Read Hadiyya 1Adlilluwwi kitaaba 8 Bible Online

1Adlilluwwi kitaaba 8 - Hadiyya bible

1Adlilluwwi kitaaba 8

¹Ee lasage adil Salamoon Hidi'l Saga'l Saaxina Daawiit beero'i ihu Xiyooniinsi worimminaa ee baxu Keesammi Minenne aagisimminaa Isra'ee'l sulli lommannaa moolli awwonsaanoo hundam ixxi hee'oo Yerusaaleemanne wixxaa'ukko.

²Isra'ee'l minaadaphphek goo'n oos hundim daas uguda lonsakkam Iitaaniimaa yakkam lama'l agananne adil Salamoon beyyonne wixxito'o.

³Isra'ee'l awwonsaan hundim wixxito'i ammanenne qeessuwwi Hidi'l Saga'l Saaxina ki'issa'a iyyito'o.

⁴Keesammi Minennem aagisso'o; ee'isam Leewi'i sullii qeessuwwii Keesammi Dukkaanaa ee woronne hee'u keesammi mu'utaa hundam eebba'a Keesammi Mine aagisso'o.

⁵Adil Salamoonii Isra'ee'l minaadab hundim Hidi'l Saga'l Saaxi'n illagenne wixxito'o; dutimmiinsi ki'ukkok xigakkeena xanakkambee'i lobakat gereebbaa moolluwwaa kitimina hincaa'llo'o.

⁶Ee lasage qeessuwwi Hidi'l Saga'l Saaxina iyyita'a Keesammi Minenne aagissa'a ee Keesammuwwiinsi Keesammi beyyonne kiruubeel laxxi lugumonne ixxena gudu beyyonne dissito'o.

⁷Biddiqu kiruubeel laddeewwim Hidi'l Saga'l Saaxinaa ee Saaxina iyyakkam wonnannuwwaa ifiisaa hee'ukko.

⁸Oo wonnannuwwim qeeraa'lluwwi ihu bikkina ixxuwwik lud ee Keesammi Mi'n woronne Keesammuwwiinsi Keesammi beyyi illagenne uulloo manchi hundinam erisa moo'amam hee'ukko. Ihukkaarem mulli kollinne uulloo manni moo'ooyyo. Oo wonnannuwwim kaballi afeebe'e ee beyyonnem yookko.

⁹Isra'ee'l minaadab Gibxi uulliinsi fitto'isam Waa'i ixxuwwinne maqire hidiro aagu ammane Muse'e Siina'i duunanne Hidi'l Saga'l Saaxi'n woronne issu lam ba'lluwwi kiniinsi bagaan ee Saaxi'n woronne mulli luwwi mahim hee'ukkoyyo.

¹⁰Qeessuwwi Keesammi Miniinsi fitto'isam oo Keesammi Min dangonnem duubinne wo'mmukko.

¹¹Ee duuphphi woronne hee'u Waa'i lombi Keesammi Minenne wo'mmaa hee'u bikkina oo qeessuwwi daba'llita'a aaggeenaa ixxuwwi awwaado awwaaddeenaa xanto'oyyo.

¹²Ee ammanenne Salamoon, «Moollanni Waa'a! At duuphphi tuunsi woronne hee'oommo yitaatto.

¹³Oono'o, kaba hibbinne nuuraakkoo mine kiina baxaammo; ixxim at heer heerina hee'lloo beyyi ihookko» yukko.

¹⁴Minaadab ee beyyonne uullaa hee'ukkisam adil Salamoon ixxuwwi kollonne daba'llaa Waa'ik maassi ixxuwwanne dilloo'isina

¹⁵«Isra'ee'l Moollanni Waa'i galaxxamona. Iyyanni Daawiitina aagu hidi'l sagara wonshaakko. Ixxim,

¹⁶‹I minaadaba Gibxiinsi fissummi ammaniinsi ki'isaa i summi weeshamoo Keesammi Mine baxakkam beyyo hundem Isra'ee'l uullannem ayyi beero'om doo'llummoyyo. Ihukkaarem i minaadab ikko'i Isra'eela awwonsoo'isina Daawiita doo'llaammo› yoohan hee'ukko» yaa Waa'a uunxukko.

¹⁷Odim Salamoon «Iyyanni Daawiit Isra'ee'l Moollanni Waa'ina Keesammi Mine baxeena sawwaa hee'ukko.

¹⁸Ihukkaarem Waa'i iyyanni Daawiitina ‹I summi weeshamoo Keesammi Mine baxxeena sawwittis erane.

¹⁹Ihukkaarem iina mine baxookkok ki beeto bagaan ateyyo. Kiinniinsi qaramoo beet iina mine baxookko› yukko.

²⁰«Oono'o, Waa'i uwwu neeyyaxxi sagara egeraakko. Ee bikkina an iyyanni beyyo aa'aa Isra'eelina adil ihaammo. Isra'ee'l Moollanni Waa'i summina Keesammi Mine baxaammo.

²¹Waa'i Gibxi uulliinsi fissu ammane gaassi niyyanno'inne hidiro aagu ki'n ba'llanne yoo Hidi'l Sagar yoo Saaxina dissakkam beyyo ka Keesammi Minenne gudisaammo» yukko.

²²Ee lasage Salamoon minaadaphphi illagenne ki'aa kiti'm beyyi illagenne uullukko. Ixxim lamem angam iimaa'aa

²³«Isra'ee'l Moollanni Waa'a! Hanaan iimanenne woroonim uullanne keese laboo Waa'i hore'em bee'e! Ki minaadabim wo'm wodaninne ijaajantam ammane ixxuwwinne maqire aaggitti hidi'l sagara qoxxissootto. Ki iittom moo'issootto.

²⁴Iyyanni Daawiitina uwwitti neeyyaxxi sagara qoxxissaatto. Woccitti sagar hundim oono'o kaballa wo'mmaakko.

²⁵Kabadem Isra'ee'l Moollanni Waa'a! Iyyanni Daawiitina aaggitti mulli hidi'l sagaram wonshe. Oohim ‹At issitam hee'llittisam ki oos ijaajantam keen ikkolasii i illagennem xabbeenoominne daba'llantolasii hundi ammanem ki shumo'iinsi Isra'ee'l adilla'n barcumanne afuurookkokaa i illagennem adil ihoo beeto kiina hooroommoyyo› yitaa woccitti neeyyaxxi sagara wonshe.

²⁶Kabadem Isra'ee'l Waa'a! Ki awwaadaanchi hee'u iyyanni Daawiitina uwwitti neeyyaxxi sagar hundim wo'mmoo'isa isse.

²⁷«Waa'a! Hanqinam uulli kiina heechchi beyyi iheena xanoohonnihe? Oono'o, iimanii iimaniinsi hanaan yoo iimannuwwii hundim ihuta'n ihoobee'an ihukkuuyyi ku an baxummi gootto'i Keesammi Min kiina hinkid iheena xanookko?

²⁸Ihukkaarem I Moollanni Waa'a! Ki awwaadaanchi kolli moo'e. Kaballam ki awwaadaanchi illagenne uunxoo uunxatoo weeshaanoo macceese.

²⁹At ‹I summi weeshamookko› yitti ka ki mi'n kolli ballaa hiimoo moo'e. An ki awwaadaanchim ka Keesammi Mi'n kollonne i ille dabaraa keese uunxoommi ammane i uunxato macceese.

³⁰Ni ille ka ki mi'n kolli daballaa keese uunxinoommi ammane iikkaa ki minaadaphphekaa uunxato macceese. Iimannenne at hee'lloo beyyonne ikkaatta ni uunxato macceese; niinam uraammo yihe.

³¹«Mat manchi ixxi beshichcho hawwodu bikkina kasasamaa ka minenne yoo kiti'm beyyonne hincaa'akkamaare ixxi gaqqi muccuroo'm bikkina ee beyyonne hide'oo ammane,

³²Waa'a! Iimanenne ikkaa macceese; ki awwaadaaninam oogate. Hawwodu manchom ixxi bi'ishshisanne guzumo'amoo'isaa muccur manchim muccuroomminne firoo'isaa isse.

³³«Ki minaadab ikko'i Isra'ee'l oos jora baxxa'a keese kichche'isso'i mashka'inne ixxuwwi diina'i illagenne kaa'anta'a odim ee bikkina gaabbita'a ki kolli daba'llimminne ka mi'n kolli Waatto'ok kiiniinsi haafite siideena ixxuwwi gaga hoffiissa'a maashaalloominne keese uunxitota'n

³⁴at iimanennetti ikkaa ixxuwwika uunxato macceese; qeefadanta'a hee'llam ki minaadaphphekam baaxiilo uttaa gaassi anno'ina uwwitti uullanne dabattaa wore.

³⁵«Ki minaadab jora baximminne keese hawwodda'a kichche'isso'i mashka'inne xeen ixxuwwina ga'nnoobee'isa issitaa guzumo'lloo ammane issito'i jolli bikkina gaabbita'a ixxuwwi ille ka ki mi'n kollonne dabatta'a maashaalloominne keese uunxitota'n

³⁶at iimanenne ikkaa ixxuwwi uunxato macceese; kiina awwaadaan ikko'i Isra'ee'l minaadaphpheka baaxiilo ure. Xabbeen luwwam issiteena xantamisina losise. Ee lasage odim Waa'a! Heer heerina ixxuwwi gulummi issitaa ki minaadabina uwwitti ka uullanne xeen ga'nnoo'isa isse.

³⁷«Ka uullanne sibaar te'im booban ihoo ammane; ee'isam wix hurbaata shokkiisoo hafachchinne, waagginnee qawwaawwinnee te'im qawwaawwi wotallinne bi'oo ammane te'im ixxuwwi diina'i ki minaadaba dangonne kibbita'a hawwo afissam ammane; te'im ki minaadaphphi hanenne annanni annanni jabbii kee'mmaalli xissii afoo ammane

³⁸ixxuwwika uunxato macceese. Ki minaadab Isra'ee'l lambe'enne tiiro bi'isoo qaraaraalli kichchechchi afoohaare ixxuwwi anga ka ki mi'n kollonne biddiqaa'lla'a keese uunxitam ammane

³⁹ixxuwwi uunxato macceese. At hee'lloo iimanenne ikkaa ixxuwwi uunxato macceessaa ixxuwwi jolla uraammoo yihe. Ixxuwwinam hara'mme; manni wodanonnee tiironnee yoo sawwite hundam saarayyitaa laqqoottok xale'i atette. Ee bikkina annichchi annichchinam ixxi gaqqi baxisa miqe.

⁴⁰Ee'isinnem ki minaadab gaassi niyyanno'ina ixxuwwi gaqqi uulli issitaa uwwitti uullanne hee'llam doollenne hundannem kiina ijaajantamisaa keese lonsitamisaa isse.

⁴¹«Qee'l uullanne hee'oo mulli uulli manchi la'amaakkoo ki summaa ki minaadabina issitti maalalsiisoo luwwaa macceesaa ka minenne kiina otosseenaa keese uunxeenaa waarulas,

⁴²

⁴³at hee'lloo iimanenne ikkaa ixxi uunxato macceese. Ki minaadab Isra'eel issoo'isam heer uullanne hee'oo minaadab keese la'imminne kiina ijaajamoo'isaa keesem lonsoo'isaa isse. Oo mulli manchi at ixxena issitona uunxoo luwwi hundam isse. Oohim ihoo ammane ku an baxummi Keesammi Min ki summi weeshamoo beyyi ihukkisa minaadab la'ookko.

⁴⁴«Ixxuwwi diina'a qasseena gaaddamisina ki minaadaba ijaajjoo ammane ayyi beyyonnem ikka'a ka at doo'llitti beero'onnee an kiina baxummi ka minennee ille dabatta'a keese uunxitam ammane,

⁴⁵iimanenne ikkaa ixxuwwika xa'mmichchaa uunxatoo macceessaa kaachcha uwwe.

⁴⁶«Maham ihukkaare hawwojji bee'i manchi hee'oo bee'i bikkina ki minaadab baaxiilo baximminne keese kichche'issamaare atim quuqqaa ixxuwwa diina'i kaa'llamisaa qeefadda'a mulli uulla massitamisaa issitoo ammane oo uulli maham qee'lluta'nnim

⁴⁷qeefadanta'a hee'llam ee uullanne hee'llu'uuyyi ‹Baaxiilo banxaammo; hawwondaammo; baqinaammome› yita'a gaabbita'a baaxiilo biira yitolas,

⁴⁸qeefadda'a massito'i ixxuwwi diina'i uullanne hee'llu'uuyyi ixxuwwi wo'm wodaninne hanqinnee xabbeen tiirinnee gaabbita'a baaxiilo biira yita'a at gaassi niyyanno'ina uwwitti ka uulli kolli, atim doo'llitti ka beero'i kollii an kiina baxummi ka ki mi'n kollii ixxuwwi ille dabatta'a keese uunxitolas,

⁴⁹at hee'lloo beyyonne iimanenne ikkaa ixxuwwi uunxato macceessaa ixxuwwina oogate.

⁵⁰Ixxuwwika baaxiiloo keese kichche'isso'i boqqoomaa hundam uraammoo yihe. Ixxuwwi diina'im ixxuwwina qishixxitamisa isse.

⁵¹Mashka'oomim ixxuwwi xaa'l midachchisa shokkiisoo Gibxi uulliinsi fissitti ki minaadaba.

⁵²«Ki illi ki awwaadaanchinaa ki minaadab ikko'i Isra'ee'l uunxatinaa fooqaakkoohan ihona; ki kollonne laaramoo amman hundam macceese.

⁵³Moollanni Waa'a! Gaassi niyyanno'o Gibxi uulliinsi fissitti ammane ki awwaadaanchi Muse'i kollinne woccittisam kiina annanni ihaakkoo minaadab issitaa mulli minaadab hundiinsim doo'llittan ihukkisa sawwihe» yaa uunxukko.

⁵⁴Salamoon Waa'a uunxato guullaa lasonne kiti'm beyyi illagenne guruphphaa hee'u beyyiinsi anga biddiqaa'ukkisam ki'aa uullukko.

⁵⁵Ixxim sagara iimaa'aa ee beyyonne wixxaa hee'u minaadabanne hundannem Waa'ik maassi dilloo'isina,

⁵⁶«Aagu neeyyaxxi saga'llisanne minaadabina xumma uwwu Waa'i galaxxamona. Ixxena awwaadaanchi hee'u Muse'enne uwwu er neeyyaxxi sagariinsi matim xa'ukkoyyo.

⁵⁷Ni Moollanni Waa'i gaassi niyyanno'inne maqire hee'ukkisam niinninnem maqire hee'ona. Ayyi ammanem neese uunjoone; urooneme.

⁵⁸Gaassi niyyanno'ina uwwu seera, ijaajoo ogoraa egerimminne ixxi doo'llisanne hee'nneena xannoommisaa ixxena ijaajammoommi keen inkoommisaa issona.

⁵⁹Iina ixxi awwaadaanchinaa ixxi minaadab ikko'i Isra'eelinaa ballina ballina hasisoo luwwi wo'mmoo'isina ku an Waa'a uunxummi uunxat ballaa hiimoo ni Moollanni Waa'ina hincihona.

⁶⁰Ee'isinne ka heer uullanne yoo minaadab hundim xale'i Waa'i Moollanni ihukkisaa ixxeensi bagaan mulli Waa'i bee'an ihukkisaa la'ookko.

⁶¹Ki'nnuwwi kaballa issitakko'isam ixxeka seelluwwaa ijaajjuwwaa egerimminne ni Moollanni Waa'ina amman hundam amma'nnantakko'oo keen ikkehe» yaa maasse'ukko.

⁶²Ee lasage adil Salamoonii ixxenne maqire hee'llo'i Isra'ee'l minaadabii hundim Waa'ina kitima hincaa'llo'o.

⁶³Salamoonim lamiyyee lam kum mirigo'uwwaa mat xibbee lamiyyi kum gereebbaa mateeyyoo'm kitim issaa hincaa'ukko. Ee'isa issimminne adil Salamoonii Isra'ee'l minaadabii hundim Keesammi Min Waa'ina keesamaakkoon issito'o.

⁶⁴Ee'isam ee ayyaamonne Keesammi Mi'n illagenne yoo wixxixxi beyyika lambe'i beyyo Waa'ina keesamaakkoohan issukko. Odim hundoomam shokkiisakka'a Waa'ina hincaa'akkam kitima, hurbaaxxi kitima, mateeyyoo'm kitimaa diinaxxi di'iraa hundam Waa'ina hincaa'ukko. Mashka'oomim Naas xaarinne baxamu kitima hincaa'akkam beyyi ee hundem kitimam amadeena xanoobee'i bikkinatte.

⁶⁵Ee Keesammi Minennem Salamoonii Isra'ee'l minaadabii hundim lamar balla hundoomam daas uguda lonsita'a higisso'o. Hanaa'n qarinne Haamaata aagakkam googiinsi ki'isaa woroo'n qarinne Gibxi gabal afeebe'e yoo uulliinsi waaru minaadab hore'em lobakat hee'ukko.

⁶⁶Sadeenti ayyaamonne odim Salamoon minaadaba geegeesukko. Minaadab hundim Salamoona maasse'ukko; Waa'i ixxi awwaadaanchi Daawiitinaa ixxi minaadab Isra'eelinaa uwwu biijoo'm bikkina liirammukkuuyyi min minem elle'ukko.