Read Hadiyya 2 Adilluwwi Kitaaba 22 Bible Online

2 Adilluwwi Kitaaba 22 - Hadiyya bible

2 Adilluwwi Kitaaba 22

¹Iyyoosiyaas adil ihu ammane ixxek umur sadeenti hiinchi hee'ukko; ixxi heechchi beyyom Yerusaaleemanne issaa sadee mat hiinchoo gassukko; ixxi amam Booxqaat beero'i Adaay landichcho Yidiida'atti hee'llo'o.

²Iyyoosiyaas illagee'n ixxi anni Daawiitika er kobi'lla awwonimminnee Waa'i seerina hanqo'isa ijaajanchinnee Waa'a liiransoo baxo baxukko.

³Iyyoosiyaas adil ihu tommonnee sadeenti hiinchonnee Mashulaam beet Axaaliy beet ihu adilla'n mi'n kitaabaanchi Saafaana

⁴«Hundiinsi lob qeessichchi Hiliqiy beyyo mare; Keesammi Mine aagakkam gooc gadanonne kor kore minaadabiinsi diinate wixxaa'llam qeessuwwi kabad afeebe'e hinkaa'n diinate wixxaa'lloda'e la'isoo shallago'o amaddaa waare.

⁵Keesammi Mi'n baxaa'n awwonsaanina uwwitona; ixxuwwim diinatooma Keesammi Minenne gindamu beyyo baxxam keenina,

⁶anga qoor mannina, kina cabbattam keenina, kininne mine baxxam keenaa Keesammi Mine areesimmina haqqaa kinaa aa'llam keeninaa miqqona.

⁷Baxo awwonsim keen hore'em amma'nnanto'oo keen ikko'i bikkina ixxuwwa diinate hinkid fissitamda'e egerimmi hore'em hasisooyyo» yoo asso amadiisaa Keesammi Mine asse'ukko.

⁸Ee lasage Saafaan adiliinsi asse'amu ijaajo hundiinsi lob qeessichchi ihu Hilqiyina uwwukko; hundiinsi lob qeessichchi ihu Hilqiyim «See'l Kitaaba Keesammi Minenne siidummo» yaa Saafaanina uwwukko. Saafaanim aa'aa qananaa'ukko.

⁹Ee lasage Saafaan adi'l beyyo daba'llaa maraa «Ki awwaadaan Keesammi Minenne hee'u diinate aa'lla'a ee areesimmi baxo awwonsaanina uwwito'ookko» yaa kurukko.

¹⁰Odim «Hundiinsi Lob qeessichchi Hilqiy siidaa iina uwwu kitaab kuno'o» yaa adilina qananaa'ukko.

¹¹Adilim See'l Kitaaba qananaa'ukkuuyyi macceesu ammanenne kichchechchinne ixxi eddechcha dereerukko.

¹²Ee ammanem qeessichchi Hilqiyina, Saafaan beet Ahiiqaamina, Miikaay beet Akboorina, adilla'n mi'n kitaabaanchi Saafaaninaa adi'l gassaanchi Asaayinaa

¹³«Gaassi niyyanno'i ka kitaabanne kitaabamu awwonsa aa'llobee'i bikkina Waa'i neesenne lobakata quuqaakko; ee bikkina anii Yihuxxi minaadabii ka siidamu kitaabanne yoo losano lanqeena xannoommisina mattakka'a Waa'a uunxehe» yaa ijaajukko.

¹⁴Hiilqiy, Ahiiqaam, Akboor, Saafaanii Asaayii Yerusaalee'mmaannonne haareechcho baxamu hegeegonne hee'llam hiraagaanchotti hee'llo'i Hulda'a xa'mmiteena matto'o; Harhaas beetina beet Tiiqiw beet ihu is aro'i Shaaluum Keesammi Mi'n eddechcha egeraanchi hee'ukko; ixxuwwim ee beyyonne ihu luwwi hundam ee hiraagaanchona kutto'o.

¹⁵Isem ixxuwwina «I beyyo asse'u manchi beyyo daba'llitakka'a mattakka'a Isra'ee'l Moollanni Waa'i

¹⁶‹Yihuxxi Adil qananaa'u kitaabanne kitaabamu saga'llisanne Yerusaaleemaa ka minaadabaa guzumo'eenatte.

¹⁷Ixxuwwi eese lagga'a qophpha'n waa'uwwina kitima hincaa'llo'ookko; ixxuwwi anginne baxxo'i qophpha'n waa'uwwinne eese quuqisso'ookko; i quunqi Yerusaaleemanne aphphaakko; xoo'ooyyome.

¹⁸At ee kitaabanne kuramu woshsha macceessaa

¹⁹Yerusaaleemaa ka minaadabaa hinkid guzumo'oomda'e macceessitti ammanenne ki gaga heeshaa'llaa eddechcha dereettaa wi'llitti bikkina ki uunxato macceesaammo.

²⁰Ee bikkina Yerusaaleem guzumo'amoo'isa at ki illinne moo'llooyyo; at leteebe'i afeebe'em eekka issoommoyyo; at uulli xumminne hee'ukkuuyyim letootto› yoollaa yitakka'a kullehe» yito'o. Asse'anto'i mannim ee dabachcha amadda'a adil Iyyoosiyaas beyyo daba'llito'o.