Read Hadiyya 2 Adilluwwi Kitaaba 25 Bible Online

2 Adilluwwi Kitaaba 25 - Hadiyya bible

2 Adilluwwi Kitaaba 25

¹Sedeeqiyaas adil ihu honsi hiinchaannonne tommi agan aagu tommi ayyaamonne Nabukadanaxoor gogota hundam awwonsaa Yerusaaleemanne weerarukko; ixxi gogotim ee beero'iinsi tochchonne wiiddanta'a ee beero'i kululleetanne buchcha tuubbo'o.

²Ixxuwwim Sedeeqiyaas adilla'n tommii mat hiinchii afeebe'e kibbito'o.

³Ee maarage soo'l agan aagu honsi ayyaamonne minaadab ittam luwwa hoogga'a sibaatto'o.

⁴Ee beero'ikim oot gindamukko; Baabiloo'n gaadaan ee beero'ika kululleeta kibbito'isam Yihuxxi adi'l gaadaan hiimonne fitta'a xotto'o; adi'l duubbi kaashshi beyyo aagisoo googinne ki'lla'a lamem oottuwwam edansoo ooxxi gooc kollinne higga'a Yoordaanoos cebbi kollonne gibbo'o.

⁵Ihukkaarem Baabiloo'n gogot adil Sedeeqiyaasa hollita'a Yaarko'i gadanonne yoo biiranne qeefaddo'o; ixxi gaadaanim utta'a gibbo'o.

⁶Sedeeqiyaasam amadda'a Riibii'l beero'onne yoo Nabukadanaxoor beyyo massito'o; ee beyyonnem Nabukadanaxoor ixxonne oogatukko.

⁷Oohim Sedeeqiyaas ixxi illinne moo'ukkuuyyim ixxi ooso shakko'o; ee lasage Nabukadanaxoor Sedeeqiyaasika ille fissaa qooqisukko; ixxi angam chimchiminne karaa Baabiloona massukko.

⁸Nabukadanaxoor Baabiloonanne adil ihu tommonnee honsi hiinchonnee onti agan aagu lama'l ballannee, Nabukadanaxoor lombi waaridiyya ijaajaanchoo adi'l lob gassaanchoo hee'u Nabuzaardaan Yerusaalee'm beero'o aagukko.

⁹Ixxim Keesammi Mine, adilla'n mine, Yerusaaleemanne hee'u er minneewwaa ee beero'onne yo'i mulli minneewwaa hundam shokkiisukko.

¹⁰Ixxi gaadaanim ee beero'ika kininne ootamu oota gindito'o.

¹¹Ee lasage Nabuzaardaan ee beero'onne gatta'a hee'llo'i mannaa Baabiloo'n adilina anga uwwita'a hee'llo'i mannaa Baabiloo'n beero'o massukko.

¹²Ihukkaarem amaxxi bee'i bux manna duubbi kaashsha shuquntonaa uulla abuullitonaa Yihuxxi ullannem uraa marukko.

¹³Baabiloo'n gaadaanim Keesammi Minenne hee'u naas utubbuwwa, mu'uta dissakkam shafe'isa tululoo lokki yoo luwwaa naas xaarinne baxamu wo'o dissakkam wongilluwwaa iiqansito'o; naas xaara hundam Baabiloo'n uulla massito'o.

¹⁴Qure'uwwa, giira hogoofakkam mu'uta, gii'l buchcha issakkam mu'uta, cilfuwwaa Keesammi Minenne awwaaxxakkam naas xaarinne baxamu mulli mu'uttuwwaa hundam boggo'o.

¹⁵Birinnee worqinnee baxamu mu'uta hundam saahinnuwwaa gii'l midachchuwwaa edda'a massito'o.

¹⁶Adil Salamoon Keesammi Mi'n awwaadina naas xaariinsi baxisu keesammi lamem utubbuwwi, mu'uta dissakkam shafe'aam mu'uttuwwii wo'o dissakkam lob jaalo'oo lobakata kee'mmaalluwwi ikko'i bikkina keenteena xanto'oyyo.

¹⁷Utubbuwwik annannichchikim uullichchi tommoo sadeenti angaa hee'ukko; ixxuwwi ludonnem sas anga ihoo qax uullichchi yoo naas xaariinsi baxamaakkoo goobinaanchi hee'ukko; ee goobinaanchuwwi kululleetannem roomaa'n misha laboo naas xaariinsi baxamaakkoo wereeggisaanchi hee'ukko.

¹⁸Lombi waardiyyi ijaajaanchi Nabuzaardaan hundiinsi lob qeessichchi Saaraaya, la'm beyyi awwonsaanchi qeessichchi Safooniyaasaa Keesammi Mi'n waardiyyuwwa sasomii qeefadaa massukko.

¹⁹Ee beero'iinsim gaaxxi awwonsaancho, adi'l sogaano ontom, minaadabiinsi gaadaano doo'lloo gaaxxi ijaajaanchi kitaabaanchoo mulli mannikam lohayyee qeefadaa massukko.

²⁰Nabuzaardaan ee hundam amadaa Riibi'l beero'onne hee'u Baabiloo'n adi'l beyyo massukko.

²¹Adilim ee Haamaatanne yoo Riibilanne ixxuwwa gansiisaa shisiisukko. Eehido'isinne Yihuxxi minaadab ixxuwwi uulliinsi qeefadanta'a matto'o.

²²Baabiloo'n adil Nabukadanaxoor Saafaan beetina beet hee'u Ahiqaam beet Gadaaliya qeefadanta'a Baabiloona mattoo'n Yihuxxi uullanne gatto'i qax mannina gassaanchi issukko.

²³Qeefadantobee'i Yihuxxi gaaxxi awwonsaanii gaadaanii ka woshsha macceesso'i ammanenne Gadaaliy beyyo Misiphpha waatto'o; oo gaaxxi awwonsaanim Naataaniy beet Isima'eelatte, Qaareeh beet Yoohaanaanatte, Naxoof beero'i Taanihuumeet beet Saraayattee Maa'ik beet Yazaaniyattee hee'llo'o.

²⁴Gadaaliyim ee gaaxxi awwonsaaninaa gaadaaninaa «Baabiloo'n gassaano badditakkotte; ka uullanne afuullehe; Baabiloo'n adilinam ijaajammehe; ee hundam issitakkolas ki'nnuwwina hundem luwwim taaphanookko» yaa hide'ukko.

²⁵Ihukkaarem ee hiinchonne lama'l agananne adi'l shumo'iinsette ihoo Eelshaamaa'i beetina beet ihu Nataaniy beet Isma'eel tommi manchinne maqirem Misiphpha maraa Gadaaliya, ixxenne maqirem ee beyyonne hee'llo'i Yuxxekaa Baabiloo'n mannaa hundam shukko.

²⁶Ee bikkina minaadab hoffokii lobokii gaaxxi awwonsaaninne maqirem Baabiloo'n manna baddito'i bikkina Gibxi uulla gibbo'o.

²⁷Ewiilmaroodaak Baabiloo'n uullanne adil ihu hiinchonne Yihuxxi adil Ikooniyaanina qishixxaa qeefadamaa maru sadennee lama'l hiinchonnee tommonnee la'm aga'n lamiyyennee lama'l ballannee karatiinsi tirukko.

²⁸Ewiilmaroodaak Ikooniyaanina eroomma issukko; ixxesam qeefadanta'a Baabiloonanne hee'llam adilluwwi hundiinsim shiqqeen lomba uwwukko.

²⁹Ee bikkina Ikooniyaan karaxxi minenne edde'aa hee'u eddechcha dabassaa ixxi umu'l doollenne hundi ammanem adi'l maaddiinsi itoo'isa issukko.

³⁰Ixxi hee'u doollenne hundannem hasisoo luwwi hundinam awwaaxxona balli hundam hurbaata uwwam hee'ukko.