Read Hadiyya 1Adlilluwwi kitaaba 9 Bible Online

1Adlilluwwi kitaaba 9 - Hadiyya bible

1Adlilluwwi kitaaba 9

¹Adil Salamoon Keesammi Mine, ixxi adilla'n minee baxeena hasu mulli luwwaa hundam baxaa gullaa lasonne

²Waa'i illageen Gaba'oonanne moo'amukkisam odim moo'amukko.

³Waa'im «I illagenne hincaa'llitti xa'mmichchaa uunxatoo macceesaamo. Oohim heer heerinam i summi weeshamoo'isina ka baxxitti Keesammi Mine keesaammo; i illii i tiirim hundi ammanem eekke'e ihookko.

⁴Ihukkaarem at kiyyanni Daawiitisam xabbeenoominnee amma'nnanchinnee iina awwaaddilas, iikka seeraa siyya'aa egettilas, keese ijaajummi luwwi hundam issitlas,

⁵kiyyanni Daawiitina ‹Ki shumo'iinsi Isra'ee'l adilla'n barcumanne afuuraa adil ihoo beeto kiina hooroommoyyo› yaa uwwummi neeyyaxxi sagara egerimminne ki adilla'n barcum Isra'eelanne heer heerina qoxxaa hee'oo'isa issoommo.

⁶Ihukkaarem at te'im ki shumo'i eese awwonimma uttakka'a an uwwummi ijaajoo seeraa egettakkobeelasii mulli minaadab waa'uwwina otossitakkolasii

⁷Isra'ee'l minaadabim an ixxuwwina uwwummi uulliinsi fitta'a yaayyantamisa issoommo. I summi weeshamoo'isina keesummi ka Keesammi Minem uroommo. Uulli hundannem hee'oo minaadab hundim Isra'eelanne naacamookkoo osarookkoo.

⁸Ku iimiimaa yoo Keesammi Minim gindamaa hacci tuubbi ihaa gatookko. Eeheen higoo manni hundim eekka moo'aa maalalookko. Ixxuwwi ‹Waa'i ka uullaa ka Keesammi Minee mahina ka'isa issukko?› yukkuuyyi naacamookko.

⁹Ixxuwwim dabatta'a ‹Isra'ee'l minaadab gaassi ixxuwwi anno'o Gibxi uulliinsi fissu Moollanni Waa'a utta'a mulli waa'uwwa awwonta'a ee waa'uwwina otossito'i bikkinaa awwaaddo'i bikkinaa Waa'i ka bichchi boobana hundam ixxuwwanne eebukko› yitamo» yukko.

¹⁰Salamoon Keesammi Minee adilla'n minee lammiyyi hiinchonne baxaa guullukko.

¹¹Xiiroos uulli adil Kiiraam ee bax hundinam hasisoo digibaa hoomaa lobakat worqinne maqirem uwwaa hee'ukko. Oo bax hundim beeddaa lasage Salamoon Galii'l uullanne hee'oo lamiyyi hoffi beero'uwwa Kiiraamina uwwukko.

¹²Ihukkaarem Kiiraam ee beero'uwwa moo'aa liiramukkoyyo.

¹³Ixxim Salamoonina «Iyyabbaayyo, iina uwwitti beero'uwwi ada kakeenonnihe?» yukko. Ee bikkina ee beero'uwwik summi kaballi afeebe'em «Kaabula»[3] yamamookko.

¹⁴Kiiraam Salamoonina asse'u worqi soor kum kiilogiraama ihoohan hee'ukko.

¹⁵Adil Salamoonina Keesammi Mine, ixxi adilla'n mine, Yerusaalee'm kululleexxi ootaa ee beero'iinsi eelliinchi firinne hee'oo Miiloo yakkam cebbaa shiraashitta'a gudisso'i malaayyi baxaan hee'llo'o. Oo keenim Haxoora, Magiidoo Gezeeraa yakkam beero'uwwa baxxamisa issukko.

¹⁶Eehanniinsi illageen Gibxi uulli adil Faari'oon Geezeera kaa'aa amadaa ee beero'onne hee'oo Kana'aa'n mannam shaa ee beero'om shokkiisaa ixxi gassi woronne issaa hee'ukko. Ee lasage ixxi landichcho Salamoonina ladiisu ammanenne ee Geezeer beero'o irifo'i issaa ixxena uwwaa hee'ukko.

¹⁷Ee beero'om Salamoon odim baxxukko; ee'isam woroo'n Beetihooroonaa

¹⁸Baa'ilaataa Yihuxxi uulli udma'anne yoo Taamaaraa odim baxukko.

¹⁹Odim Salamoon Liibaanoosanne, Yerusaaleemannee ixxi gassi woronne Isra'eel ikkobee'i mulli beyyuwwannee sinqa wixxaa'akkamokaa faradoo faraxxi gaarre'ee egerakkam beero'uwwaa ee'isam baxeena hasu luwwi hundam baxukko.

²⁰Salamoonina malaayyi baxo baxxam hee'llo'i keen Amoore'i manna, Hiite'i manna, Ferize'i manna, Hiiwe'i mannaa Iyyaabuus mannaa hee'llo'o. Oo keenim Isra'ee'l minaadab ixxuwwi uulla gulummi issita'a lago aa'llo'i ammane shitoo'n utto'i Kana'aa'n uulli minaadaphphi shumo'i hee'llo'o. Ixxuwwim kaballi afeebe'e agid ikka'a awwaaddu'uuyyi yo'o.

²²Salamoon Isra'ee'l oosiinsi ayyi manchom agishshi issaa baxisukkoyyo. Ixxuwwi daannuwwa, gaadaano, gaaxxi awwonsaanoo ijaajaanoo faraxxi gaarre'e ushe'llam kee'n ijaajaanoo faradaanoo ikka'a awwaaddam hee'llo'o.

²³Salamoon baxoo kininne baxakkam mi'n baxo gudda'a baxxam manna ijaajjam keen onit xibbii ontayyi awwonsaanii hee'llo'o.

²⁴Gibxi uulli adi'l landichchotte hee'llo'i Salamoon mi'n ama Daawiit beero'iinsi Salamoon isena baxisu adilla'n minenne daba'llita'a lasage Salamoon eelliinchi firinne yoo Miiloon yakkam cebbi beyyo shiraashiramaa baxamoo'isa issukko.

²⁵Salamoon Waa'ina baxisu kiti'm beyyonne shokkiisakka'a Waa'ina hicaa'akkam kitimaa gatimmina ihoo mateeyyoo'm kitimaa hiinchonne sas ammane hincaa'am hee'ukko. Ee hanninne hundinnem Waa'ina aduruus kitima hincaa'am hee'ukko. Ka hundam issimminne Keesammi Minina hasisoo awwaado taaphansukko.

²⁶Ee'isam adil Salamoon Eedoo'm uullanne Ertiira'i dambalaq gadanonne hee'oo Eelaat gadanonne yoo Eexiyoongaabiiranne markabbuwwa baxukko.

²⁷Adil kiiraamim Salamoon manninne maqirem awwaaddam markaba ushe'imma laqqam manna asse'ukko.

²⁸Ixxuwwim marikabinne Oofiira yakkam uulla matta'a daba'llitu'uuyyi adil Salamoonina tommiinsii soor kum kiilo giraamiinsii lophphaa kee'mmoo worqa amadda'a waatto'o.