Read Hadiyya 2 Adilluwwi Kitaaba 3 Bible Online

2 Adilluwwi Kitaaba 3 - Hadiyya bible

2 Adilluwwi Kitaaba 3

¹Yihuxxi Adil Yoosaafix Adil ihu tommonnee sadeenti hiinchonnee Aki'aab beet Yooraam Isra'ee'l minaadabina adil ihaa ixxi heechchi beyyo Samaare'enne issaa tommoo lam hiinchoo gassukko.

²Ixxim baaxiilo baximminne Waa'a kichche'isukko. Ihukkaarem ixxi annisaa ixxi am Eelzaabeelisaa jor manchi hee'ukkoyyo. Ixxi anni baxisaa hee'u Ba'aalaa yakkam qophpha'n waa'ika misila bi'isukko.

³Ihukkaarem Naabaax beet Yoorbi'aam Isra'ee'l minaadaba huushisu baaxiilinne amadamukko bagaan eehanniinsi annanni iheena xanukkoyyo.

⁴Moo'aaphphi adil Meeshaa'i gereebba ho'lloohan hee'ukko. Ixxim hiinchina hiinchina mat xibbi kum geex gereebbi ambulluwwaa mat xibbi kum gereebbi ambulluwwi oddaa Isra'ee'l adilina gibiram hee'ukko.

⁵Ihukkaarem Isra'ee'l adil Aki'aab lehu ammanenne Moo'aaphphi adil Meeshaa'i Isra'ee'l minaadabanne bangujjaatinne ki'ukko.

⁶Ee ammanenne adil Yooraam qaqqisaa Samaare'iinsi firaa Isra'ee'l gaadaano hundam wixxaa'ukko.

⁷Yihuxxi adil Yoosaafix beyyom «Moo'aaphphi adil i hanenne bangujjaatinne ki'aakko; ixxenne oramoommi oranne iina haar'mmitaa qassoohonnihe?» yaa asse'ukko. Adil Yoosaafixim «Eeyya hara'mmoommo; eese ki'isam, i gaadaano ki gaadaa'nnisa, i faradom ki faraxxisa xiggeena xantootto» yukko.

⁸Ihukkaarem «Orina malloommi googoom hinkeenette?» yaa xa'mmukko. Adil Yooraam «Eedoo'm udma'anne yoo googinne malloommo» yaa dabarukko.

⁹Ee bikkina adil Yooraamii ee'isam Yihuxxekii Eedoo'm adilluwwii gaadina fitto'o. Lamar balla taakke'lla'a lasonne amaddo'i wo'i beeddukko. Gaadaaninaa mu'uta iyyoo diinatinaa wo'i ma'llichchim hee'ukkoyyo.

¹⁰Adil Yooraam «Waa'i neese sasem adilluwwam Moo'aaphphi adilina higisaa uwweenatte aayye!» yaa laarukko.

¹¹Adil Yoosaafixim «Ixxenne inkaa Waa'a xa'mmeena xannoommisina ka beyyonne matem hiraagaanchim bee'ennihe?» yaa xa'mmukko. Adil Yooraam gaadaa'n ijaajaaniinsi mat «Kanniinsi illageen Eeliyaasina awwaadaanchi hee'u Saafaax beet Eelsa'a ka beyyonne yookko» yaa dabarukko.

¹²Adil Yoosaafixim «Ixxi hanqo'i hiraagaancho» yukko. Ee lasage sasem adilluwwim Eelsa'i beyyo matto'o.

¹³Eelsa'am Isra'ee'l adil Yooraamina «Iinaa kiinaa mah edanchi hee'aate? Kiyyannii kiyyummaa xa'mmitam hee'llo'i hiraagaano mattaa xa'mme» yukko. Adil Yooraam dabaraa «Ee'isayyo! Waa'i neese sasem adilluwwam Moo'aaphphi adilina higisaa uwweena weeshukko» yukko.

¹⁴Eelsa'am «An awwaadoommi hee'oo gogoxxi Moollanni Waa'i summinne hide'oommo. Kiina hara'mmeena waaru Yihuxxi adil Yoosaafix lombinaa yaate bagaan kiina maham issimmi hasisam hee'ukkoyyo.

¹⁵Kabadem diitta'a lelloo mancho i beyyo eebbehe» yukko. Diitta'a lelloo manchi lellimma amadukkaare Waa'i ayyaan Eelsa'anne dillaa

¹⁶«Waa'i ‹Ka gogaakkoo cebbi uullanne hundannem wo'i bare hinnehe.

¹⁷Xeenaa hafachchaa maham moo'llakkobee'aarem ku cebbi wo'inne wo'mmaakkoohan ihookko; ki'nnuwwii ki'nnuwwi diinatii hundim aggakkeena ihoo wo'o siiddakkamo› yoolla.

¹⁸Ihukkaarem kaka issimmi Waa'ina sholle'aalla; kanniinsim loboka ixxi Moo'aaphphi minaadaba kaa'llakkamisa issookko.

¹⁹Ixxuwwika Girbamaakkoo doo'l beero'uwwa hundam kaa'llakka'a amaddakkamo; ixxuwwika mishoo haqquwwa hundam muttakkamo; bu'uwwam ifiissakkamo; ixxuwwika harish abuulli beyyuwwam bi'issakka'a kina tuubbakkamo» yukko.

²⁰La'm ayyaamo daram kitima hincaa'akkam amman afaakkoohaannonne Eedoo'm kollinne wo'i daadaa uullanne waaraa wo'mmukko.

²¹Moo'aaphphi minaadabim sasem adilluwwim qasseena waatto'isa macceesso'i ammanenne lommanniinsi woraadanne afeebe'e o'l mu'uta amaddeena xantam manni hundim weeccanta'a fitta'a beero'i tochchonne egetto'o.

²²La'm balla soodaraar daram diriiriinsi baqita'a moo'llo'aare wo'onne caakkisoo eelliinchi laag xiiga labaa moo'amukko.

²³Ee bikkina sagara iimaa'lla'a shuuttu'uuyyi «Kuk xiigayyonnihe! Sasem ni diina'ikim gaadaan ixxuwwina'i ixxuwwim du'llanta'a beeddito'ookko; ee bikkina bongona mallona» yaqqanto'o.

²⁴Ihukkaarem ixxuwwi wiidda'n beyyo affo'i ammanenne Isra'ee'l gaadaan ki'lla'a qasimminne daba'llita'a gibbamisa issito'o. Ee lasage Isra'ee'l gaadaan Moo'aaphphi gaadaano qassa'a shita'a guullito'o.

²⁵Ixxuwwi beero'uwwam bi'isso'o; harish uullannennem ixxuwwi hundim kina darabba'a tuubbo'o; wo'i bu'uwwa ifiisso'o; misha uwwoo haqquwwam mutto'o; lasaanchonnem ee uulli lob beero'i hee'u Qiiriheerees xale'i gatukko. Ee beero'om kina darabbam o'l manni kibbita'a qasso'o.

²⁶Moo'aaphphi adil kaa'amukkisa la'u ammanenne bisa'a lade'llo'oo lamaar xibbi manna awwonsaa Eedoo'm adi'l kollinne xoreenaa yakukko; ihukkaare hore'em xanukkoyyo.

²⁷Ee bikkina ixxi bikke adil ihimmi hasisoo won beeto ee beero'i ki'n ootanne Moo'aaphphi waa'ina kitim issaa hincaa'ukko. Isra'ee'l minaadabim ee woshsha shigigito'i bikkina ee beero'o fatakita'a ixxuwwi uulla daba'llita'a matto'o.