Read Hadiyya 2 Adilluwwi Kitaaba 19 Bible Online

2 Adilluwwi Kitaaba 19 - Hadiyya bible

2 Adilluwwi Kitaaba 19

¹Adil Hizqiyaas ee woshsha macceesaa kichche'aa ixxeka eddechcha dereerukko; xiddi eddechcham edde'aa Keesammi Mine marukko.

²Ee lasage adi'l mi'n gassaanchi ihu Eeliyaaqeem, adil mi'n kitaabaanchi Sheebinaanii qeessuwwi awwonsaanii xiddi eddechcha edde'lla'a Aamoox beet hiraagaanchi Issaayyaas beyyo mattona asse'ukko.

³Issaayyaasinam «Kaballi kee'mmaalli hawwi balla; guzumo'ii sholle'nnii neesenne afeenatte; qattam amman afaa qatteena malaayyi bee'u meentichchosa inkaammo.

⁴Asoo'l adil hee'oo Waa'inne game'llamona ixxeka gaaxxi awwonsaancho asse'aakko; ki Moollanni Waa'i eekka macceesaa ixxo guzumo'eena xanookko; ee bikkina gatto'i ka ni minaadabina Waa'a uunxe› yaakko» yita'a kutto'o.

⁵Issaayyaasim adil Hizqiyaasa asso aa'aa lasage

⁶«Waa'i kiina ‹Ki'nnuwwa gatiseena xanooyyo› yitu'uuyyii eese game'llitu'uuyyii Aasoo'l gaaxxi awwonsaan woccam sha'llancha baddititte.

⁷Oono'o, an ixxena dambaqisoo ayyaana asse'oommo; ixxim uulla daba'llaa maroo'isaa ixxi gaqqi uullannem bisa'inne aphphisamaa lehoo'isaa issoommo› yoolla» yukko.

⁸Aasoo'l gaaxxi awwonsaanchi, adil Laakiisha yakkam beyyiinsi ki'aa Libina'i beero'onne orameena marukkisa macceesaa ixxenne a'llameena ee beyyo marukko.

⁹Tophphe'i adil Tiirihaaq awwonsoo Gibxi gogot ixxuwwa qaseena waarukkuuyyi yoo'isa Aasoo'l adil macceesaa ee ammanem Hizqiyaas beyyo

¹⁰«Yihuxxi adil Hizqiyaasa, at amma'nnantoo Waa'i ‹Yerusaaleem Aasoo'l adil anganne ubooyyo› yaa keese qawwisoone.

¹¹Aasoo'l adil mat uulla bi'iseena hasoo ammane hundam mah issooda'e macceessaatto. Atdu xottoottoka labissaatennihe?

¹²Gaassi iyyanno'i Goozaa'nneka, Kaaraa'nnikaa Reexeefikaa beero'uwwa bi'isso'ookko. Talaasaaranne hee'llam Ede'n minaadaba shito'ookko. Oo hundim ihukkuuyyi ixxuwwi waa'uwwiinsi matim gatiseena xanukkoyyo.

¹³Ee'isam Haamaatik, Arfaadik, Safaarwaayimik, Heenaa'inikii Iiwa'ikii beero'uwwi adilluwwi hannonne yo'o?» yoo assikitaaba asse'amaa'n anganne asse'ukko.

¹⁴Adil Hizqiyaasim ee askitaaba asse'amaaniinsi aa'aa qananaa'aa Keesammi Mine massaa Waa'i illagenne biddiqaa'aa

¹⁵«Isra'ee'l Waa'a! Kiruubeela yakkam asse'amaa'n hanenne afuuttitti Moollanni xale'i atette; ka uulli adilluwwam awwonsitoottok atette; uullaa iimanee qooccittok atette.

¹⁶Kabadem Waa'a! neesenne afu hawwo hundam moo'e; keese hee'lloo Moollanni Waa'a gamme'llukkuuyyi Sanaakireem wocu sha'llancha hundam macceese.

¹⁷Waa'a! Aasoo'l adilluwwi lobakat minaadabaa uullaa bi'isso'is hanqa.

¹⁸Haqqaa kinaa cabbarakka'a baxakko'i malaaybee'i waa'uwwa giirinne shokkiissa'a bi'isso'ookko.

¹⁹I Moollanni Waa'a! Xale'i at Moollanni ikkittisa uulli hundannem yo'i adilluwwi laqqamisina kaba Aasoo'l minaadaphphi angiinsi neese gatise» yaa uunxukko.

²⁰Ee lasage Aamoox beet Issaayyaas adil Hizqiyaasina «Isra'ee'l Moollanni ihu Waa'i ‹Aasoo'l adil Sanaakireem sha'llanchi bikkina uunxitti uunxato macceesaammo.

²¹Ee'isam Sanaakireemina «Xiyoo'n baajaammuwwi keese gaddamoo keesennem osattamo; at gibbittuuyyi Yerusaalee'm landi moo'lla'a horoore heekkeessamo.

²²At game'llittokii iggittokii ayyette? Shaaqqaa woccittokii sholliissaa moo'llittokii ayyette? Isra'eelina keesammi ihummi eesette.

²³Ee'isam ki asse'amaano asse'llaa ‹An faraxxi gaarre'uwwinne lob duunnuwwanne firaammo; Liibaanoos ludom afaammo; lob qeeraa'l liibaanoos haqquwwaa doo'l digibbuwwaa muraammo. Tochchiinsi tochchoo tiiwwi haqqoroo afaammo.

²⁴Allaggi uullanne bare hinaa wo'o agaammo; i konte'innem hancaacaa Gibxi uulli daajjuwwa gokkisaammo› yitaa amaadinne Waa'inne uullixxantaatto.

²⁵Macceessittoyyonnihe? An eraarem sawwummokaa qoodummokaa kaba issoommuullak anette. At girbamaakkoo beero'uwwa gindansitaa ubbuussoo'isa issummok anette.

²⁶Ee uullanne hee'llo'i minaadaphphek hundikim malaayyi hoogukko; hundim muggita'a jallito'o; udma'i uullanne mutu hixisa, mi'n iimanenne mutu bochchisaa quubaa gogu hurbaaxxisaa ikko'ookko.

²⁷An kiikka aagimma, firimma, uullitoo'isa, afuuttoo'isaa eese sabbittisaa la'oommo.

²⁸Eese sabbittisaa amaaddittisaa la'aammo; kaba ee bikkina an ki sanenne guma'a ki aqonnem hakkamma issaa waattitti googinnem dabaroommo» yukko.

²⁹Ee lasage Issaayyaas adil Hizqiyaasina «Eehanninam mare'i ihoo'isina ka maaragee la'm maaragee gobbe'e ittakkamo. Ihukkaarem saxxi maarage ki'nnuwwi gaqqi hurbaata wixxakka'a atoota wixxaa'llakkamo; woyinam kaassakka'a misha ittakkamo.

³⁰Bichchiinsi gatu Yihuxxi minaadab haqqisa uullanne xapha kaasaa misha mishookko.

³¹Yerusaaleemannee Xiyoo'n duunannee bichchiinsi xotta'a gatto'i minaadab hee'llamo. Gogoxxi Moollanni Waa'ik to'achchi eekka issookko» yukko.

³²Waa'i Aasoo'l adilina «Sanaakireem ka beero'o hore'em aagooyyo; mat xiyyam ihuta'n darabooyyo; agira amadu gaadaanchim ixxonne hincooyyo; buchchi dichchirinnem kibbamooyyo.

³³Ixxi ka beero'o aagoo'nnim waaru googinnem daba'llaa marookko. Kaka wocummok an Waa'a.

³⁴I gaqqi lombi bikkinaa i awwaadaanchi Daawiitinaa uwwummi saga'l neeyyaxxi bikkina ka beero'ina an i gagoomim uullixamaa gatisoommo› yoolla» yukko.

³⁵Ee hiimom Waa'i asse'amaanchi Aasoo'l gaadaan wiiddanto'i beyyo maraa 185,000 gaadaanoo shukko; la'm balli daram manni ki'aa moo'oohaare wiidda'n beyyonne leesh wo'mmaa hee'ukko.

³⁶Ee lasage Aasoo'l adil Sanaakireem laso daba'llaa Naanaawe'i beero'o maraa eekke'enne afuurukko.

³⁷Ixxim mat balla Niisirooka yakkam qophpha'n waa'i minenne aagaa otossukkuuyyim ixxi oosiinsi lam Adiraameeleekii Saareexeerii bisa'inne shito'o. Ixxuwwim Araaraata yakkam uulla gibba'a matto'o. Ixxi beyyonnem ixxi beet Asiraad adil ihukko.