Read Hadiyya 1Adlilluwwi kitaaba 4 Bible Online

1Adlilluwwi kitaaba 4 - Hadiyya bible

1Adlilluwwi kitaaba 4

¹Adil Salamoon Isra'ee'l minaadabina hundinam adil ihukko.

²Ixxi doo'llu gassaanim, Saadooq beet Azaariyaas qeessichcho,

³Shiisha'i oos hee'llo'i Eelihooreefii Akiiyi Adi'l mi'n kitaabaano, Ahiiluud beet Yoosaafix Aganna kitaabaanchoo doono'i mi'n daannaa.

⁴Yoodaa'i beet Baanaay gaaxxi awwonsaancho; Saadooqii Abiyaataarii qeessuwwa;

⁵Naataan beet Azaariyaas zoo'n gassaanina awwonsaancho; Naataan beet qeessichchi Zaabuud adilina sogaanchoo kobichchoo.

⁶Ahiishaar adi'l mi'n awwaadaa'n ijaajaancho; Abiid beet Adooniiraam malaayyi baxaano ijaajaancho hee'llo'o.

⁷Adil Salamoonina Isra'ee'l uullanne hundannem tommii lam gassaanii hee'llo'o. Ixxuwwi baxim adil gassoo uulli hundiinsim adilinaa adi'l mi'n abaroosinaa hurbaata hincaa'immi hee'ukko. Oo gassaan annannichchim mat hiinchina matoom mat aganina hurbaata hincaa'am hee'ukko.

⁸Ka tommikii lamem zoo'n gassaa'nnekii ixxuwwi gassitam zoo'nnekii summuwwi Beenihuur duunaam Efiree'm uulli gassaancho

⁹Maaqaaxa, Shaa'aalbiima, Beetisheemeesha, Eeloonaa Beet hanaa'n beero'uwwaa gassaanchi Bendeeqaaratte;

¹⁰Aruboota, Sookko'i beero'uwwaa ee'isam Heefeer gassi uulli hundamii gassaanchi Beeniheeseedatte;

¹¹Kitaabaate yamanto'i Salamoon landichcho eebu Been Aminaadaab Door uulla hundam gassam hee'ukkok;

¹²Ahiiluud beet Ba'aan Taa'inaakikii Magiido'i beero'uwwa, ee'isam Beetishaa'n gadanonne yoo gassi uulla hundam, Xaaritaa'n beero'i gadanonne yoo uullaa Yizra'ee'l beero'iinsi woroo'n qarinne yoo uullaa ee'isam Aabeelmahoolannee Yooqima'aa'm beero'uwwannee afeebe'e yoo uulli hundinam gassaanchi hee'ukko.

¹³Geebeer beet Ben Gala'aadanne Raamoot beero'o, Gala'aadanne Minaas shumo'ika Yaa'iir moollina amaxxi ihu hegeegguwwa, Baasaannanne Argobba yakkam uullaa ee'isam gooccuwwina Naas qirqire'i yoo kininne baxamaakkoo giribuwwi yoo lohayyi lob beero'uwwaa gassaanchi hee'ukko.

¹⁴Iido'i beet Ahiinaadaab Mahanaayi'm uulla gassaanchi hee'ukko.

¹⁵Salamoon landichchona Baasimaatena aro'i Ahiima'aax Niftaalee'm uulli gassaanchi hee'ukko.

¹⁶Aaseer uullaa Ba'aaloot beero'oo gassaanchi Huushaay beet Ba'aanatte hee'ukko.

¹⁷Faaruh beet Yoosaafaax Yisaakoor uulla gassaanchi hee'ukko.

¹⁸Eela'i beet Saami'i Biiniyaam uulli gassaanchi hee'ukko.

¹⁹Amoore'i adil Siihoonii Baasaa'n adil oogii gassitam hee'llo'i Gala'aaxxi uulli gassaanchi Uur beet Geberatte hee'ukko. Ee uullanne hundoomannem ka tommoo lamem gassaanom ijaajoo mat lob gassaanchi hee'ukko.

²⁰Yihudikii Isra'ee'l minaadaphphekii fikkaanni dambalaq shashsha'llisa hee'ukko; Oo hundim ittu'uuyyii agu'uuyyii amman hundam liirantam hee'llo'o.

²¹Salamoon gassoo uullim Efiraaxiis daajjiinsi ki'isaa Filisxee'm uulli afeebe'e; eeham higaa Gibxi uulli gabal afeebe'e yoo uulli hundam edam hee'ukko. Ee uulli minaadab hundim Salamoon hee'u doollenne hundannem ixxena ijaajanta'a gibittam hee'llo'o.

²²Salamoonina ballina ballina ihoo hurbaata onti kum kiilo'o ihoo qax doo'l qam, tommi kum kiilo'o kora'i qama

²³tommi xiikkammi mirgo'uwwi, kuturanne hosoo lamiyyi lijjuwwi, mat xibbi gereebbi, ee'isam gaalli, gibbi, kukkussii doo'l antabaa'ii hasisam hee'ukko.

²⁴Salamoon Efiraaxiis daajjiinsi eelliinchi aagginne yoo uulla hundam Tifisaah beero'iinsi ki'isaa Gaaza'i beero'onne afeebe'e gassam hee'ukko; oohim Efiraaxiis daajjiinsi eelliinchi aagginne hee'oo adilluwwa hundam edoohane. Ixxi olla'i ihu uulluwwinne hundinnem xumminne hee'am hee'ukko.

²⁵Hee'u doollenne hundannem Daaniinsi ki'isaa Bersaabe'i afeebe'e Yihuxxekii Isra'ee'l minaadabii hundim matem kichchechchi bee'em xumminne hee'ukko. Hundem mi'n abaroosinam ixxi gaqqi woyi'n xudii misha itakkam oda'ii hee'u bikkina ee duubbi kaashshuwwi hafanne usheexxam hee'ukko.

²⁶Salamooninam faraxxi gaarre'e gosaasoo sor kum soorammi faradii tommii lam kum orina awwaadoo faradii hee'ukko.

²⁷Salamooninaa ixxi adilla'n minenne hurbaata ittam manninaa hundinam hasisoo hurbaata hincaa'llam tommikii lamem uulli gassaanii annannichchim ixxuwwina uwwamu agananne maham xa'issoo'n ammaninne eebbam hee'llo'o.

²⁸Eehan xale'i ihoo'n gassaan annannichchim hasisoo'isinne so'oo gaabaa gaarre'e gosaasimminaa mulli awwaadinaa ihoo faradina hurbaat ihoo'isina eebbam hee'llo'o.

²⁹Waa'i Salamoonina lobakata maalalsiisoo qooroomaa qoossimmaa ee'isam tungi bee'i lachchaa uwwukko.

³⁰Salamoon eelliinchi firinne yoo uulli manniinsii Gibxi uulli qoolluwwiinsii loboka lachchaam hee'ukko.

³¹Ixxi manniinsi hundiinsim lophphoo qooroom uwwamaakkoo manchi hee'ukko. Odim Yizra'ee'l Etaaniinsi, Maahool oos hee'llo'i Heemaaniinsi, Kaalkooliinsii Daarda'iinsii lophphoo qoor hee'ukko. Ixxi sad hegeeqqi uulli hundannem lobakata la'amukko.

³²Ixxim sas kum kobi'llishshuwwaa mat kumaa onti mazmuuraa kitaabukko.

³³Salamoonim haqquwwi bikkina Liibaanoos digibiinsi ki'isaa kininne baxamu mi'n hanenne mutoo hoffi mutaancha'i afeebe'e kobi'llisukkuuyyi wocaakko. Ee'isam annanni annanni diinattuwwi bikkina, cii'uwwi bikkina, biqinne shurukkuuyyi maroo qooccanchuwwi bikkinaa qurxumme'i bikkinaa wocaakko.

³⁴Uullanne hundannem hee'llo'i adilluwwi Salamoon qooroo'm bikkina macceessa'a ixxeensi qoorooma macceessona manna asse'llam hee'llo'o.