Read Hadiyya 2 Adilluwwi Kitaaba 16 Bible Online

2 Adilluwwi Kitaaba 16 - Hadiyya bible

2 Adilluwwi Kitaaba 16

¹Ramaaliy beet Faaquhe Isra'eelanne adil ihu tommonnee lama'l hiinchonnee Yoo'aataam beet Akaaz Yihudanne adil ihukkok

²Ixxek umur lamiyyi hiincho ihaakkoohaannonnetti hee'ukko; ixxi heechchi beyyom Yerusaaleemannetti issaa tommoo loh hiinchoo gassukko; ixxi lobanni adil Daawiit er kobi'lla awwonimmi bikkenne Waa'a kichche'isoo baxo baxukko.

³Isra'ee'l adilluwwika jor haalata awwonimminne ixxi beeto shokkiisakka'a hincaa'akkam kitim issaa hincaa'imminne Waa'i Isra'ee'l oos illagiinsi yaayyaa hollu mulli minaadaphphisam shigigaa'oo baxo baxukko.

⁴Akaaz duunnuwwanne baxam hee'u, ee hujuphphi haqquwwi yoo beyyuwwannee kitima hincaa'amii aduruusa wiriissamii hee'ukko.

⁵Ee ammanenne Sooriy adil Raxiinii Isra'ee'l adil Faaquhee Yerusaaleema qasseena kibbito'o; ihukkaarem Akaaza kaa'lleena xanto'oyyo.

⁶Ee doollenne Sooriy adil Raxiin Eelaat beero'o Sooriyina dabarukko; Ayihudam Eelaatiinsi hollukko; Eedoo'm minaadabim Eelaata waatta'a kaballi afeebe'e ee beyyonne hee'llamo.

⁷Akaazim «An kiina awwaadaanchoo qachchoo ihummi bikkina iinninne orantam Sooriy adiliinsii Isra'ee'l adiliinsii eese gatise» yaa Aasoo'l adi'l Tigilaat-Phaleeseer beyyo manna asse'ukko.

⁸Akaazim Keesammi Minennee adi'l doono'i minennee yoo biraa worqaa massaa Aasoo'l adilina asse'ukko.

⁹Aasoo'l adil Tigilaat-Phaleeseerim Akaaz xa'mmichcha aa'aa Damaasqo'onne gaadaa ixxi anganne aa'ukko; adil Raxiinam shukko; minaadabam qeefadaa Qiira massukko.

¹⁰Yihuxxi adil Akaazim Damasqo'o maraa Aasoo'l adil Tigilaat Philaaseerinne edamukko; ee beyyonnem mat kiti'm beyyo moo'ukko; ixxim ee kiti'm beyyo labookkoka baxakkam misila gudisaa qeessichchi Uuriyina asse'ukko.

¹¹Ee bikkina Uuriy adil Akaaz waaroo'n gaassaa ee kiti'm beyyo labookkoka baxukko.

¹²Akaazim Damaasqo'iinsi waaraa kiti'm beyyi danaamisa baxamukkisa moo'eenaa kitima hincaa'eenaa ee kiti'm beyyo marukko.

¹³Ee kiti'm beyyonnem diinaxxeka shokkiisakka'a hincaa'akkam kitimaa hurbaaxxi kitimaa hincaa'ukko; woyi'n diqaas kitimaa mateeyyoo'm kiti'm xiigam dunukko.

¹⁴Haareechchi kiti'm beyyaannonnee Keesammi Mi'nnaannonnee lambe'enne Waa'i illagenne uullaa hee'u naasinne baxamaakkoo kiti'm beyyo ee beyyiinsi ki'isaa haareechchi kiti'm beyyiinsi hanaa'n qarinne dissukko.

¹⁵Ee lasage adil Akaaz hundiinsi lob qeessichchi Ooriyo «Lob haareechchi kiti'm beyyonne daranne shokkiisakka'a hincaa'akkam kitimaa hiimonne hincaa'akkam hurbaaxxi kitimaa adi'lleka shokkiisakka'a hincaa'akkam kitimaa hurbaaxxi kitimaa ee'isam minaadaphpheka shokkiisakka'a hincaa'akkam kitima hurbaaxxekaa aggi kitimaa hincaa'e; shokkiisakka'a hincaa'akkam kiti'm xiigaa mulli kiti'm xiigaa hundam ee kiti'm beyyonne kife; ihukkaarem oo naas kiti'm beyyi an kiissiixxeena awwaaxxoommi beyyi ihona» yukko.

¹⁶Hundiinsi Lob qeessichchi Ooriyim adil Akaaz ijaajukkoka hundam issukko.

¹⁷Adil Akaaz midaadduwwanne yoo saanquwwa fissaa massukko; aanshaqqakkam saahinnuwwam shafe'nnoo'i tululoo lokki yoo luwwiinsi ki'isukko. Wo'o issakkam jaalo'o tommiinsii lam naasiinsii baxamu moolluwwi haniinsi dilliisaa kinanne dissukko.

¹⁸Asoo'l adila liiranseena usheexxaxxi ballanne adilla'n barcuma dissimmina Keesammi Minenne baxamaakkoo iim shiqaakkoo beyyoo Waa'ika Keesammi Mine adilluwwi aagoo biireen yoo goocaa ki'isukko.

¹⁹Akaaz ixxi adilla'n doollenne baxu baxii issu luwwii hundim Yihuxxi adilluwwi Aganni Kitaabanne kitaabamaakko.

²⁰Akaazim ixxi anno'isam lehukko. Daawiit beero'onnem waammamukko. Ixxi beyyonnem ixxi beet Hizqiyaas adil ihukko.