Read Hadiyya 2 Adilluwwi Kitaaba 14 Bible Online

2 Adilluwwi Kitaaba 14 - Hadiyya bible

2 Adilluwwi Kitaaba 14

¹Yoo'akkaaz beet Yoo'aas Isra'ee'l minaadabanne adil ihu la'm hiinchonne Yoo'aas beet Ameesiyaas Yihuxxi uullanne adil ihukko.

²Ixxi adil ihu ammanem ixxek umur lamiyyee onti hiinchoo ihaa hee'ukko. Ixxi heechchi beyyom Yerusaaleemanne issaa lamiyyee honsi hiinchoo gassukko. Ixxi amam Yihoo'aadiina yamantaman ikka'a Yerusaalee'm beero'itan hee'llo'o.

³Ameesiyaasim Waa'a liiransoo baxo baxukko. Ihukkaarem gaassi ixxi lobanni Daawiitisayyi hee'ukko. Daawiitisa ihimmi bikkenne ixxi anni Yoo'aas duuha'a awwonukko.

⁴Oohim duunnuwwanne qophpha'n waa'ina otossakkam beyyuwwa gindukkoyyi hee'ukko. Eehanniinsi ki'ukkok minaadab duunnuwwanne kitima hicaa'immaa aduruusa wiriisimmaa utto'oyyi hee'llo'o.

⁵Ameesiyaas ixxi adillano qoxxisukkisam ixxeensi illageen adil ihaa hee'u ixxi anna shito'i gassaano shukko.

⁶Ihukkaarem ee gassaa'nneka ooso shukkoyyo. Ee'isinne Muse'e seeranne Waa'i «Oos baxu baaxiilinne anno'i lehinne guzumo'amooyyo; anno'i baxu baaxiilinnem oos lehinne guzumo'amooyyo. Annannichchim ixxi gag baxu jor baxinne lehinne guzumo'amona» yu ijaajo wonshukko.

⁷Ameesiyaas «Sooqixxi cebba» yakkam beyyonne tommi kuma ikkam qax Eedoo'm gaadaano guullukko. Seela'i yakkam beero'om amadaa «Yooqti'eela» yaa weeshukko. Kabad afeebe'em ee summinne weeshamookko.

⁸Ee lasage Ameesiyaas Isra'ee'l adil ihu Iyyu'i beet Yoo'aas beyyo manna asse'aa «Waare exxammona» yaa orina ki'isansukko.

⁹Ihukkaarem adil Yoo'aas «Mat ammane Liibaanoos duunanne yoo qarxaffichchi digibina ‹I beetina aretti ikkona ki landichcho uwwe› yaa manna asse'ukko; ihukkaarem mat moochchichchi eheen higukkuuyyim hance'ukkaare oo qarxaffichchi gogukko.

¹⁰Ameesiyaasa, at Eedoo'm manna kaa'l bikkina ki wodan bolximminne iimiimaakko. Siidditti kaachchanne liirantaa usheexxitaa ki minenne afuuttita'n kiina erane; at ki Yihudinne maqire ubbeena gagannee ki minaadabannee boobana eebbeena mahina hassoolla?» yukko.

¹¹Ihukkaarem Ameesiyaas Yoo'aas uwwu dabachcha mahannem xigukkoyyo. Ee bikkina adil Yoo'aas ixxi gogota awwonsaa Ameesiyaasanne weeraraa Yihuxxi uulli Beetisheemeeshanne oramukko.

¹²Ameesiyaas gogotim kaa'amukko. Ixxi gaadaanim binnita'a ixxuwwi gaqqi minem aaggo'o.

¹³Yoo'aasim Akaaziyaas beet, Yoo'aas beet Ameesiyaasa foorinnem qeefadukko. Yerusaaleemam afimmina gaaggaabukko. Eekke'e afukkisam Efireem ooxxi goociinsi «Lamejji ooxxi gooca» yamamaa weeshamoo gooc afeebe'e qeeraa'lloom lam xibbi meetira ihoo kininne ootamaakko oota gindukko.

¹⁴Ee beyyonnem siidu biraa worqaa Keesammi Mi'n keesammi mu'utaa adi'l mi'n amaxxaa hundam iyyiisaa Samaare'i uulla daba'llukko. Qeefadamu mannam edaa amadaa marukko.

¹⁵Adil Yoo'aas baxu mulli bax hundim, ee'isam Yihuxxi adil Ameesiyaasinne oramu ammane baxu qoxalla'n bax hundim exxaa Isra'ee'l adilluwwi aganni kitaabanne kitaabamaakko.

¹⁶Yoo'aas lehukko. Samaare'enne yoo adilluwwi waammannem waammamukko. Ixxi beyyonnem la'm Yoorbi'aam adil ihukko.

¹⁷Isra'ee'l adil Akaaziyaas beet Yoo'aas lehaa lasage Yihuxxi adil Yoo'aas beet Ameesiyaas tommoo onti hiinchoo hee'ukko.

¹⁸Ameesiyaas adilla'n doollenne baxamu mulli bax hundim Yihuxxi adilluwwi aganni kitaabanne kitaabamaakko.

¹⁹Ameesiyaasa shimmina Yerusaaleemanne manni a'llamaa hee'u bikkina Ameesiyaas gibaa Laakiish beero'o marukko. Ihukkaarem ixxi diina'i manna asse'lla'a shisiisso'o.

²⁰Ixxekam leesha farashshonne iyyiisakka'a Yerusaaleema eebakka'a Daawiit beero'onne yoo adilluwwi waammanne waammakko'o.

²¹Yihuxxi minaadabim umur tommoo loh hiinchoo ihaakkoo ixxi beet Ooziya adil issukko.

²²Ooziyim illageen amadamaa hee'u Eelaat beero'o ixxi anni lehiinsi lasonne oramaa kaa'aa dabaraa baxaa Yihuxxan issukko.

²³Yoo'aas beet Ameesiyaas Yihudanne adil ihu tommonnee onti hiinchonnee Yoo'aas beet Yoorbi'aam Isra'ee'l minaadabina adil ihukko. Ixxi heechchi beyyom Samaare'enne issaa soree mat hiinchoo gassukko.

²⁴La'm Yoorbi'aamim Isra'ee'l minaadaba baaxii'l googonne awwonsaa Naabaax beet Yoorbi'aamisam Waa'a kichche'isukko.

²⁵Illageen Isra'ee'l anganne hee'u hanaa'n qarinne Haamaata yakkam beyyo higakkam googiinsi ki'isaa woroo'n qaranne sooqixxi dambalaq afeebe'e yoo uulla hundam kaachchinne dabarukko. Oo hundim ihukkok Gaatiheefeer moolliinsi qaramu awwaadaanchi Amiitaayyi beet hiraagaanchi Yoonaasanne ihaa Isra'ee'l Waa'i uwwu neeyyaxxi saga'llisinnette.

²⁶Waa'i Isra'ee'l minaadaphpheka hawwo moo'ukko; agidinattem ihukko wolabina hee'u u'nnanne hara'mmookkok matim hee'ukkoyyo.

²⁷Ihona bagaan ixxuwwi guullita'a bi'llamisina Waa'i hasukkoyyo. Ee bikkina la'm Yoorbi'aamanne ihaa Waa'i gatisukko.

²⁸La'm Yoorbi'aam issu luwwi hundim oranne moo'isu qoxallanii Yihuxxi uulli gassi woronne ikka'a hee'llo'i Damasqo'ii Haamaatii Isra'eelina daba'llitamisa issu agannaam bax hundim Isra'ee'l adilluwwi aganni kitaabanne kitaabamaakko.

²⁹Ee lasage la'm Yoorbi'aam lehukko. Adilluwwi waammi beyyonnem waammamukko. Ixxi beyyonnem ixxi beet Zakkaariyaas adil ihukko.