulla» yukko.

²⁴Adilim bisa'a eebakkona ijaajukko. Bisa'a eebakko'aarem

²⁵«Kaba ee fooraam ciila lam beyyo muttakka'a lamenam kolli kollo uwwehe» yaa ijaajukko.

²⁶Ihukkaarem hanqo'i amatte ikko'ote is ciilichchina qishixxita'a «Adila! Hay i beeto shititte; isena uwwamona!» yito'o. Ihukkaarem mullete odim «Iinam isenam ihoone; lam beyyonne muramona!» yito'o.

²⁷Ee lasage adil Salamoon «Kaba ciila shitakkotte; hanqo'i ama isette ikko'i bikkina luxxi meentichchona uwwehe!» yaa ijaajukko.

²⁸Isra'ee'l minaadab ee danaamisa oogatu woshsha macceesso'i ammanenne Salamoona lophphaakkoo lomba uwwimminne lonsito'o. Mashka'oomim minaadabina hanqo'i oogato uwwoo qoorooma Waa'iinsi siidukkisa laqqo'i bikkinatte.