Read Hadiyya 2 Adilluwwi Kitaaba 23 Bible Online

2 Adilluwwi Kitaaba 23 - Hadiyya bible

2 Adilluwwi Kitaaba 23

¹Adil Iyyoosiyaas Yihuxxekaa Yerusaalee'mmekaa lommanna hundam weeshukko.

²Adilim Keesammi Mine marukko. Ixxennem Yihuxxi minaadab, Yerusaaleemanne hee'oo manni, qeessuwwi, hiraagaanii minaadabii hoffaanniinsi ki'isaa lobaannonne afeebe'e hundim Keesammi Mine waatto'o. Adilim Keesammi Minenne siidamu Hidi'l Saga'l Kitaabanne kitaabamaa yoo sagara hundam ee mannina qananaa'ukko.

³Iyyoosiyaasim worqi utuphphi gadanonne uullaa Waa'a awwoneena, ixxeka ijaajo, seeraa ogoraa wo'm wodaninnee tiirinnee egereenaa ka kitaabanne kitaabamu hidi'l sagara qoxxiseenaa Waa'i illagenne hidi'l sagara areesukko; oo manni hundim hidi'l sagara egetteena hide'llo'o.

⁴Ee lasage adil Iyyoosiyaas hundiinsi lob qeessichchi Hilqiy, ixxeensi la'm beyyi awwonsaan ikko'i qeessuwwii Keesammi Mine aagakkam gooca egettam waardiyyii Ba'aala yakkam qophpha'n waa'ina, Asheera yakkam qophpha'n waa'inaa boollaankinaa otossakkam ammane awwaaxxakkam mu'uta hundam Keesammi Miniinsi fissitona ijaajukko. Adilim ee mu'uta hundam Yerusaaleemiinsi haxonne yoo Qeediroo'n cebbanne yoo biiranne shokkiisaa gii'l buchchooma Beeteela massukko.

⁵Yihuxxi beero'uwwannee Yerusaalee'm kululleetanne yo'i duunnuwwannee qophpha'n waa'ina kitima hincaa'llona Yihuxxi adilluwwi doo'llita'a hee'llo'i qeessuwwi hundam baxiinsi hollukko. Ba'aalina, eelliinchina, aganina, eelliinchi kululleetanne hee'oo qooccanchuwwinaa boollaankinaa aduruusa wiriissitam hee'llo'i keenom hollukko.

⁶Asheera yakkam qophpha'n waa'i misila Keesammi Miniinsi xoqolaa ee beero'iinsi fissaa Qeediroo'n cebbanne massaa shokkiisukko; eekkam dir issaa silliqaa minaadaphphi waammanne binnaa'ukko.

⁷Gooninne saa'llam goon Keesammi Minenne hee'llam beyyoo meentim Asheera yakkam qophpha'n waa'ina du'm eddechcha daddam beyyoo bi'isukko.

⁸Gaba'iinsi ki'isaa Beersaabee'i afeebe'e yoo Yihuxxi beero'uwwanne qophpha'n waa'uwwina aduruusa wiriissitam hee'llo'i qeessuwwa hundam Yerusaaleema worukko; ixxuwwi kitima hincaa'llam hee'llo'i kiti'm beyyuwwi hundim haashaaramaakkoohan issukko; ee'isam Yerusaalee'm beero'o aagakku'uuyyi ee beero'i gassaanchi Iyyaas goociinsi qeddi kollinne hee'u otossakkam beyyuwwa gindukko.

⁹Oo qeessuwwim Keesammi Minenne awwaaddambee'isa hoorukko; ihukkaarem ixxuwwina beshshuwwi hee'llo'i qeessuwwina uwwakkam ursho'i exxubee'i qorosho'o ittamisa issukko.

¹⁰Hiinoo'm cebbanne hee'u Toofeeta yakkam qophpha'n waa'ina otossakkam beyyi haashaaramaakkoohan ihukkisa la'isukko. Ee'isinne Mooleeka yakkam qophpha'n waa'ina ayyim ixxeka beeto te'im landichcho kitim issaa hincaa'oobee'isa issukko.

¹¹Yihuxxi adilluwwi eelliinchina otossakkam ammane awwaaxxakkamisina qoodda'a hee'llo'i farado hundam bi'isukko; faraxxi gaarre'uwwam shokkiisukko; oo keen hundim illageen lob daanni Naataan Meeleek hee'am hee'u beyyi hincitenne Keesammi Mi'n wixxixxi biiranne ooxxi gooc gadanonne hee'ukko.

¹²Adil Akaaz gattina baxisu mi'n fooqanne yoo adilla'n minenne Yihuxxi adilluwwi baxissa'a hee'llo'i kiti'm beyyuwwaa Keesammi Mi'n lam wixxixxi beyyuwwanne adil Minaase baxisaa hee'u kiti'm beyyuwwaa hundam Iyyoosiyaas bi'isukko; iiqansaatim Qediroo'n cebbanne massaa uunjukko.

¹³Ee'isam Yerusaaleemiinsi eelliinchi fi'l kollinne Haashaaranchi duuniinsi woroo'n qarinne Astaaroota yakkam Siidoo'n waa'ina, Kaamoosha yakkam Moo'aaphphi waa'inaa Mooleek yakkam Amoo'n waa'inaa adil Salamoon baxisaa hee'u otossakkam beyyuwwa hundim haashaaramaakkoo keen ihukkisa la'isukko.

¹⁴Kininne baxamu utubbuwwam iiqansukko; Asheera yakkam qophpha'n waa'i misilam iiqansaa uunjukko; ixxuwwi uullita'a hee'llo'i beyyuwwannem lehu mannika miqe wonshukko.

¹⁵Isra'ee'l minaadaba baaxiilonne awwonsu Naabaax beet Yoorbi'aam Beeteelanne baxisaa hee'u otossakkam beyyo Iyyoosiyaas gindansukko; ee beyyonne hee'u kiti'm beyyom xoqolaa baxakko'i kinneewwam xaamsaa dir issukko; Ashee'l misilam shokkiisukko.

¹⁶Ee lasage Iyyoosiyaas duunnuwwanne yoo waammi beyyuwwa daaphphaa moo'ukko; ee waammuwwi woronne hee'u miqqeewwam fissaa ee kitima hincaa'akkam beyyonne shokkiisukko; oo kiti'm beyyim haashaaramaakkoohan ihukkisa la'isukko. Iyyoosiyaas eehid issimminne lobakat doolliinsi illageen mat ugudanne Yoorbi'aam ee kiti'm beyyi gadanonne uullaakkoohaannonne hiraagaanchi wocu Waa'i sagar wo'mmukko. Odim Iyyoosiyaas daaphphaa ee hiraago wocu hiraagaanchika waamma moo'aa

¹⁷«Oo waammi ayyane?» yaa xa'mmukko. Beetee'l minaadabim «Yihudiinsi waaraa ku at issitti luwwi hundim ka kiti'm beyyonne ihoo'isa wocaa hee'u hiraagaanchi waamma» yita'a dabatto'o.

¹⁸Iyyoosiyaasim «Ee waamma nakkitakkotte; hee'ona Ullehe! Ixxeka miqe ayyim ka beyyiinsi ki'isoone» yukko. Ee bikkina ixxekaa Samaare'i uulliinsi waaraa hee'u hiraagaanchikaa miqe yoo'isam utto'o.

¹⁹Adil Iyyoosiyaas Samaare'i beero'uwwanne hundannem Isra'ee'l adilluwwi qophpha'n waa'uwwina otossimmina baxissa'a Waa'a quuqisso'i beyyuwwa hundam gindansukko; Beeteelanne issukkoka ee kiti'm beyyuwwi hundannem issukko.

²⁰Ee kiti'm beyyuwwanne qophpha'n waa'ina awwaaddam hee'llo'i qeessuwwa shaa ixxuwwi miqe shokkiisukko; ee lasage daba'llaa Yerusaalee'm beero'o waarukko.

²¹Adil Iyyoosiyaas minaadab hundim Hidi'l Saga'l Kitaabanne kitaabamukkisanne ixxuwwi Moollanni Waa'ika Higimmi Uguda lonsona ijaajukko.

²²Gassaa'n doolliinsi ki'isaa adilluwwi Isra'eelaa Yihudaa gassitam hee'llo'i doollenne hundannem eehido'i ugud issamukkoyyo.

²³Ihukkaarem Iyyoosiyaas adil ihu tommonnee sadeenti hiinchonnee Moollanni Waa'ina oo Higimmi Ugud Yerusaaleemanne issamukko.

²⁴Hundiinsi lob qeessichchi Hilqiy Keesammi Minenne siidu kitaabanne kitaabamu seer hundim wo'mmoo'isina sawwimminne adil Iyyoosiyaas Yerusaaleemiinsii Yihuxxi mulli beero'uwwiinsii hundiinsim wiidda weeshsham keeno, kiiraano, moolli waa'uwwa, mulli qophpha'n waa'uwwaa hanqo'i Waa'a laqqambee'i minaadab otossimmina awwaaxxitam mu'uttuwwaa hundam bi'isukko.

²⁵Muse'e Seerina wo'm wodaninne, foorinnee malaayyinnee Waa'ina awwaadaakkoo Iyyoosiyaas'nnoo'i adil ixxeensi illageenii lasageenii siidamukkoyyo.

²⁶Ihukkaarem adil Minaase issu jolli bikkina Yihudanne aphphu Waa'ik baddisoo quunqi kabad afeebe'e xoo'ukkoyyo.

²⁷Ee bikkina Waa'i «Isra'ee'l minaadabanne issummi luwwi hundam Yihuxxi minaadabannem issoommo; oohim Ayihuxxi minaadaba i illagiinsi hooroommo; an doo'llummi Yerusaalee'm beero'oo iina otossakkam Keesammi Minee uunjoommo» yukko.

²⁸Adil Iyyoosiyaas issu mulli luwwi hundim Yihuxxi adilluwwi Aganni Kitaabanne kitaabamaakko.

²⁹Iyyoosiyaas adilla'n doollenne Nakko yakkam Gibxi uulli adil Aasoo'l adilina agaageena ixxi gogota awwonsaa Efiraaxiis daajje marukko; adil Iyyoosiyaasim Magidonne Gibxi uulli gogota dabareena oramukkuuyyim shakko'o.

³⁰Ixxi gassaanim ixxaka leesha faraxxi gaarre'inne Yerusaaleema wotta'a adilluwwi waammi beyyonne waammito'o. Ayihuxxi minaadabim ixxi beet Yoo'aakaaza doo'llita'a adil issito'o.

³¹Yoo'aakaaz Ayihuxxi uullanne adil ihu ammane ixxek umur lamiyyee sas hiinchoo hee'ukko; ixxi heechchi beyyom Yerusaaleemanne issaa sas agana gassukko; ixxi amam Libi'n beero'i Ermiyaas landichcho Hamuuxaalatte hee'llo'o.

³²Yoo'aakaazim gaassi ixxi anno'isam Waa'i illagenne jor baxo baxukko.

³³Ixxom Nakko yakkam Gibxi uulli adil Haamaat uullanne yoo Riibiilanne karaa Ayihuxxi minaadab sas kumaa soor xibbi kilo'i biraa sadee soor kilo'i worqaa gibitamisa issu ammanenne Yoo'aakaaz adilla'n doolli beeddukko.

³⁴Adil Nakko'o Iyyoosiyaas beet Eeliyaaqeem ixxi anni hee'u Iyyoosiyaas beyyonne Ayihuxxi minaadabina adil ihoo'isa issukko; ixxi summam dabassaa Yoo'aaqeema yaa weeshukko. Yoo'aakaazam adil Nakko'o qeefadaa Gibxi uulla massukko; ee beyyonnem lehukko.

³⁵Adil Yoo'aaqeem Gibxi uulli adil xa'mmu gibiro miqeena iittamu bikkina minaadab annichchi annichchi amaxxisinne gibiro miqoo'isa issukko.

³⁶Yoo'aaqeem Ayihuxxi uullanne adil ihu ammane ixxek umur lamiyyee onti hiinchoo hee'ukko; ixxi heechchi beyyom Yerusaaleemanne issaa tommoo mat hiinchoo gassukko; ixxi amam Ruuma'i beero'i Fadaay landichcho Zabiidatti hee'llo'o.

³⁷Yoo'aaqeemim gaassi ixxi anno'isam Waa'i illagenne jor baxo baxukko.