Read Hadiyya 2 Adilluwwi Kitaaba 15 Bible Online

2 Adilluwwi Kitaaba 15 - Hadiyya bible

2 Adilluwwi Kitaaba 15

¹La'm Yoorbi'aam Isra'ee'l uullanne adil ihu lamiyyennee lama'l hiinchonnee Ameesiyaas beet Ooziy Yihuxxi uullanne adil ihukko.

²Ixxi adil ihu ammane ixxek umur tommoo loh hiinchoo ihaa hee'ukko; ixxi heechchi beyyom Yerusaaleemanne issaa ontayyee lam hiinchoo gasukko; ixxi amam qaranto'ok Yerusaaleemanne; isekim summi Yikooliyatti hee'ukko.

³Ixxim annika er kobi'lla awwonaa Waa'a liiransoo baxo baxukko.

⁴Ihukkaarem duunnuwwi hundannem qophpha'n waa'uwwina otossakkam beyyuwwa bi'isukkoyyo. Ee bikkina minaadab duunnuwwi hundannem kitima kitimimmaa aduruusa wiriisimmaa urukkoyyi hee'ukko.

⁵Ee lasage Waa'i, Ooziya oddomachchonne firoo baddisoo jabbi amadoo'isa issukko; leheebe'i afeebe'em oo jabbi fatakubee'i bikkina bax hundiinsim annanni ihaa mat minenne hee'am hee'ukko. Ee ammane ixxi adilla'n gasso awwonsam hee'ukkok ixxi beet Yoo'aataamatti hee'ukko.

⁶Adil Ooziy issu mulli luwwi hundim Yihuxxi adilluwwi Aganni Kitaabanne kitaabamaakko.

⁷Ooziy lehukko; Daawiit beero'onne hee'oo gaassi anno'i waammi beyyonne waammamukko. Ixxi beyyonnem ixxi beet Yoo'aataam adil ihukko.

⁸Ooziy Yihuxxi uullanne adil ihu sadennee sadeenti hiinchonnee la'm Yoorbi'aam beet Zakkaariyaas Isra'ee'l uullanne adil ihukko; ixxi heechchi beyyom Samaare'enne issaa loh agana gassukko.

⁹Ixxim ixxeensi illageen hee'llo'i adilluwwisa baaxiilo baximminne Waa'a kichche'isukko; ee'isam Isra'ee'l minaadaba baaxiilonne awwonsu Naabaax beet adil Yoorbi'aam jor kobi'lla awwonukko.

¹⁰Yaabeesh beet Shaaluum woshsha dadimminne Yibila'aam yakkam beyyonne adil Zakkaariyaasa shaa ixxi beyyonne adil ihukko.

¹¹Adil Zakkaariyaas issu mulli luwwi hundim Isra'ee'l Adilluwwi Aganni Kitaabanne kitaabamaakko.

¹²Ee'isinne Waa'i adil Iyyu'una «Ki oos soor qaranchi afeebe'e Isra'eelanne adilluwwi ikkamo» yaa wocu neeyyaxxi sagar wo'mmukko.

¹³Ooziy Yihuxxi uullanne adil ihu sadennee honsi hiinchonnee Yaabeesh beet Shaaluum Isra'ee'l adil ihukko; ixxi heechchi beyyom Samaare'ennetti issaa mexxo'i mat agana gassukko.

¹⁴Gaad beet Minaaheem Tiirxaa yakkam beyyiinsi ki'aa Samaare'e marukko; ixxim Shaaluuma shaa ixxi beyyonne adil ihukko.

¹⁵Shaaluum issu mulli luwwii ixxi baxu bangujjaatii hundim Isra'ee'l Adilluwwi Aganni Kitaabanne kitaabamaakko.

¹⁶Minaahem Tiirxa'iinsi ki'aa marukkuuyyi higgonnem Tiifsaah beero'onne hee'oo mannaa ee beero'i kululleetanne hee'oo gattuwwaa bi'isukko. Eeham issu mashka'i ee beero'i manni ixxena anga uwwiteena hassobee'i bikkinatti hee'ukko. Eehanniinsi ki'ukkok qishixxoo'n lamfoor meentika godabo dereerukko.

¹⁷Ooziy Yihuxxi uullanne adil ihu sadennee honsi hiinchonnee Gaad beet Minaahem Isra'ee'l uullanne adil ihukko; ixxi heechchi beyyom Samaare'ennetti issaa tommi hiincho gassukko.

¹⁸Ixxi hee'u qax doollenne hundannem Isra'ee'l minaadaba baaxii'l googonne awwonsu Naabaax beet Yoorbi'aamika jor kobi'lla awwonimminne baaxiilo baxaa Waa'a kichche'isukko.

¹⁹Aasoor adil Tigilaat-Phaleeseer Isra'ee'l minaadabanne weerarukko. Minaaheem ixxi uulli adillanonne ixxi adillano qoxxisoo'isinaa bakkiisoo'isinaa magannaatina sadee soor kum kiilo'i bi'l irifo'o Tigilaat-Phaleeseerina uwwukko.

²⁰Minaaheem ee diinate wixxaa'ukkok Isra'ee'l uullanne yo'i goddaan annannichchim ontayyi kin bira uwwitamisa ciimo'o issimminnette. Ee'isinne Tigilaat-Phileeseer xumminnem ixxi uulla daba'llaa elle'ukko.

²¹Minaaheem baxu mulli luwwi hundim Isra'ee'l Adilluwwi Aganni Kitaabanne kitaabamaakko.

²²Minaaheem lehukko; waammamukkom. Ixxi beyyonnem ixxi beet Faaqaahiy adil ihukko.

²³Ooziy Yihuxxi uullanne adil ihu ontayyi hiinchonne Minaaheem beet Faaqaahiy Isra'ee'l uullanne adil ihukko; ixxi heechchi beyyom Samaare'ennetti issaa lam hiincho gassukko.

²⁴Isra'ee'l minaadaba baaxiilonne awwonsu Naabaax beet adil Yoorbi'aamika jor kobi'lla awwonaa baaxiilo baximminne Waa'a kichche'isukko.

²⁵Faaqaahiy gogotiinsi gaaxxi awwonsaanchi Faaquhe yakkam Ramaaliy beet hee'u ontayyi Gala'aaxxi manninne maqire dollotukko. Samaare'i adilla'n woronne hee'oo girbanne aagaa Faaqaahiya Argobbinnee Haariyinnee maqirem shaa Faaqaahiy beyyonne adil ihukko.

²⁶Faaqaahiy issu mulli luwwi hundim Isra'ee'l Adilluwwi Aganni Kitaabanne kitaabamaakko.

²⁷Ooziy Yihuxxi uullanne adil ihu ontayyennee la'm hiinchonnee Raamaaliy beet Faaquhe Isra'eelanne adil ihukko. Ixxi heechchi beyyom Samaare'enne issaa lamiyyi hiincho gassukko.

²⁸Isra'ee'l minaadaba baaxiilonne awwonsu Naabaax beet adil Yoorbi'aamika jor kobi'lla awwonimminne baaxiilo baximminne Waa'a kichche'isukko.

²⁹Aasoo'l adil Tigilaat-Phaleeseer, Iiyoona, Abeelbeetmaa'ika, Yaanoha, Qeedeeshaa Haxoora yakkam beero'uwwaa ee'isam Gala'aaxxeka, Galii'llekaa Niftaalee'm gassi uulluwwaa weeraraa qasimminne minaadaba Aasoo'l uulla qeefadaa massukkokim ka Faaquh adilla'n doollennette.

³⁰Ooziy beet Yoo'aataam Ayihuxxi uullanne adil ihu lammiyyi hiinchonne Eela'i beet Hose'i adil Faaquhanne dollotukko. Ixxom shaa Isra'ee'l minaadabina adil ihukko.

³¹Faaquhe issu mulli luwwi hundim Isra'ee'l Adilluwwi Aganni Kitaabanne kitaabamaakko.

³²Raamaaliy beet Faaquhe Isra'eelanne adil ihu la'm hiinchonne Ooziy beet Yoo'aataam Yihudanne adil ihukko.

³³Adil ihu ammane ixxek umur lammiyyee onti hiinchoo ihaa hee'ukko. Ixxi heechchi beyyom Yerusaaleemanne issaa tommoo loh hiinchoo gassukko; ixxi amam Yaruusha yamantam Xaadooq landichchotte hee'llo'o.

³⁴Ixxim, ixxi anni Ooziyika er haalata awwonimminne Waa'a liiransoo baxo baxukko.

³⁵Ihukkaarem duunnuwwi hundannem hee'llo'i qophpha'n waa'uwwina otossakkam beyyuwwa bi'isukkoyyi hee'ukko. Minaadabim kitima hincaa'immaa aduruusa wiriissimmaa utto'oyyi hee'llo'o. Keesammi mi'nneka hanaa'n qarinne yoo ooxxi gooca baxisukkokim Yoo'aataamatti hee'ukko.

³⁶Yoo'aataam issu mulli luwwi hundim Yihuxxi Adilluwwi Aganni Kitaabanne kitaabamaakko.

³⁷Waa'i luxxeka Sooriy adil Raxiinaa Isra'ee'l adil Faaquhee Yihuda qassona asse'ukkok Yoo'aataam Ayihuxxi uullanne adil ihu doollennette hee'ukko.

³⁸Yoo'aataam lehukko. Daawiit beero'onne yoo adilluwwa waammakkam beyyonne waammamukko. Ixxi beyyonnem ixxi beet Akaaz adil ihukko.