Read Hadiyya 2 Adilluwwi Kitaaba 13 Bible Online

2 Adilluwwi Kitaaba 13 - Hadiyya bible

2 Adilluwwi Kitaaba 13

¹Akaaziyaas beet Yoo'aas Yihuxxi uullanne adil ihu lamiyyennee saxxi hiinchonnee Iyyu'i beet Yoo'akaaz Isra'eelanne adil ihukko. Ixxi heechchi beyyom Samaare'ennetti issaa tommoo lamar hiinchoo gassukko.

²Ixxim ixxeensi illageen hee'u adil Yooroobi'aamisam baaxiilo baximminne Waa'a kichche'isukko. Isra'ee'l minaadabam baaxii'l googonne awwonsukko. Ixxi jor baxiinsim hore'em daba'llukkoyyo.

³Ee bikkina Waa'i Isra'ee'l minaadabanne quuqaa Sooriy adil Azaaheelinaa ee'isam ixxi beet Beenihaadaadinaa ixxuwwa higisaa uwwam hee'ukko.

⁴Ee lasage Yoo'akkaaz Waa'a uunxukko. Waa'im Sooriy adil Isra'ee'l minaadabanne issu luwwa moo'aa Yoo'akkaazika uunxato macceesukko.

⁵Ee bikkina Waa'i Isra'ee'l minaadaba Sooriy minaadaphphi angiinsi wolabbanonne fissoo awwonsaancho asse'ukko. Ixxuwwim gaassisam xumminne hee'llo'o.

⁶Ku hundim ihukkaarem Isra'ee'l minaadab adil Yoorbi'aam aagisu baaxiiliinsi daba'llito'oyyo. Hawwojjiinsi daba'llimmi bikkenne baaxiilo baximmanne qoxxita'a Asheeraa yakkam qophpha'n waa'i misilina Samaare'enne otossimma asheetto'o.

⁷Adil Akaazina Ontayyi faradiinsi, tommi faraxxi gaarre'uwwiinsii tommi kum lokkaan gaadaaniinsii bagaan mulli gudu gaaxxi malaayyi hee'ukkoyyo. Mashka'oomim Sooriy adil mulli gogota di'llisa hancaacamaa guullu bikkinatte.

⁸Adil Yoo'akkaaz baxu mulli baxii qoxallanii hundim Isra'ee'l adilluwwi aganni kitaabanne kitaabamaakko.

⁹Yoo'akkaaz lehukko; Samaare'ennem waammamukko; ixxi bikkennem ixxi beet Yoo'aas adil ihukko.

¹⁰Yihuxxi adil Yoo'aas adil ihu sadennee lama'l hiinchonnee Yoo'akkaaz beet Yoo'aas Isra'ee'l adil ihukko. Hee'oo beyyom Samaare'ennetti issaa tommoo loh hiinchoo gassukko.

¹¹Ixxim Isra'ee'l minaadaba baaxiilonne awwonsu adil Yoorbi'aamika jor baxo awwonimminne baaxiilo baxaa Waa'a kichche'isukko.

¹²Yoo'aas baxu mulli baxii Yihuxxi adil Ameesiyaasinne oramu oranne hee'u qoxallanii hundim Isra'ee'l adilluwwi aganni kitaabanne kitaabamaakko.

¹³Ee lasage Yoo'aas lehukko; Samaare'enne yoo adilluwwi waammi beyyonne waammamukko. Ixxi beyyonnem ixxi beet la'm Yoorbi'aam adil ihukko.

¹⁴Hiraagaanchi Eelsa'a lehoo qaxa kee'mmaallisa xissaa hee'ukko. Ee bikkina Isra'ee'l adil Yoo'aas xa'mmeena maraa sagara iimaa'aa «Iyyannaa! Iyyannaa! At Isra'ee'l minaadabina malaayyee agiraa!» yaa wi'llukko.

¹⁵Eelsa'am adilina «Mat xiyyaa tokkaashshe'ee eebe» yaa ijaajukko. Yoo'aasim Eelsa'a ijaajukkisa issukko.

¹⁶Eelsa'am «Xiyya tokkosseena gude!» yukko. Adilim Eelsa'a ijaajukkisa issukko. Eelsa'am ixxi anga adi'l angi hanenne issukko.

¹⁷Ee lasage «Eelliinchi fi'l maskoota fooqaa'e» yukko. Adilim fooqaa'ukko; Eelsa'am «Kaba xiyya tokkose» yukko. Adil xiyya tokkosukkisam Eelsa'a «At Waa'ina xiyya! Kiininne ihaa Waa'i Sooriy minaadaba kaa'ookko. Sooriy minaadaba Afeeq beero'onne kaa'lleebe'i afeebe'e qassootto» yukko.

¹⁸Ee lasage Eelsa'a adilina «Mulli xiyyuwwa ki'issaa uulla qase» yukko. Adilim uulla sasaagge qasukko.

¹⁹Ixxi issukkisanne Eelsa'a quuqaa «Uulla ontaagge te'im lohaagge qassaattoota'n Sooriy minaadaba guullitaa kaa'llam hee'llitto; ihukkaarem kaba xale'i sasaagge kaa'llootto» yukko.

²⁰Eelsa'am lehukko; waammamukkom. Moo'aabiinsi waattam dangissa'a daaffam manni maarag hundam Isra'ee'l uullanne weerattam hee'llo'o.

²¹Mat ammane Isra'ee'l minaadab mat manchi lehukkaare waammitu'uuyyi ee dangonne aphphisoo gogoxxek mat tuut waarukkuuyyi moo'llo'o. Ee bikkina ee leeshooma manchi leesha Eelsa'a waammakko'i waammi woronne uunjita'a gibbo'o. Oo leeshim Eelsa'i miq nakkukkaare fooraam ihaa lehiinsi ki'aa uullukko.

²²Yoo'akkaaz adil ihu doollenne hundannem Sooriy adil Hazaa'eel Isra'ee'l minaadaba wor amadimminne hawwisam hee'ukko.

²³Ihukkaarem Waa'i ixxi biijoominne urimma issaa hara'mmukko bagaan ixxuwwi bi'llamisina cawwaa urukkoyyo. Eekkam issu mashka'i Abrihaamina, Yisaaqinaa Yaaqoobinaa uwwu hidi'l sagara sawwimminne minaadaba xadubee'i bikkinatte.

²⁴Sooriy adil Azaaheel lehu ammanenne ixxi beet Beenhadaad adil ihukko.

²⁵Ee lasage Isra'ee'l adil Yoo'aas Beenihadaada sas ammane kaa'aa ixxi anni Yoo'akkaaz adilla'n doollenne Beenhadaad amadaa hee'u beero'uwwa dabassiisukko.