Read Hadiyya 2 Adilluwwi Kitaaba 12 Bible Online

2 Adilluwwi Kitaaba 12 - Hadiyya bible

2 Adilluwwi Kitaaba 12

¹Iyyu'u Isra'ee'l minaadabanne adil ihu lama'l hiinchonne Yoo'aas Ayihuxxi minaadabanne adil ihukko. Ixxi heechchi beyyom Yerusaaleemanne issaa sor hiincho gassukko. Ixxi amakim summi Xiibiyatte hee'ukko; isem Beersaabeeh beero'itan hee'llo'o.

²Qeessichchi Yoodaahe sogamii losisamii hee'u bikkina Yoo'aas ixxi hee'u doollenne hundannem Waa'a liiransoo baxo baxukko.

³Ihona bagaan duunnuwwanne hundannem hee'llo'i hanqo'i Waa'a laqqambee'i minaadab otossitam beyyuwwi bi'ubee'i bikkina minaadab ee beyyuwwanne aduruusa wiriissitu'uuyyi kitima hincaa'imma utto'oyyi hee'llo'o.

⁴Yoo'aasim qeessuwwina «Keesammi Minenne kitim ihaa hincoo diinat hundim oohim xigamu manchi hincaa'oo diinatee Waa'i minina liiramakkam diinatee hundam wixxaa'llehe.

⁵Qeessuwwi annannichchim awwaaddam manni Waa'ina uwwitam diinate hundam qoxxita'a egettamisina annoomat uwwamukko. Ee diinatem hasisoo'isinne Keesammi Mine axisimmina awwaaxxitona kurukko.

⁶Ihukkaarem Yoo'aas adil ihu lamiyyii sas hiinchii afeebe'e qeessuwwi Keesammi Mi'nneka ma'lluwwam areesso'oyyi hee'ukko.

⁷Ee bikkina Yoo'aas Yoodaahee mulli qeessuwwaa ixxi beyyo weeshaa «Ka Keesammi Mine haareechchissakkobee'ek mahinatte? Ka balliinsi ki'isaa aa'llakkam diinate amadimmi hasisooyyo. Ku Keesammi Min areesamoo'isina diinate uwwehe» yukko.

⁸Qeessuwwim ee woshshanne iittanta'a ee Keesammi Mine ixxuwwi anginne areesimmaa diinate wixxaa'immaa uullisso'o.

⁹Ee lasage Yoodaahe mat saaxi'n ifiishshaanchonne afo'o fissukko. Ee Saaxinam massaa Keesammi Mine aagisukkuuyyi makki kollinne yoo kitima hincaa'akkam beyyi gadanonne dissukko. Ballina ballina kor kore awwaaddam qeessuwwi otossimmina waaroo minaadab Waa'i awwaadina uwwoo diinate aa'llu'uuyyi ee saaxinanne aagissam hee'llo'o.

¹⁰Ee saaxinanne diinat wo'mmoo ammanem kitaabaanchii hundiinsi lob qeessichchii waatta'a bira xigga'a gonoonanne katta'a dissitam hee'llo'o.

¹¹Yoo qax diinate xigga'a shallago'ooma amadda'a lasage Keesammi Mine areesisaa baxisoo keenina uwwitam hee'llo'o. Ixxuwwim ee diinate aa'lla'a haqqinnee kininnee areessam angi qoor mannina uwwitam hee'llo'o.

¹²Ee'isam kina cabbaraanina, areesimmina awwaadoo haqqaa kinaa bitaa'llam keeninaa annanni annanni awwaadoo luwwi hundinaa miqqam hee'llo'o.

¹³Ihukkaarem biriinsi baxamoo xuwwa'uwwina, loqooqo'i saahinnuwwa, xurumbuwwinaa gii'l buchcha wixxaa'akkam mu'uttuwwinaa odim biriinsii worqiinsii baxakkam keesammi mu'uttuwwinaa ee diinatiinsi miqqo'oyyo.

¹⁴Oo diinat hundim Keesammi Mine areesimmi baxonne hossam baxaanina xale'e awwaadam hee'ukko.

¹⁵Ee baxo awwonsimmina doo'llanto'i mannim hore'em amma'nnanto'oo keen hee'llo'i bikkina oo diinat firoo ogora shallagimmi hasisam hee'ukkoyyo.

¹⁶Hawwojji bikkinaa baaxii'l haafixxi kitiminaa miqamoo diinat qeessuwwina awwaadoohan hee'ukko bagaan Keesammi Mine areesimmi saaxinanne aagam hee'ukkoyyo.

¹⁷Ee ammane Sooriy uulli adil Azaaheel Gaat beero'o dangisaa qasaa amadukko. Odim Yerusaaleemam dangisaa qaseena qoodukko.

¹⁸Yihuxxi adil Yoo'aasim ixxeensi illageen hee'llo'i adilluwwi Yoosaafix, Yihooraamii Akaaziyii annanni issita'a dissito'i Waa'ina uwwakkam luwwa ixxi gaqqekam edaa Keesammi Minennee adi'l mu'uta dissakkam minennee yoo worqa hundam wixxaa'aa adil Azaaheela qooxxaqqeena asse'ukko. Azaaheelim eekka aa'aa ixxi gogota Yerusaaleemiinsi dabarukko.

¹⁹Adil Yoo'aas issu luwwi hundim Yihuxxi adilluwwi aganni kitaabanne kitaabamaakko.

²⁰Ee lasage adil Yoo'aas gassaan ikko'i Daannuwwi hundim ixxonne ki'llo'o; ixxuwwiinsim lamoom Shiimi'i beet Yoozaakaarii Shoomeer beet Yihoozaabaadii Siilaa yakkam beyyo massoo Googonne Yerusaaleemiinsi eelliinchi fi'l kollonne yoo shiraashiramaakkoo uullanne baxamaakkoo minenne shito'o. Yoo'aasim Daawiit beero'onne yoo adilluwwi waammamoo beyyonne waammamukko. Ixxi beyyonnem ixxi beet Ameesiyaas adil ihukko.