Read Hadiyya 1Adlilluwwi kitaaba 6 Bible Online

1Adlilluwwi kitaaba 6 - Hadiyya bible

1Adlilluwwi kitaaba 6

¹Isra'ee'l minaadab Gibxi uulliinsi fitto'i soor xiibbiinsii sadeentayyi hiinchiinsii lasage Salamoon Isra'eelanne adil ihu soo'l hiinchonne «Ziifa» yakkam la'm agananne Waa'ika Keesammi Mine baximma asheerukko.

²Adil Salamoon Waa'ina baxu mi'nnek woro'l kollinne yoo qeeraa'lloom lohayyi anga, dufaachchoom lamiyyi anga, uullichchoom sad anga hee'ukko.

³Keesammi Mi'n barandik dufaachchi ee Keesammi Mi'n dufaachchisam lamiyyi anga, haraaroomim tommi anga hee'ukko.

⁴Ee Keesammi Mininam wororinne haraaraa bii'l kollinne xuqqaakkoo maskoottuwwi hee'ukko.

⁵Ee Keesammi Mi'n gorte'enne hincaa'aa Keesammiinsi Keesammi beyyi kululleetanne annanni annanni baxxanchuwwi yoo mine baxukko.

⁶Ee mi'nnek woroo'n fooq dufaachchi onti anga, la'm fooqik loh anga, saxxaannikim lamar angi hee'ukko. Fooq min baxamu farashshaano Keesammi Mi'n gorte'e hawwodoobee'isa bii'l kollinne bella uullisukko.

⁷Oo Keesammi Min baxamu kinneewwim cabbaramaa gudukkok ee kina anakko'i beyyonnettem hee'ukko. Ee bikkina oo Keesammi Min baxamukkuuyyi fanxiizik, heexxek te'im mulli xaa'llek sagar macceesamam hee'ukkoyyo.

⁸Exxaa baxamu mi'n woroo'n fooqa aagakkam gooc siidamookkok Keesammi Mi'n woroo'n qa'l kollinnette hee'ukko. Ixxom la'mmaanninnee saxxi fooqinnee maqire edansoo gardabbuwwi baxamaakkoohan hee'ukko.

⁹Ee'isinne Salamoon Keesammi Mine baxaa guullukko. Iimanem woro'l kollinne digiphphi haqqinne baxaa eekka xarbinne ifiisukko.

¹⁰Fooqquwwik uullichchi annannichchikim onti onti anga ihoo minneewwa bii'l kollinne Keesammi Mi'n kululleetanne hundannem baxukko; ee Minennem edaa diggiphphi haqqinne amaxxansukko.

¹¹Waa'im Salamoonina

¹²«I seera, ijaajoo gatti ogoraa hundam egettilas kiyyanni Daawiitina uwwummi neeyyaxxi sagara kiina qoxxisoommo. I minaadab Isra'ee'l lambe'ennem ihaa at baxxoo ka Keesammi Minenne hee'oommo. Isra'eeliinsim hore'em annanni ihoommoyyo» yukko.

¹⁴Ee'isinne Salamoon Keesammi Mine baxaa guullukko.

¹⁵Ee Keesammi Mi'nnekim gortanni woro'l kollinne gaxiinsi ki'isaa iiman afeebe'e digibiinsi cabbaramaa axisamu xarbinne goolabamaakkoohan hee'ukko. Odim gaxanne dahamu xarbim hoomiinsi baxamaakkoohan hee'ukko.

¹⁶Keesammiinsim keesamma yamamoo mat woro'l baxxanchi ee Keesammi Miniinsi afaree'n kollinne woronne aagaa baxamukko. Ixxekim qeeraa'lloom lamiyyi anga hee'ukko. Odim gaxiinsi ki'isaa iiman afeebe'e digiphphi haqqiinsi cabbaramaa baxamu xarbinne baxamaakkoohan hee'ukko.

¹⁷Keesammiinsi keesammi beyyi illagenne yoo keesammi baxxanchik qeeraa'lloom sor anga hee'ukko.

¹⁸Oo digiphphi xarbuwwim fiit quuxaa haareechcho fiitu fiitaa kobi'llimminne wereeggaakkoohane. Woro'l kolli hundim digiphphi haqqiinsi cabbaramaa baxamaakkoo xarbinne eddeesamu bikkina ee Mi'n gorte'ik kin moo'amam hee'ukkoyyo.

¹⁹Keesammi Mi'n woronne afaree'n kollinne Waa'ik Hidi'l Saga'l Saaxin afuuroo woro'l kosh baxamukko.

²⁰Oo Keesammiinsi keesammi woro'l koshik qeeraa'lloom lamiyyi anga, haraaroomim lamiyyi anga, uullichchoomim lammiyyi angi ihaa hundim muccur worqinne goolabamma. Kiti'm beyyim cabbaramaa axisamaakkoo digiphphi haqqinne goolabamaa hee'ukko.

²¹Salamoon Keesammi Mi'nneka wororooma muccur worqinne eddeesukko. Ixxim worqinne eddeesamu woro'l mine aagakkam gooca worqinne baxamaakkoo chimchiminne wereeggisukko.

²²Ee Keesammiinsi keesammi kosh woronne yoo kiti'm beyyom edaa Keesammi Mi'nneka woro hundam worqinne goolabukko.

²³Ee Keesammiinsim keesammi beyyonne uullichchoom tommi anga ihoo weerinne lam kiruubeel misilluwwi baxukko.

²⁴Oo kiruubbuwwim hundemisinnem gudaan hee'llo'o. Lamem kiruubbuwwinam lam lam lad hee'ukko; ee ladduwwik annannichchikim qeeraa'lloom onti onti anga hee'ukko. Mat laxxi ludiinsi mulli laxxi ludonne afeebe'e keenakkamaare tommi anga hee'ukko.

²⁶Mat kiruubee'l uullichchim tommi anga hee'ukko; la'mmekim ee'isa hee'uko.

²⁷Oo kiruubbuwwim Keesammiinsi keesammi beyyonne uulloo'isa issakko'o. Ee bikkina oo biddiqu lamem laadduwwim ee kosh lambe'i beyyonne edanta'a mulli lamem ladduwwim ee'isam biddiqito'i kollinne mi'n gortanna nakkitam hee'llo'o.

²⁸Ee lamem kiruubbuwwannem worqa goolabukko.

²⁹Ee Keesammi Mi'n kululleetaa woro'l koshshuwwaa kiruubee'llaanninne, dinbaaphphaanninnee fiit misilinnee wereeggisukko.

³⁰Woro'l koshikii bii'l koshikii aaxxagguwwi worqi goolabamaakkoo keen hee'ukko.

³¹Weeriinsi baxamu lam kollinne fooqoo gooc Keesammiinsi keesammi beyyo aagakkam goocanne baxukko; goocoomim onti midaad yoohan ihaa horoo'l kollinne xabbaa baxamaakkoo mutur hee'ukko.

³²Lamem wee'l gooccuwwam kiruubbuwwinnee dinbaabinnee fiit gurumbi kobi'llanne axisukko. Gooccuwwa, kiruubbuwwaa dimbaaphphi misilaa worqinne goolabukko.

³³Ee'isam ee lob kosha aagakkam goocina weeriinsi baxamaakkoo soor midaad guban hee'ukko.

³⁴Lamem gooccuwwam hoominne baxukko; oo goccuwwi lam qinxoohan ihaa maaxafe'inne amaxxansamaakkoohan hee'ukko.

³⁵Oo keen hundim worqi goolabamaa kiruubeelinne, dinbaabinnee fiit kobi'llinnee wereeggisamaa hee'ukko.

³⁶Ee Keesammi Mi'n illagenne wororinne mat wixxixxi beyyo baxukko. Ee wixxixxi beyyi kululleetannem sas madada cabbaramu kininne mat madadam digibiinsi cabaramaa baxamu xarbinne baxukko.

³⁷Ka Keesammi mi'nnekim shooto'i baxamukkok Salamoon adil ihu soo'l hiinchonne Ziifa yakkam la'm aganannette hee'ukko.

³⁸Salamoon adil ihu tommonnee mat hiinchonnee «Buul» yakkam sadeenti agananne ee Keesammi Mi'nnek bax beeddookko yakka'a qoodakko'isanne baxamaa beeddukko. Adil Salamoon ee Keesammi Mine lamar hiinchonne baxaa guullukko.