Read Hadiyya 2 Adilluwwi Kitaaba 18 Bible Online

2 Adilluwwi Kitaaba 18 - Hadiyya bible

2 Adilluwwi Kitaaba 18

¹Eela'i beet Hoose'i Isra'eelanne adil ihu saxxi hiinchonne Akaaz beet Hizqiyaas Yihudanne adil ihukko.

²Hizqiyaas adil ihu ammane umur lamiyyee onti hiinchoo ihaa hee'ukko; heechchi beyyom Yerusaaleemanne issaa lamiyyee honsi hiinchoo gassukko. Ixxi amak summi Abiyat ihaa Zakkaariyaasina landichchotte hee'llo'o.

³Ixxim ixxi lobanni adil Daawiitisam Waa'a liiransoo baxo baxukko.

⁴Waa'a laqqambee'i minaadab otossitam beyyuwwa bi'isukko; ki'n utubbuwwa iiqansukko. Asheera yakkam meentichchi waa'i misilluwwa hundam muransukko. Isra'ee'l oos ee amman afeebe'e aduruusa wiriissitam hee'llo'i bikkina Muse'e naasinne baxaa hee'u Nahushtaana yakkam hamashshichchi misilam xaansukko.

⁵Hizqiyaas Isra'ee'l Moollanni Waa'anne amma'nnamukko. Yihuxxi adilluwwiinsi Ixxe'nnookkok ixxeenninsi illageenim ihukko lasageen hee'ukkoyyo.

⁶Hizqiyaas Waa'anne amma'nnamaakkoohan hee'u bikkina ixxi googiinsi qee'llu amman hee'ukkoyyo. Waa'i Muse'ena uwwu ijaaj hundam ersa egeram hee'ukko.

⁷Ee bikkina Waa'i ixxena hara'mmam hee'u bikkina ixxena luwwi hundim taaphanam hee'ukko; Hizqiyaas Aasoo'l adilina bangujjaa gibirimma sabukko.

⁸Filisxee'm mannam hoffi hegeegguwwiinsi ki'isaa lob beero'o Gaaza'aa ixxi kululleetanne yoo uulluwwaa hundam kaa'aa amadukko.

⁹Hizqiyaas adil ihu soo'l hiinchonne oohim Hoose'i Isra'ee'l uullanne adil ihu lama'l hiinchonne Aasoo'l adil Salminaasoor Samaare'i beero'o kibukko.

¹⁰Samaare'e kibbu saxxi hiinchonne hundoomam guullaa amadukko. Oohim Hizqiyaas adil ihu loh hiinchonnettee Hoose'i adil ihu honsi hiinchonnettee.

¹¹Aasoo'l adil Isra'ee'l minaadaba qeefadaa ixxi uulla massaa Halaah beero'onne, Goozaa'n uullanne hee'oo Haboor daajji gadanonnee Meedoo'n beero'uwwannee binbinnaa'aa hee'llamisa issukko.

¹²Oo hundim ihukkok Isra'ee'l minaadab ixxuwwi Moollanni Waa'ina ijaajantobee'i bikkinatte; Waa'i ixxuwwinne aagu hidi'l sagara gindito'ookko; Ixxena awwaadaanchi ihu Muse'enne uwwu ijaajom egetto'oyyo.

¹³Hizqiyaas adil ihu tommonnee soo'l hiinchonnee Aasoo'l adil Sanaakireem Yihuxxeka girbamaakkoo beero'uwwa ka'aa amadukko.

¹⁴Yihuxxi adil Hizqiyaasim Laakiishanne hee'oo Sanaakireemina «An keese hawwodaammo; at eese xa'mmitoo luwwi hundam an kiina miqoommo ora uullise» yaa asse'ukko. Adilim «An hasoommok tommi kum kiilo'i biraa mat kum kiilo'i worqaa iina asse'lloo'isinatte» yaa dabaraa asse'ukko.

¹⁵Hizqiyaasim Waa'i minennee adilla'n minennee hee'oo bira hundam wixxaa'aa asse'ukko.

¹⁶Ee'isam Yihuxxi adil Hizqiyaas Keesammi Mi'n gooccuwwannee xuffuwwannee goolabaa hee'u worqa ki'isaa adil Sanaakireemina uwwukko.

¹⁷Aasoo'l adil sas gaaxxi awwonsaaninne qoxxaalli gogota Laakiishiinsi Yerusaaleema maraa adil Hizqiyaasa qasona asse'ukko; oo gogot Yerusaaleema afukkisam delbi wo'i daadoo beyyi gadaninne eddechcha aanshitam kee'n abuulli uulla massoo googonne uullukko.

¹⁸Ee lasage adil Hizqiyaasa weeshisso'o; Hizqiyaasim ixxi gassaa'nneka saso asse'ukko; oo keenim adilla'n mi'n gassaanchi hee'u Hiliqiy beet Eeliyaaqeematte, adilla'n mi'n kitaabaanchi hee'u Sheebinaanattee adilla'n mi'n doo'n gassaanchi hee'u Asaaf beet Yoo'ahattee hee'llo'o.

¹⁹Aasoo'l gaaxxi awwonsaaniinsi mat «Adil Hizqiyaasina ‹Asoo'l at kaa'nna amma'nnantitti luwwi maha?

²⁰Woshshik lobakat orina qooroomaa malaayyee uwwoo labissaatennihe? Aasooranne bangujjittok kiina ayyi hara'mmookko yitaate?

²¹Gibxi adil iina hara'mmookko yitaa sawwitaattoolas xaam shomboqo'o sikke'oo manchisa; oohim iiqamaa shiincaar anga omassoo bikkinatte. Gibxi adilanne amma'nnamoo keen hundinam ee'isa› yoolla yi'llehe» yaa asse'ukko.

²²Ee'isam «At ki Moollanni Waa'i kiina hara'mmookko yitaa sawwitoollannihe? Eehid ihoobee'isa Waa'ika keesamaakkoo beyyuwwaa kitima hincaa'akkam beyyuwwaa bi'issaa ‹Yihuxxekii Yerusaalee'm minaadabii otossimmi hasisookkok Yerusaaleemanne yoo mexxo'i mat kitima hincaa'akkam beyyonnette› yitaatto.

²³Oono'o, ka an keese adi'l summinnette ihaa orina xa'mmoommo; saa'lleena xanoo manna siiddeena xantoohan ihulas lam kum farado kiina uwwoommo!

²⁴At amma'nnantoottok ‹Gibxi uulli faraxxi gaare'uwwannettee faradonnettee ihukkuuyyi› i moollanni gaaxxi awwonsaanniinsi hoffe'oohaanninne hinkid uullixxanteena xantootto?

²⁵An ka uulla bi'iseena firummok Waa'i ijaajoo'nnim labissaahinnihe? Waa'i eese ee uulla mattaa bi'ise yaakko» yukko.

²⁶Ee lasage Eeliyaaqeem, Sheebinaanii Yoo'aahii ee gaaxxi awwonsaanchina «Neese ki awwaadaan lanqeena xannoommi bikkina Sooriy uulli suuminne woce. Ka ooxxi hanenne yo'i manni macceessam Ibro'isinne woccitte» yito'o.

²⁷Oo gaaxxi awwonsaanchim «Aasoo'l adil ka hundam ki'nnuwwinaa ki'nnuwwi adilinaa xale'e wocoommisina eese asse'ukkoka labissakka'attennihe? An wocoommok ki'nnuwwisam ixxuwwi gaqqi qoxxaalli shuma ittamanee wo'i shuma aggamanee ihu bikkina ka ootanne afuutto'i manni hundim macceessonatte» yaa dabarukko.

²⁸Ee lasage oo Aasoo'l gaaxxi awwonsaanchi afuuru beyyiinsi ki'aa uullukko. Ixxi sagaram haraassaa Ibro'isinne «Aasoo'l adi'l woshsha macceessehe!

²⁹Hizqiyaas ki'nnuwwa gatiseena xanoobee'i bikkina ixxena hore'em qawwisantakkotte;

³⁰Hizqiyaas ‹Waa'anne amma'nnammehe; ixxi ki'nnuwwa gatisookko; ni beero'im Aasoo'l gogoxxi anganne aagoobee'isa issookko› yukkuuyyi alallaatoo woshsha macceessakkotte.

³¹Hizqiyaas woshsha macceessakkotte; Aasoo'l adil ‹Iina anga uwwitakka'a ijaajantakkolas ki'nnuwwi kaassakko'i woyi'nnekaa oda'ikaa misha ittakkamo; hintakko'i bariinsim wo'o aggakkamo› yoolla.

³²Oohim ki'nnuwwi uullisam woyi'n diqaas hurbaat, woyinaa weeraa kaasakkam beyyii marabii wo'mmaakkoo uulla masseebe'e letakkambee'isa foorinne hee'llakkonatte. Hizqiyaas ‹Waa'i ki'nnuwwa gatisookko› yaa qawwiisoone.

³³Mulli minaadaphphi waa'uwwiinsi hinkim Aasoo'l adi'l angiinsi ixxuwwi uulla gatisukkok yoohonnihe?

³⁴Eehan ihulas Haamaatikii Arfaad waa'uwwii hannonne yo'o? Safaarwaayimik, Heenaa'ikii Iiwa'i waa'uwwii hanno affo'o? Ixxuwwiinsi matim Samaare'e i angiinsi gatisseena xanta'a hee'llo'onnihe?

³⁵Ee uulluwwik hundikim waa'uwwi ni adi'l angiinsi ixxuwwi uulla gatisseena xanto'i amman yoohonnihe? Eehannah ki'nnuwwi ‹Waa'i Yerusaaleema gatisookko› yitakka'a sawwitakkamok hinkidette?» yukko.

³⁶Minaadabim adil Hizqiyaas ixxuwwa ijaajaa hee'ukkisinne ma'llichchom woccambee'isa cawwito'o.

³⁷Ee lasage Eeliyaaqeem, Sheebinaanii Yoo'ahii kichche'lla'a ixxuwwi eddechcha dereetto'o; adil Hizqiyaas beyyom matta'a Aasoo'l uulli gaaxxi awwonsaanchi wocu woshsha hundam kutto'o.