Read Hadiyya 2 Adilluwwi Kitaaba 17 Bible Online

2 Adilluwwi Kitaaba 17 - Hadiyya bible

2 Adilluwwi Kitaaba 17

¹Akaaz Yihudanne adil ihu tommonnee la'm hiinchonnee Eela'i beet Hoose'i Isra'eelanne adil ihukko; ixxi heechchi beyyom Samaare'ennetti issaa honsi hiincho gassukko.

²Ixxim jor baxo baximminne Waa'a kichche'isukko; ihukkaarem ixxi jor bax ixxeensi illageen hee'llo'i Isra'ee'l adilluwwi baxxo'aanni qax hee'ukkoyyo.

³Aasoo'l adil Salminaasoor oramu ammane kaa'amu bikkina anga uwwaa maarag hundam gibirimma asheerukko.

⁴Ihukkaarem hofqax hiinchuwwiinsi lasonne adil Hoose'i Soo'i yakkam Gibxi adi'l beyyo manna asse'aa hara'mmoo'isina xa'mmukko; maarag hundam Aasoo'l adilina uwwam hee'u gibirom miqimma sabukko. Salminaasoor ee woshsha macceesu ammanenne Hoose'a amadiisaa karaxxi mine aagisukko.

⁵Ee lasage Salminaasoor Isra'ee'lanne weeraraa Samaare'e sas hiinchina kibbukko.

⁶Hoose'i adil ihu honsi hiinchonne Salminaasoor kaa'aa Samaare'e amadukko. Isra'ee'l minaadabam qeefadaa Aasoo'l uulla massukko. Ixxuwwiinsim mat qaxa Halaah beero'onne hofqaxam Goozaa'n uullanne yoo Haboor daajji gadanonne ee'isam mulli keeno Meedoo'n beero'uwwanne wiiddantamisa issukko.

⁷Mashka'oomim Isra'ee'l minaadab Gibxi agiddaniinsi fissaa neeyyaxxi uulla awwonsu Waa'a xadda'a mulli waa'uwwina otossimminne Waa'a kichche'isso'i bikkinatte.

⁸Isra'ee'l minaadab Waa'i ixxuwwi illagiinsi hollaa fissu mulli minaadaphphekaa Isra'ee'l adilluwwikaa jor losano awwonto'i bikkinatte.

⁹Ee'isam Isra'ee'l minaadab ixxuwwi Moollanni Waa'i saboo luwwi hundam issito'o. Ixxuwwi hee'llam hoffi gattuwwiinsi ki'isaa lob beero'onne afeebe'e ixxuwwi beero'uwwanne hundannem qophpha'n waa'ina otossakkam beyyuwwa baxxo'o.

¹⁰Duunnuwwannee haqqi lugum hundannee ki'n utubbuwwaa Asheera yakkam qophpha'n waa'i misilluwwaa uullisso'o.

¹¹Waa'i xoqolaa uulliinsi fissu mulli minaadaphphi losano awwonta'a ee minaadaphphi kiti'm beyyuwwi hundannem aduruusa wiriissito'o. Ee ixxuwwi jor baxxuwwinne hundinnem Waa'a quuqisso'o.

¹²Waa'i qophpha'n waa'ina otossitambee'isa ijaajukkoka hundam gindito'o.

¹³Waa'im «Jor googiinsi daba'llehe i awwaadaaninnee hiraagaaninnee gaassi ki'nnuwwi anno'inaa ki'nnuwwinaa uwwummi ijaajonnee seerannee kitaabamu ijaajo hundam eggellehe» yita'a Isra'ee'llaaninaa Yihuxxi minaadabinaa kuttam asse'amaanoo hiraagaanoo asse'aa hee'ukko.

¹⁴Ihukkaarem ixxuwwi ijaajanteena hasso'oyyo; ixxuwwi Moollanni Waa'anne amma'nnitobee'i gaassi anno'isam wodan duudaakkoo keen ikko'o.

¹⁵Waa'ika seera gindito'o; gaassi anno'inne aagu hidi'l sagaram egetto'oyyo; ege'llitamisina qoxxisaa kuru woshshannem zebereyito'o. Qophpha'n waa'uwwina otossimminne haashaaranto'o; mulli minaadaphpheka jor kobi'lla awwontambee'isina Waa'i ijaaju ijaajo gindita'a ixxuwwi kululleetanne hee'llam minaadaphphi losano awwonto'o.

¹⁶Ixxuwwim Moollanni Waa'ika ijaajo hundam gindita'a otossiteena lam adduwwi misila worqinne baxxa'a uullisso'o; ee'isam Asheera yakkam qophpha'n waa'i misilam baxxo'o; boollaankina otossito'o; Ba'aala yakkam waa'inam awwaadaan ikko'o.

¹⁷Ee waa'uwwinam ixxuwwi ooso landaa goonaa shokkiisakka'a hincaa'akkam kitim issita'a hincaa'llo'o; lehu manna weeshsham kee'nnekaa kiiraa'nnekaa woshsha aa'llo'o. Waa'i saboo jor luwwi hundinam gaga higissa'a uwwita'a Waa'a quuqisso'o.

¹⁸Waa'i Isra'ee'l minaadabanne quuqaa Yihuxxi minaadaba gatisaa Isra'ee'l minaadaba bi'isukko.

¹⁹Ihukkaarem Yihuxxi minaadab Isra'ee'l minaadaphphisam mulli losano awwanto'o bagaan ixxuwwi Moollanni Waa'ika ijaajo egetto'oyyo.

²⁰Ee bikkina Waa'i Isra'ee'l ooso hundam ixxi illagiinsi bi'lleebe'i afeebe'e ixxuwwi diina'ina higisaa uwimminne guzumo'ukko.

²¹Waa'i Isra'ee'l minaadaba Ayihuxxi minaadabiinsi annanni issaa lasage Isra'ee'l minaadab Naabaax beeto Yoorbi'aama doo'llita'a adil issito'o. Yoorbi'aamim ixxuwwi Waa'iinsi annanni ikka'a kee'mmaalli baaxiilo baxxamisa issukko.

²²Ixxuwwim Yoorbi'aam baxam hee'u baaxiilo hundam baxxo'o bagaan Waa'i kollonne daba'llito'oyyo.

²³Waa'i ixxena awwaadaan ikko'i hiraagaaninne qoxxisaa kuraa hee'ukkisam ixxi illagiinsi bi'iseebe'i afeebe'e daba'llito'oyyo. Ee bikkina Isra'ee'l minaadab kaballi afeebe'e hee'llam Aasoo'l uulla qeefadanta'a matto'o.

²⁴Aasoo'l adil Kuta, Aawa, Haamaataa Safaarwaayimaa yamantam Baabiloo'n beero'uwwanne hee'llam hee'llo'i hanqo'i Waa'a laqqambee'i minaadaba woraa hollanta'a matto'i Isra'ee'l minaadab hee'llo'i Samaare'i beero'uwwanne hee'llamisa issukko. Ixxuwwim ee beero'uwwa lago aa'lla'a hee'imma asheetto'o.

²⁵Ixxuwwi ee uullanne hee'imma asheetto'aarem Waa'ina otossito'oyyi hee'ukko. Ee bikkina Waa'i hobba asse'aa ixxuwwiinsi hofqaxam iiqansaa shoo'isa issukko.

²⁶Aasoo'l adilinam «Samaare'enne hee'llamisa issitti minaadab ee uulli waa'ika seera laqqobee'i bikkina ixxuwwa iiqansaa shoo hobba asse'aakko» yoo assi afukko.

²⁷Adilim «Neese qeefandaa eembummi Isra'ee'l qeessuwwiinsi mato ee uulla asse'llehe; ixxim ee uulla daba'llaa maraa ee uulli waa'ika seera minaadabina losisona» yukko.

²⁸Ee bikkina Samaare'iinsi qeefadamaa hee'u mat Isra'ee'l qeessichchi daba'llaa maraa Beeteelanne afuurukko. Ee uullannem minaadab Waa'ina hinkid otossimmi hasisooda'e losisukko.

²⁹Ihukkaarem annanni annanni beero'onne hee'llo'i minaadab ixxuwwi gaqqi waa'uwwa baxxa'a Isra'ee'l minaadab duunnuwwanne otossiteena axissa'a hee'llo'i beyyuwwanne dissito'o.

³⁰Ee'isinne Baabiloo'n minaadab Sukootbaanoot, Kut minaadab Neergaal, Haamaat minaadabim Iishiima,

³¹Aawa'i minaadab Niibihazinaa Taartaaqaa yakkam waa'uwwaa ixxuwwi gagina baxxo'o. Safaarwaayim minaadab odim Adiraameeleekaa Anaameeleekaa yakkam waa'uwwina ixxuwwi ooso shokkiisakka'a hincaa'akkam kitim issita'a hincaa'llo'o.

³²Oo minaadab hanqo'i Waa'inam otossitam hee'llo'o; ihukkaarem annannichchim ixxuwwi moolli losano awwonimminne duunnuwwanne otossitam waa'uwwina kitima hincaa'llu'uuyyi awwaaddam qeessuwwa doo'llito'o.

³³Ee'isinne Waa'inaa gaassi hee'llo'i losano awwonimminne qophpha'n waa'uwwinaa otossitam hee'llo'o.

³⁴Oo minaadab kabad afeebe'em ee losano awwontu'uuyyi yo'o; Waa'inam hanqo'isinne otossitamoyyo; Waa'i Isra'eela yu Yaaqoob shumo'ina uwwu ijaajoo seeraa egettamoyyo.

³⁵Waa'i Isra'ee'l minaadabinne hidi'l sagara aagaa «Qophpha'n waa'uwwina otossitakkotte; ixxuwwinam awwaaddakkottee kitima hincaa'llakkottee.

³⁶Lob malaayyinnee qoxxaalli i wodinnee Gibxiinsi fissummi iina Waa'ina ijaajammehe; ki'nnuwwi otossimmii kitima hincaa'immii hasisookkok xale'i iinatte.

³⁷An ki'nnuwwina kitaabaa uwwummi seeraa ijaajoo hundi ammanem egellehe; qophpha'n waa'uwwinam otossitakkotte.

³⁸An ki'nnuwwinne aagummi hidi'l sagaram xaddakkotte; qophpha'n waa'uwwinam otossitakkotte.

³⁹Eese ki'nnuwwi Moollanni Waa'a baddehe; ki'nnuwwam Anim ki'nnuwwa diina'i angiinsi gatisoommo» yaa ijaajaa hee'ukko.

⁴⁰Ihukkaarem oo minaadab ixxuwwika gaassi losano awwonto'o bagaan macceesso'oyyo.

⁴¹Ee bikkina oo minaadab eehido'isinne Waa'inaa qophpha'n ixxuwwi waa'inaa laminam otossitam hee'llo'o; ixxuwwi shumo'im kabad afeebe'em ee'isa issitu'uuyyi yo'o.