Read Hadiyya 2 Adilluwwi Kitaaba 10 Bible Online

2 Adilluwwi Kitaaba 10 - Hadiyya bible

2 Adilluwwi Kitaaba 10

¹Xig lamarayye ikkam qax Aki'aab shumo'i Samaare'i beero'onne hee'llam hee'llo'o. Iyyu'u assi kitaaba kitaabaa ee beero'i gassaanina, uulli lommanninaa Aki'aab ooso li'issammi keeninaa asse'ukko. Oo assi kurim

²«Adi'l shumo'i ki'nnuwwi anganne yo'i bikkina faradii faraxxi gaarre'ii, o'l mu'uttuwwii girbamaakkoo beero'uwwii hundim ki'nnuwwi angannette. Ee bikkina ku assi kur ki'nnuwwi anganne afukkisam.

³Adi'l shumo'iinsi e'llookkoka doo'llitakka'a adil issehe. Ixxenam agaaggakka'a orammehe» yoohan hee'ukko.

⁴Eehanniinsi ki'aa Samaare'i beero'i gassaan baa'lla'a «Adil Yooraamii adil Akaaziyaasii uullixxanteena xantobee'i Iyyu'u neese hinkid issinaa uullixxameena xannoommo?» yito'o.

⁵Ee bikkina adi'l mi'n gassaanchii ee beero'i gassaanchii la'anto'oo uulli lommanninnee adi'l ooso li'issam keeninnee maqirem Iyyu'una «Neese kiina awwaadaano; at neese ijaajjoo luwwi hundam issineena gundaammo. Neese ayyem adil issinoommoyyo; at kiina eran ihaa moo'amu luwwi hundam isse» yita'a asso asse'llo'o.

⁶Iyyu'um «Ki'nnuwwi iinninne iittantakkolasii i ijaajom egettakkeena guddakko'oo keen ikkakkolasii soodo kido'i ammanenne adil Aki'aab shumo'i hundikam horoore muttakka'a amaddakka'a i beyyo Yizra'eela waallehe» yaa mulli assi kitaaba kitaabukko. Adil Aki'aabik lamarayyem oosim Samaare'i beero'i ixxuwwa li'isaan ikko'i la'anto'oo lommanni anganne egeranta'a hee'llo'o.

⁷Samaare'i beero'i awwonsaan Iyyu'i assi kur ixxuwwi beyyo afukkisam Aki'aabika lamarayyem oosom shito'o. Ixxuwwikam horoore mutta'a sanannanne issita'a Yizra'ee'l uullanne hee'oo Iyyu'i beyyo asse'llo'o.

⁸Aki'aab oosik horoor muramaa waarukkisa Iyyu'u macceesu ammanenne beero'i ooxxi gooc gadanonne lam ogoranne tuubamaa la'm balli dar afeebe'e afuurona ijaajukko.

⁹La'm balla daram ee beero'i ooxxi gooca maraa ee beyyonne wixxito'i minaadabina «Adil Yooraama dollotaa shummok anette hee'ummo. Ee bikkina ki'nnuwwi ee quuxonne xa'mmantakkamoyyo. Ihukkaarem ka manna hundam shukkok ayyette?

¹⁰Ku hundim Waa'i Aki'aab shumo'i bikkina wocu sagar hanqo'an ihukkisa moo'isookko. Waa'i hiraagaanchi Eeliyaasennetti ihaa wocu sagara wonshaakko» yaa wocukko.

¹¹Ee lasage Iyyu'u Yizra'eelanne hee'llam mulli Aki'aab qarmanna, ixxi gassaano, ixxi beshshuwwaa qeessuwwaa matim gattambee'isa hundam shukko.

¹²Iyyu'u Yizra'ee'l uulliinsi ki'aa Samaare'i uulla marukko. Googonne hee'ukkuuyyim «Allaaraa'n hegeego» yakkam beyyo afaa

¹³lehu Yihuxxi adil Akaaziyaas qarmanni lambe'iinsi hofqax mannam siidaa «Ki'nnuwwi ayyayyaamo?» yaa xa'mmukko. Ixxuwwim «Neese Akaaziyaas qarmanna; kabadem adil Eelzaabeel oosoo gatto'i adi'l mi'n abaroosaa xa'mmineena Yizra'ee'l uulla malloommuulla» yita'a dabatto'o.

¹⁴Iyyu'um «Ka manna foorinne hee'llonam amaddehe!» yaa ixxi gaadano ijaajukko. Ixxi gaadaanim amaddo'aare Iyyu'u ee beyyonnem wo'i ba'l gadanonne shukko. Ixxuwwikim xig hundoomim soree lamoo ihaa ixxuwwiinsi matim foorinne gatukkoyyo.

¹⁵Iyyu'u ee beyyiinsi ki'aa odim taakke'imma asheerukko. Googonne hee'ukkuuyyim Reekaab beeto Yoonaadaaba siidukko. Iyyu'um xummaatisaa lasonne «Anii atii sawwitinne matome. Eehannah iina hara'mmiteena xantoohonnihe?» yaa xa'mmukko. Yoonaadaabim «Eeyya xanoommo» yaa dabarukko. Iyyu'um «Eehannata'i ki anga uwwe» yukko. Ee lasage angi anga amaxxanta'a Iyyu'u bakkiisaakka ixxi faraxxi gaarre'enne afuussaa

¹⁶«Iinninne maqire ikkaa an Waa'ina hinkaa'nna amma'nnamaammoohanda'e ihummisa at ki gagoomim moo'e» yukko. Ixxuwwim matikka'a faraxxi gaarre'inne matto'o.

¹⁷Ee beyyo affa'a lasage Iyyu'u Aki'aab abaroosiinsi matim gatoobee'isa hundam shukko. Ku hundim ihukkok hiraagaanchi Eeliyaasinne kuramu Waa'i saga'llisannette.

¹⁸Iyyu'u Samaare'i beero'i minaadaba mat issaa weeshaa «Adil Aki'aab Ba'aalina awwaadukkok hofqaxam hee'ukko. Ihukkaarem an ixxeensi lonsaa awwaadeena hasoommo.

¹⁹Ee bikkina Ba'aa'l hiraagaano, awwaadaanoo qeessuwwaa hundam weeshshehe. Ba'aalina kee'mmaalli kitima hincaa'oommi bikkina mat manchim gatoo'n waarona; waaroo'n gatukkok hundim lehinne guzumo'amookko» yukko. Ihukkaarem Iyyu'u eehid yukkok Ba'aa'l awwaadaano hundam guulleena sawwaa hee'u bikkinatte.

²⁰Iyyu'um «Ba'aa'l lombina alallaattakka'a minaadaba weeshshehe» yukko. Ixxuwwim minaadabina alallaatto'o.

²¹Ixxim eekka Isra'eel hundinam asse'ukko. Ba'aa'l awwaadaan hundim matim gatoo'n waaraa Ba'aalina otossakkam mine aagukko. Ixxuwwim ee minenne aagga'a tochchiins tochchi afeebe'e wo'mmito'o.

²²Iyyu'um eddechchi mi'n gaassaanchina «Ba'aa'l awwaadaanina hundinam eddechcha fisse» yukko. Ixxim ee eddechcha fissaa Ba'aa'l awwaadaanina hundinam uwwukko.

²³Ee lasage Iyyu'u Reekaab beet Yoonaadaabinne maqirem Ba'aalina otossakkam mine aagukko. Ba'aa'l awwaadaaninam «Xale'i Ba'aa'l awwaadaaniinsi bagaan Waa'i awwaadaan ki'nnuwwinne maqire bee'isa qoossehe» yukko.

²⁴Ee lasage shokkiisakka'a hincaa'akkam kitimaa mulli kitimaa hincaa'lleena aaggo'o. Ee ammanenne Iyyu'u biiranne gudisaa hee'u sadeentayyi manchina «Ki'nnuwwi anganne higisaa uwwummi manniinsi matichchim xoroo'isa issookkok ixxi gagim ee manchi bikkenne lehookko!» yaa qoxxisaa kuraa hee'ukko.

²⁵Shokkiisakka'a hincaa'akkam kitima hincaa'akka'a guullakko'isam Iyyu'u egeraanoo gaaxxi awwonsaanoo «Kaba aaggakka'a ee manna mat manchim xooroobee'isa shi'llehe!» yaa ijaajukko. Ixxuwwim bisa'inne shita'a guullito'o. Egeraanii gaaxxi awwonsaanii ee mannika leesha hundam biiranne fissita'a uunjito'o. Ee lasage ixxuwwi Ba'aalina otossakkam mi'n koshoro aaggo'o.

²⁶Kiniinsi baxamu otossakkam misilluwwam Ba'aalina otossakkam miniinsi fissita'a shokkiisso'o.

²⁷Ba'aalina otossakkam misila iiqansito'o; otossakkam minem gindito'o; oo beyyim kaballi afeebe'e manni shume'oo beyyi ihukko.

²⁸Ee'isinne Iyyu'u Ba'aa'l otossaato Isra'ee'l uulliinsi bi'isukko.

²⁹Ihukkaarem Naabaax beet Yoorbi'aam Beeteelannee Daanannee worqinne baxamaakkoo wo'l misilina otossitamisa issimminne Isra'eela huushisu baaxiiliinsi Iyyu'u qee'llukkoyyo.

³⁰Waa'im Iyyu'una «I illagenne er luwwa issitti bikkinaa Aki'aab mine guzumo'eena sawwaa hee'ummoka issitti bikkinaa ki shumo'i soor beet afeebe'e Isra'eelanne adil ihookko» yukko.

³¹Ihukkaarem Iyyu'u Isra'ee'l Moollanni Waa'ika Seera guullaa egerukkoyyo; Yoorbi'aam Isra'ee'l minaadaba huushisu baaxiiliinsim qee'llukkoyyo.

³²Ee doollenne Waa'i Isra'ee'l uulla qoroshimma asheerukko; Azaaheel Isra'eela tochchiinsi tochchi afeebe'e qasukko.

³³Oohim Yoordaanoosiinsi eelliinchi firinne yoo Gala'aaxxi uulla hundam Arnoo'n daajji gadanonne yoo Aro'eeriinsi ki'isaa Gaadika, Roobeelikaa Minaas ullaa Baasaanam edaa amadukko.

³⁴Iyyu'u ixxi adilla'n doollenne baxukkokii taaphansu luwwii hundim Isra'ee'l Adilluwwi Aganni Kitaabanne kitaabammaakko.

³⁵Iyyu'um ixxi anno'isam lehukko; Samaare'ennem waammamukko. Ixxi beyyonnem ixxi beet Yoo'aakaaz adil ihukko.

³⁶Iyyu'u Samaare'enne afuuraa Isra'eela lamiyyee sadeenti hiinchoo adillaninne gassukko.