Read Hadiyya 2 Adilluwwi Kitaaba 24 Bible Online

2 Adilluwwi Kitaaba 24 - Hadiyya bible

2 Adilluwwi Kitaaba 24

¹Yoo'aaqeem adilla'n doollenne Baabiloo'n adil Nabukadanaxoor Yihuxxi uulla weeraraa amadukko; Yoo'aaqeemim ixxena sas hiincho gibiraa lasonne bangujjukko.

²Waa'i ixxena awwaadaan ikko'i hiraagaaninne Yihuxxi uulla bichchi bikkina wocu hiraag wo'mmoo'isina Baabiloo'nneka, Sooriyika, Moo'aaphphekaa Amoo'nnekaa gaadaano Yihuxxi uulla bi'issamisa issukko.

³Oohim adil Minaase baxu baaxii'l mashka'inne Yihuxxi minaadaba ixxi illagiinsi bi'iseena Waa'i ijaaju ijaajinnette.

⁴Annannam Minaase muccur mannika xiiga dunu bikkinattee Yerusaaleemim muccur manni xiiginne wo'mmoo'isa issu bikkinattee. Ee bikkina Waa'i qishixxeena hasukkoyyo.

⁵Yoo'aaqeem baxu mulli bax hundim Yihuxxi Adilluwwi Aganni Kitaabanne kitaabamaakko.

⁶Yoo'aaqeem lehukko; ixxi bikkennem ixxi beet Ikkooniyaan adil ihukko.

⁷Baabiloo'n adil Efiraaxiis daajjiinsi ki'isaa hanaa'n qarinne yoo Gibxi uulli tochchi afeebe'e ka'aa amadaa hee'u bikkina ee lasage Gibxi adilii ixxi gogotii Gibxiinsi orina fitto'oyyo.

⁸Ikooniyaan Yihuxxi adil ihu ammane ixxek umur tommoo sadeenti hiinchoo hee'ukko; ixxi heechchi beyyom Yerusaaleemanne issaa sas agana gassukko; ixxi amam Yerusaalee'm Eelnaataan landichcho Nahuushtatte hee'llo'o.

⁹Ikooniyaanim ixxi annisam Waa'i illagenne jor baxo baxukko.

¹⁰Ixxi adilla'n doollenne Baabiloo'n adil Nabukadanaxoor gogot Yerusaaleema kibbukko.

¹¹Kibbu ammanenne Nabukadanaxoor gagoomim Yerusaalee'm beero'o waarukko.

¹²Yihuxxi adil Ikooniyaan, ixxi ama, lombi waardiyyuwwa, gassaanoo gaaxxi awwonsaanoo hundam edaa Baabiloo'n adilina anga uwwukko. Nabukadanaxoor adil ihu sadeenti hiinchonne Ikooniyaana amadaa karukko.

¹³Illageen Waa'i wocaa hee'ukkisannem Nabukadanaxoor Keesammi Minennee adilla'n minennee hee'u amaxxa hundam Baabiloona massukko. Salamoon worqiinsi baxisu Keesammi Minenne awwaaxxakkam mu'uta hundam iiqansukko.

¹⁴Ee'isam Yerusaalee'm minaadaba, gassaano, gaadaano, angi bax lachchi yoo keenoo xaara tumtam keenoo edaa tommi kum manna qeefadaa ixxi uulla massukko; Ayihuxxi uullanne xale'i bux manna gatisukko.

¹⁵Nabukadanaxoor Ikooniyaana qeefadaa ixxi ama, ixxi meento, ixxi gassaanoo Yihuxxi minaadaphphi awwonsaanoo Baabiloona massukko.

¹⁶Nabukadanaxoor lamar kum gaaddeena xantam manna, mat kum xaara tumtam keenoo anga qoor mannaa qeefadaa Baabiloona massukko.

¹⁷Nabukadanaxoor Ikooniyaan beyyonne Maataaniya yakkam Ikooniyaan annabbaayyo Yihuxxi adil issukko; ixxekam summa dabassaa Sedeeqiyaasa yukko.

¹⁸Sedeeqiyaas Ayihuxxi uullanne adil ihu ammane ixxek umur lamiyyee mat hiinchoo hee'ukko; ixxi heechchi beyyom Yerusaaleemanne issaa tommoo mat hiinchoo gassukko; ixxi amam Liibi'n beero'i Ermiyaas landichcho Hamuuxaalatti hee'llo'o.

¹⁹Adil Sedeeqiyaas Yoo'aaqeemisam baaxiilo baximminne Waa'i illagenne jor baxo baxukko.

²⁰Ee bikkina Waa'i Yerusaaleemannee Yihuxxi minaadabannee quuqaa ixxi illagiinsi ixxuwwa qeessukko. Odim kaba Sedeeqiyaas Baabiloo'n adilina ijaajancha sabukko.