Read Hadiyya 2 Adilluwwi Kitaaba 20 Bible Online

2 Adilluwwi Kitaaba 20 - Hadiyya bible

2 Adilluwwi Kitaaba 20

¹Ee maarage adil Hizqiyaas kee'mmaallisa jabbaa leheena ihaa hee'ukko; Amoox beet hiraagaanchi Issaayyaas ixxo moo'eena maraa «Waa'i ‹Letootto bagaan ka jabbiinsi fayye'lloobee'i bikkina ki mine axixxe› yoolla» yukko.

²Hizqiyaasim gortanni kollonne daba'llaa

³«Waa'a! Amma'nnanchinnee xabbeenoominnee kiina awwaadummokaa keese liiranseenam yakummokaa sawwihe» yaa Waa'a uunxaa lasage qaraaraallisa wi'llukko.

⁴Issaayaas adi'l illagiinsi firaa adilla'n mi'n lambe'enne yoo wixxixxi beyyo higoo'nnim Waa'i ixxena

⁵«I minaadaba awwonsoo adil Hizqiyaas beyyo daba'llitaa mattaa ‹An gaassi kiyyanni Daawiit Moollanni Waa'i ki uunxato macceesaammo; ki indiiddam moo'aammo; an keese fayyiisoommo. Sas balliinsi lasage Keesammi Mine mattootto.

⁶Ki umurannem tommoo onti hiinchoo edoommo. Keesee ka Yerusaalee'm beero'oo Aasoo'l adi'l angiinsi gatisoommo. I lombi bikkinaa i awwaadaanchi Daawiitina uwwummi neeyyaxxi saga'l bikkinaa ka beero'o egeroommo› yoolla yitaa kure» yukko.

⁷Ee lasage Issaayyaas adi'l awwaadaanina oda'i mishika xuruuro'o eebbehe» yukko. Ixxuwwim eebba'a madanne issito'aare adil fayye'ukko.

⁸Adil Hizqiyaasim «Waa'i eese fayyiisaa sas ayyaamiinsi lasage Waa'i Keesammi Mine mareena xanoommisa mahinne la'eena xanoommo?» yaa Issaayyaasa xa'mmukko.

⁹Issaayyaasim «Waa'i uwwu neeyyaxxi sagara wonshoohan ihukkisina ixxi gagoomim mare'e uwwookko. Eehannah at kaba doo'llitoottok haf tommi gardabba illage higonannii laso daba'lloo'isinatte?» yaa xa'mmukko.

¹⁰Hizqiyaasim «Haf tommi gardabba illage maroo'isa issimmi sholle'ookko. Ee bikkina tommi gardabba laso daba'lloo'isa isse» yukko.

¹¹Ee lasage Issaayyaas Waa'a uunxukko; Waa'im adil Akaaz ammane kurona baxisu gardabbi hanenne hee'u haf tommi gardabba laso daba'lloo'isa issukko.

¹²Ee ammanem Baabiloo'n adil Balaadaan beet Maroodaak Balaadaan adil Hizqiyaas jabbaa hee'ukkisa macceesaa irifo'inne maqirem asso asse'ukko.

¹³Hizqiyaasim asse'amaa waaru manna liiranchinne aa'ukko; adilla'n mu'uta dissakkam minenne yoo amaxxa hundam biraa worqaa, enjuwwaa shito'oo, o'l mu'utaa hundamii moo'isukko. Adilla'n mi'n mu'uta dissakkam minennem ihukko ixxi adilla'n gassi uullanne hannonnem yoo amaxxiinsi moo'isubee'i luwwi mahim hee'ukkoyyo.

¹⁴Ee ammanenne hiraagaanchi Issaaysaas adil Hizqiyaas beyyo maraa «Ku manni waatto'ok hanniinsette? Kiindu maha kutto'o?» yaa xa'mmukko. Hizqiyaasim «Ixxuwwi waatto'ok Baabiloona yakkam qee'l uulliinsette» yaa dabarukko.

¹⁵Issaayyaasim «Adilla'n minenne maha moo'llo'o?» yaa xa'mmukko. Hizqiyaasim «Hundem luwwam moo'llo'ookko. Adilla'n mu'uxxi minenne yoo amaxxiinsi ixxuwwina moo'isoo'n urummi luwwi mahim bee'e» yukko.

¹⁶Issaayyaasim adilina «Hundam xanoo Waa'i

¹⁷‹Gaassi kiyyanno'i kaballi afeebe'e adilla'n minenne wixxaa'llo'i amaxxi hundim fii'amaa Baabiloo'n uulla massamoo balli waarookko; mahim gatooyyo.

¹⁸Ki shumo'ikim mat mat keen Baabiloo'n uulla qeefadanta'a marimminne Baabiloo'n adilla'n minenne muleessa'uwwi ikka'a awwaaddamisa issakkamo» yukko.

¹⁹Adil Hizqiyaasim ixxi adilla'n doolli xumminne higoo'isa la'u bikkina «Waa'iinsi asse'antaa iina kuttitti woshshi danaamo» yaa dabarukko.

²⁰Adil Hizqiyaasik geedoomman, jaalo'uwwaa wo'i delbuwwaa baxisukkis, Yerusaalee'm beero'onne wo'o aagiseena uulli worinne boohe'e baxamukkisii mulli baxii hundim Yihuxxi Adilluwwi Aganni Kitaabanne kitaabamaakko.

²¹Hizqiyaasim lehukko; ixxi beyyonnem ixxi beet Minaase adil ihukko.