Read Hadiyya 2 Adilluwwi Kitaaba 21 Bible Online

2 Adilluwwi Kitaaba 21 - Hadiyya bible

2 Adilluwwi Kitaaba 21

¹Minaase Yihudanne adil ihu ammane ixxek umur tommoo lam hiinchoo hee'ukko; ixxi heechchi beyyom Yerusaaleemanne issaa ontayyee onti hiinchoo gassukko. Ixxi amakim summi Heefxiibatti hee'ukko.

²Waa'i Isra'ee'l oos illagiinsi xoqolaa bi'isu mulli minaadaphpheka shigigaa'oo losano awwonaa Minaas Waa'a kichche'isukko.

³Ixxi anni Hizqiyaas gindaa hee'u duunnuwwanne yoo otossakkam beyyuwwa dabaraa baxukko; Isra'ee'l adil Aki'aabisam Ba'aala yakkam qophpha'n waa'ina kitima hincaa'akkam beyyoo Asheera yakkam meentichchi waa'i misilaa baxukko; Iima'n boollaankinam otossukko.

⁴Waa'i «Yerusaaleemanne i summa hee'isoommo» yu Keesammi Minenne qophpha'n waa'uwwina kiti'm beyyuwwa baxukko.

⁵Keesammi Mi'nnaannonne lamem wixxixxi beyyonnem iima'n boollaankuwwina otossakkam kiti'm beyyuwwa baxukko.

⁶Ixxi gaqqi beetom kitim issaa hincaa'ukko; ixxi gagim gennaanchoo karo'aanchoo ihaa kiiraaniinsii wiidda weeshsham keeniinsii sogitano xa'mmam hee'ukko; eehido'i jor baxo baximminne Waa'a quuqisukko.

⁷Keesammi Minennem Asheeraa yakkam qophpha'n waa'ika misila dissukko; oo Keesammi Minim, Waa'i Daawiitinaa ixxi beet Salamooninaa «Ku Yerusaaleemanne yoo Keesammi Min iina heer heerina otossakkamisina tommii lamem Isra'ee'l sulli gattam uulli hundiinsim doo'llaammoo beyyo.

⁸Isra'ee'l minaadab iina ijaajantolasii i awwaadaanchi Muse'ena uwwummi seeram egettolasii gaassi ixxuwwi anno'ina uwwummi ka uulliinsi xoqolanta'a bi'llamisa issoommoyyo» yaa kuraa hee'ukkane.

⁹Ihukkaarem Ayihuxxi minaadab Waa'ina ijaajanto'oyyo. Hore'oomam Isra'ee'l minaadab illagenne gafe'llu'uuyyi waatto'i ammane Waa'i ixxuwwi illagiinsi xoqolaa bi'isu hanqo'i Waa'a laqqambee'i minaadab issitam hee'llo'aanniinsi lophphoo baaxiilonne Minaase awwonsukko.

¹⁰Waa'im ixxi awwaadaan ikko'i hiraagaaninne

¹¹«Minaas lobakata haashaaramaakkoo baxo baxukko; oohim gaassi Kana'aa'n minaadab baxxo'aanniinsi hundiinsim lophphoo jor baxo baxukko; Yihuxxi minaadabam ixxi baxu qophpha'n waa'uwwinne baaxiilonne awwonsukko.

¹²Ee bikkina Isra'ee'l Moollanni Waa'i «Oono'o, macceesukkok hundam muggisaa jallaa'oo kee'mmaalli boobana Yerusaaleemannee Yihudannee eeboommo.

¹³Samaare'i uullaa Isra'ee'l adil Aki'aabaa ixxuwwi shumo'inne maqire guzumo'ummisam Yerusaaleemam guzumo'oommo; wocita aanshakka'a lasage qubbaa'akka'a dissakkamisa anim Yerusaalee'm minaadaba baaxiiliinsi aanshoommo.

¹⁴Bichchiinsi gatto'i i minaadabam diina'ina higisaa uwwoommo; oo keenim ixxuwwika amaxxa boggamoo qeefaddamoo.

¹⁵I minaadabanne ka hundam issoommi mashka'i gaassi ixxuwwi anno'i Gibxiinsi fitto'i ammaniinsi ki'isaa kabad afeebe'e baaxiilo baxxa'a eese kichche'isso'i bikkinattee quuqisso'i bikkinattee» yukko.

¹⁶Odim Minaase Yihuxxi minaadaba qophpha'n waa'ina otossitamisa issukkaanniinsi mulleka Yerusaalee'm beero'onne lobakat muccur mannika xiiga dunimminne Waa'i illagenne jor baaxiilo baxaakko.

¹⁷Minaas baxu mulli luwwii issu baaxiilii hundim Yihuxxi adilluwwi Aganni Kitaabanne kitaabamaakko.

¹⁸Minaasem lehukko. Adilla'n mi'n qash woronne «Uuza'i duubbi kaashshi beyyo» yakkam beyyonne waammamukko. Ixxi beyyonnem ixxi beet Amoon adil ihukko.

¹⁹Amoon Ayihuxxi uullanne adil ihu ammane ixxek umur lamiyyee lam hiinchoo hee'ukko; ixxi heechchi beyyom Yerusaaleemanne issaa lam hiincho gassukko; ixxi amam Yaaxib beero'i Haruux landichcho Mashulaamette hee'llo'o.

²⁰Amoonim ixxi anni Minaasisam Waa'i illagenne jor baxo baxukko.

²¹Ixxi annika jor kobi'lla hundam awwonukko; ixxi annisam qophpha'n waa'uwwina otossukko.

²²Gaassi ixxi anno'i Moollanni Waa'a lagukko; Waa'i sagarinam ijaajancha sabukko.

²³Ixxi gassaanim dollotta'a adilla'n minenne shito'o.

²⁴Ayihuxxi minaadabim Amoona shito'i manna guullita'a ixxi beet Iyyoosiyaasa adil issito'o.

²⁵Amoon issu mulli luwwi hundim Yihuxxi Adilluwwi Aganni Kitaabanne kitaabamaakko.

²⁶Amoon «Uuza'i duubbi kaashshi beyyo» yakkam waammi beyyonne waammamukko; ixxi beyyonnem ixxi beet Iyyoosiyaas adil ihukko.