Read Hadiyya 2 Adilluwwi Kitaaba 5 Bible Online

2 Adilluwwi Kitaaba 5 - Hadiyya bible

2 Adilluwwi Kitaaba 5

¹Sooriy Minaadabina gaaxxi awwonsaanchi hee'u Ni'imaan Sooriy uulli adi'l illagenne lobakata lombaamoo la'amaakkoo gaaxxi awwonsaanchoo hee'ukko. Mashka'oomam Waa'i Ni'imaan kollinne Sooriy ulli gaadaanina kaachcha uwwaa hee'ukko. Ni'imaan la'amaakkoo gaadaanchi ihukkaarem oddomachchonne firoo baddisoo xissinne hawwam hee'ukko.

²Sooriy manni Isra'ee'l minaadabanne weeratto'i ammane mat gootto'i Isra'ee'l landichcho qeefadda'a massita'a hee'llo'o. Isem Ni'imaan meentichchona awwaaddam hee'llo'o.

³Mat ayyaamo is moollamana «I Moollanni Ni'imaan Samaare'enne yoo hiraagaanchi beyyo maruta'n eran hee'ukko. Mashka'oomim oo hiraagaanchi ka oddomachchonne yoo baddisoo xissiinsi fayyiiseena xanam hee'ukko» yito'o.

⁴Ni'imaanim maraa ka Isra'ee'l uulli landichchoonsi macceesu woshsha hundam adilina kurukko.

⁵Adilim «Ka assikitaaba amaddaa Isra'ee'l adi'l beyyo mare» yaa geegeesukko. Ee bikkina Ni'imaan 340 kilo'i kin bira, 69 kilo'i worqaa tommi kitti eddechchaa iyyiisaa marukko.

⁶Amadaa maru assim «Ka askitaaba amadaa waaroo Ni'imaana amadu jabbiinsi fayyiissoo'isina an ki beyyo asse'aammo» yoohan hee'ukko.

⁷Isra'ee'l adilim ee askitaaba qananaa'aa nadadaa eddechcha dereerukko; ixxi sagaram iimaa'aa «Sooriy adil an ka mancho fayyiisona i beyyo mahina asse'ukko? An sheenaa gatiseenaa xanoommi malaayyi yoo Waa'a labisaatennihe? Hanqinam ku adil eesenne jora hasukkisa caakkisaa moo'isoohane!» yukko.

⁸Hiraagaanchi Eelsa'am ee woshsha macceesu ammanenne ixxi beyyo manna asse'aa «Mahina u'nnantoolla? Ee mancho i beyyo waarona asse'e; ixxim Isra'eelanne hiraagaanchi yoo'isa la'ookko» yukko.

⁹Ee bikkina Ni'imaan faraxxi gaarre'enne afuuraa maraa Eelsa'i mi'n goocanne afaa uullukko.

¹⁰Eelsa'am mat ixxi awwaadaanchina «Mattaa Ni'imaanina Yoordaanoos daajjenne lamaraagge aaggaa aanshaqqe ki jabbiinsim fayye'llaa muccuttootto› yitaa ka manchina kure» yaa asse'ukko.

¹¹Ihukkaarem Ni'imaan quuqaa ixxi uulla daba'llaa mareena ki'ukko. Ixxim «An hanqinam ixxi i beyyo waaraa i gadanonne uullaa ixxi Moollanni Waa'ika summa weeshaa ixxi anginnem amadaa ka oddomachchonne firoo baddisoo jabbiinsi eese fayyiisoo labisaa hee'ummo.

¹²Wo'ina, wo'inat ihukkaalleensa'i Isra'ee'l uullanne yo'i daajjuwwii'nsi i uullanne Damaasqo'onne siidantam Abaanii Faarfaarii e'llitamoyyonnihe? Ka'isa ihoo'isa la'ummita'n eekeenonne aanshaqqaa muccuram hee'ummoyyonnihe!» yaa quuqaa ixxi uulla daba'llaa mareena ki'ukko.

¹³Ni'imaan awwaadaanim ixxi kolli hincita'a «Ni moollanna, ku hiraagaanchi mulli kee'mmaalli luwwa issitoo'isina ijaajuta'n issitam hee'llitto. Eehannah hiraagaanchi keese ijaajukkisanne aanshaqqitaa jabbiinsi fayye'immina kiina kee'mmoo luwwi maha?» yito'o.

¹⁴Ee bikkina Ni'imaan Yoordaanoos daajje dillaa Waa'i manchi Eelsa'a ijaajukkisanne lamar kore aagaa aanshaqqukko. Ixxi oddomachchi jabbiinsim guullaa muccurukko. Ixxi orachchim ciilluwwi orachchisa haareechchi ihaa guullaa fayye'ukko.

¹⁵Ee lasage ixxi awwonaaninne maqirem Waa'i manchi Eelsa'i beyyo daba'llaa waaraa ixxi illagenne uullaa «Isra'ee'l Waa'iinsi bagaan heer uullanne mulli Waa'i bee'isa an kaba la'aammo. Ee bikkina i Moollanna hay ka an uwwoommi luwwa aa'e» yukko.

¹⁶Eelsa'am «Ka an awwaadoommi Waa'i summinne hide'oommo. Ma'llichchom aa'oommoyyo» yaa dabarukko. Ni'imaan ixxi uwwoo luwwa aa'oo'isina qoxxisaa uunxukkaarem Eelsa'a aa'imma sabukko.

¹⁷Ee bikkina Ni'imaan «An uwwoommi luwwa iinniinsi aa'lloobeelas lam baqullanne iyyiisaa massoommi qax buchcha amaxxaa maroommisa isse; mashka'oomam kabadiinsi ki'isaa xale'i Waa'inatte bagaan mulli qophpha'n Waa'uwwina shokkiisakka'a hincaa'akkam kitimaa mulli kitimaa hore'em hincaa'oommoyyo.

¹⁸Ihukkaarem i uulli adila awwonaa Riimoona yakkam Sooriy uulli waa'ina otossakkam mine aagumta'nnii otossumta'nnim Waa'i iina haafihona xale'i ee woshsha uunxoommo; hanqinam iina ki awwaadaanchina uraammoo yookko» yukko.

¹⁹Eelsa'am «Xummanne mare» yukko. Ni'imaanim «Xummanne hee'llehe» yaa marukko. Ixxim hoffi qaxa qee'llaa marukkisam

²⁰Waa'i manchi Eelsa'ana awwaadaanchi ihu Giyaaz «I moollanni ma'lluwwam miqisoo'nnim Ni'imaana geegeesaakko. Oo Sooriy uulli manchi ixxena uwwu luwwa aa'immi hasisam hee'ukko. An hee'oo Waa'i summinne hide'oommo; an qaqqisaa geerummuuyyi maraa ixxeensi mat luwwa siixximmi hasisookko» yaa ixxi wodanonne sawwukko.

²¹Ee bikkina Giyaaz Ni'imaana laseesukko. Ni'imaanim laso daba'llaa mat manchi ixxo laseesaa geeraa waarukkuuyyi moo'aa faraxxi gaarre'iinsi dillaa «Maruwwa xumminam waattaahinnihe?» yaa xa'mmukko.

²²Giyaazim «Waarummoka'i xumminateme. Ihukkaarem i moollanni duunaam Efree'm uullanne hee'llam hiraagaa'n wixxitiinsi lam manni dangonnem koyyinano waatto'i bikkina sas kum biraa lam kitti eddechchaa ixxuwwina uwwitoo'isina kurona ki beyyo eese asse'aakko» yaa dabarukko.

²³Ni'imaanim «Eehid ihukkaa'lleensi 68 kilo'i kin bira uwwoommo» yaa uunxukko. Eehid yaa 68 kilo'i kin biraa lam kitti eddechchinne maqirem gonoonanne wonshaa lam kitti eddehchchinne maqirem lam awwaadaanonne amadiisaa Giyaaziinsi higga'a illagenne mattamisa issukko.

²⁴Eelsa'a hee'oo duuna affo'i ammanenne Giyaaz ee lamem gonoonam aa'aa mine aagisukko. Ee lasage Ni'imaan awwaadaano geegeesaa

²⁵mine daba'llaa aagaa ixxi moollanni Eelsa'i illagenne uullukko. «Kabad afeebe'e hannonne hee'llitto?» yaa xa'mmukko. Giyaazim «I moollanna, an hannom marummoyyo» yaa dabarukko.

²⁶Eelsa'am «Oo manchi keese atoorasseena faraxxi gaarre'iinsi dillukkuuyyi an Keesammi Ayyaaninne kiinninne maqire hee'ummoyyonnihe? Ku amman diinatee eddechchaa, weeraa woyi'n kaashsha kaasakkam beyyoo, gereebbaa laroo te'im awwaadaano aa'immina kuk ammanennihe?

²⁷Ee bikkina oono'o Ni'imaan oddomachchonne yoo baddisoo jabbi kiinniinsii ki shumo'iinsii heer heerinam annanni ihooyyo» yukko. Ee lasage Giyaaz Eelsa'i beyyiinsi firukko; ixxi orachchim baddisoo jabbinne baraxxisa qadaallaa hee'ukko.