Read Hadiyya 1Adlilluwwi kitaaba 5 Bible Online

1Adlilluwwi kitaaba 5 - Hadiyya bible

1Adlilluwwi kitaaba 5

¹Xiiroos adil Kiiraam Daawiitinne maqire ixxi gassoo doollenne hundannem iitti manchi hee'u bikkina Salamoon ixxi anni Daawiit bikkenne adil ihukkisa macceesaa ixxi beyyo manna asse'ukko.

²Salamoonim Kiiraam beyyo

³«Iyyanni Daawiit ixxi kululleetanne yo'i diina'i uulluwwi gogotinne hundinnem oramukkuuyyi hee'ukkisa at ki gagim laqqootto; diina'a kaa'oo'isa isseebe'i ixxi Moollanni Waa'ina Keesammi Mine baxeena xanubee'isa laqqootto.

⁴Ihukkaarem kaba i Moollanni Waa'i i uulli kululleetanne hundannem xumma uwwaakko. Matem hawwom afisoo diina'i bee'e.

⁵Waa'i iyyanni Daawiitina ‹Ki lasonne adillano uwwoom ki beet iina otossakkam mine baxookko› yaa neeyyataa hee'ukko; eehanniinsim ki'ukkok i Moollanni Waa'ina otossakkam mine baxeena kaba murte'aammo.

⁶Ee bikkina digiphphi haqqa muroo manna ki manniinsi Liibaanoos kolli asse'e; i mannim ki manninne maqire baxxamisa issoommo; ki manninam at qoodditti diinate miqoommo; at laqqoo'isam i manni haqqa murimma ki mannisa laqqamoyyo» yoo asso asse'ukko.

⁷Kiiraamim Salamoon assi afu ammanenne lobakata liiramaakka «Ixxi beyyonne ihaa ka lob minaadabanne adil ihoo'isina ka laboo qoor beeto Daawiitina uwwu Waa'i galaxxamona!» yukko.

⁸Ee lasage Kiiraam Salamoonina «Iina asse'llitti assi afaakko. Ee bikkina at hassoo luwwi hundam isseena an gudaammoohane; digiphphekaa hoo'mmekaa gudeelluwwa gudisaa kiina hincaa'oommo.

⁹I mannim ee gudeelluwwa Liibaanoosiinsi dambalaq afeebe'e dilliissamo; mateeyyannem mat issita'a katta'a at doo'llitti dambalaq tochchi afeebe'e chabbaa afoo'isa issitamo. Ee beyyonnem eekka titta'a dilliissa'a ki mannina uwwitamo. Atim ki kollinne i adilla'n minenne hee'oo mannina hurbaata asse'imminne i mixa'nneka wonshitootto» yoo asso asse'ukko.

¹⁰Ee'isa issimminne kiiraam Salamoonina hasisoo digiphphekaa hoo'mmekaa gudeelluwwa hincaa'ukko.

¹¹Salamoonim ixxi kollinne Kiiraam adilla'n minenne yo'i mannina ittam hurbaata lamiyyi kum kuntaal arasaa soor xibbi kum liitir muccur wee'l zaytaa hiinchi hundam uwwam hee'ukko.

¹²Waa'i illageen kurukkisam yu hidi'l sagara egerimminne Salamoonina qoorooma uwwukko. Kiiraam lambe'ennee Salamoon lambe'ennee xummi hee'ukko. Lamim hidi'l sagara aago'o.

¹³Adil Salamoon Isra'ee'l minaadabiinsi hundiinsim malaayyi baxaa'nneka sad kuma doo'llukko.

¹⁴Ixxuwwannem Adniiraamaa yakkam mancho daanni issaa doo'llukko; ee baxaanom tommi tommi kum issaa sas beyyonne baxxansaa ee tuuttuwwam korinne korinne mat agana Liibaanoosanne baxxamisa lam agana odim minenne usheexxitamisa issukko.

¹⁵Adil Salamoon duunaam uullanne kina anitam keeno sadeentayyi kuma, anamu kina gugguttam keeno lamarayyi kuma gudisukko.

¹⁶Ee mannika hanaan ikka'a baxo egettam sas kumaa sas xibbi mannaa gudisukko.

¹⁷Oo baxaanim adil Salamoon ijaajinne ee Keesammi Mine baximmina ihoo shooto'ina geejji geejji kina anto'o.

¹⁸Salamoonikii Kiiraamikii anga qoor baxaanii Biibiloos mannii ee Keesammi Mine baxakkam kinaa haqqaa cabbatta'a gudisso'o.