Read Hadiyya 2 Adilluwwi Kitaaba 6 Bible Online

2 Adilluwwi Kitaaba 6 - Hadiyya bible

2 Adilluwwi Kitaaba 6

¹Hiraagaa'n wixxitim Eelsa'ina oono'o «Neese ki illagenne hee'nnoommi beyyi xuqqaakko.

²Yoordaanoos daajje dillinaa haqqa mullaa neese hee'nnoommi mine banxoommisa isse» yito'o. Eelsa'am «Ihona mallehe» yukko.

³Hiraagaaniinsi mat Eelsa'a maqire maroo'isina xa'mmukko. Eelsa'am ixxuwwi xa'mmichchanne iittamukko.

⁴Ixxuwwinne maqirem marukko. Ixxuwwim Yoordaanoos daajje affa'a lasage haqqa murimma asheetto'o.

⁵Ixxuwwiinsim mat manchi haqqa murukuuyyim dangonnem haqqiinsi firaa meesaan wo'onne ubukko. Ixxim sagara iimaa'aa «I moollanna, kaba an maha iho? Meesaan aggiishsha eebaammoohane» yaa laarukko.

⁶Eelsa'am «Hinka'i beyyonnette ubukkok? Yaa xa'mmukko. Oo manchim meesaan ubu beyyo moo'isu ammanenne Eelsa'a mat haqqichcho muraa wo'onne darabukkaare meesaan chabbukko.

⁷Ee lasage Eelsa'a «Fissitaa masse» yukko. Oo manchim anga asse'aa fissukko.

⁸Ee ammane Sooriy adil Isra'eelinne oramam hee'ukko. Ixxim gaaxxi awwonsaaninne a'llamaa wiiddantam beyyo doo'llukko.

⁹Waa'i manchim «Sooriy uulli gogot eeheen dillito'oo bikkina ee kollinne higgoobee'isa ege'lle» yaa Isra'ee'l adi'l beyyo asse'ukko.

¹⁰Ee bikkina Isra'ee'l adil oo Waa'i manchi kuru beyyi hundam shaashshisukko; Eelsa'am Isra'ee'l adil eehido'i beyyuwwiinsi ege'llona edaa, edaa kuram hee'ukko.

¹¹Ee bikkina ki'ukkok Sooriy uulli adil lobakata gancarukko. Ixxi gaaxxi awwonsaanom weeshaa «Ni lambe'iinsi Isra'ee'l adilina ni woshsha massaa kurookkok ayyette?» yaa xa'mmukko.

¹²Ixxuwwiinsim mat «Adila! Ni lambe'iinsi kaka issookkok ayyim bee'e; Isra'ee'l uullanne hee'ukkisam ki ara'anne ikkaa woccoo woshsham ihukkaare hundam Isra'ee'l adilina kuroo Eelsa'a yakkam hiraagaancho» yaa dabarukko.

¹³Sooriy adilim «Ixxi yoo beyyo hassehe; anim ixxo manna asse'aa amadoommo» yukko. Eelsa'am Dootaananne yoo'isa kurakko'o.

¹⁴Ee bikkina adil faradinnee faraxxi gaarre'uwwinnee maqire dut gogota ee beyyo asse'ukko. Ixxuwwim hiimonne waatta'a ee beero'o kibbito'o.

¹⁵Ee Waa'i manchi awwaadaanchi daram ki'aa biira firoohaare dut gogot faradinnee faraxxi gaarre'innee ee beero'o kibbaakkoo moo'ukko. Oo awwaadaanchim «I moollanna, aayye! Neese maha issinummaare e'llookko?» yaa xa'mmukko.

¹⁶Eelsa'am «Niinninne maqire yo'i keen ixxuwwinne maqire yo'i keeniinsi lophphitam bikkina baddititte!» yukko.

¹⁷Ee lasage Elsa'a «Waa'a! Moo'eena xanoo'isina ixxi ille fooqaa'e» yaa uunxukko. Waa'im ee awwaadaanchika ille fooqoo'ukkaare gii'l faradii gii'l faraxxi gaarre'uwwii Eelsa'i kululleetanne duunanne wo'mmaakkoo moo'ukko.

¹⁸Sooriy uulli mannim duuniinsi dillita'a ixxi beyyo waattu'uuyyi Eelsa'a «Ixxuwwika ille qooqise!» yaa Waa'a uunxukko. Ee bikkina Waa'im ixxuwwi ille qooqisukko.

¹⁹Ee lasage Eelsa'a ixxuwwi kolli hincaa «Googo huushantakko'ookko; ki'nnuwwi hassakkam beero'i kaneyyo; ki'nnuwwi hassakkam manchi beyyo an awwonsoommo; eese awwonnehe» yaa Samaare'i beero'i afeebe'e massukko.

²⁰Ee beero'o aagga'a lasage Eelsa'a «Waa'a! Moo'llamisina ka mannika ille fooqaa'e» yaa uunxukko. Waa'im ixxuwwi ille fooqaa'ukko. Ee ammanenne ixxuwwi Samaare'i beero'i woronne yo'isa laqqo'o.

²¹Isra'ee'l adilim ka manna moo'aa «I moollanna, ka manna shihonnihe? Shihonnihe?» yaa Eelsa'a xa'mmukko.

²²Ixxim «Shititte! Kakeena'i uttaa ki bagadinnee ki xiyyinnee qeefaddi keenom shimmi hasisooyyo. Kaba ixxuwwina ittam luwwaa aggam luwwaa uwwe. Itta'atii agga'atii lasonne ixxuwwi moollanni beyyo mattona» yukko.

²³Ee bikkina Isra'ee'l adil ixxuwwina lobakat maadda gudisukko. Itta'ahii agga'ahii lasagem Sooriy uulli adi'l beyyo dabaraa asse'ukko. Ee ammaniinsi ki'isaa Sooriy uulli manni Isra'ee'l minaadaba qasimma utto'o.

²⁴Ee lasage Sooriy uulli adil Beenihaadaad ixxena yoo gaadaano hundam Isra'ee'l minaadabanne gaadisimminne Samaare'i beero'o kibbukko.

²⁵Ee mashka'inne Samaare'i beero'onne kee'mmaalli sibaarii qaanne'ii ihu bikkina mat hallichchi horoor sadeentayyi kin birina, lam xibbi giraama ihoo handare'i cirim onti kin birina biteesamam hee'ukko.

²⁶Mat balla Isra'ee'l adil ee beero'i ki'n ooxxi hanenne daba'llamukkuuyyi mat meentichcho is sagara iimaa'lla'a «Adila, hay iina hara'mme» yita'a laatto'o.

²⁷Adilim «Waa'i kiina hara'mmeena hasubeelas an kiina hinkido'i hara'mmato isseena xanoommo? Aras te'im woyi'n diqaas iina yookkoka labissaatennihe?

²⁸Ihona bagaan ki hawwi maruchcho?» yaa xa'mmukko. Isem «Ku meentichcho ‹Kaballa ki ciila intona, soodo odim i ciila intoommo› yita'a sawwite hincaa'llo'o.

²⁹Ee bikkina i ciila sallaa intummo. La'm dara odim ‹Ki ciila intona eebe› yaa xa'mmummo. Ihukkaarem ise maaxxo'o» yita'a dabatto'o.

³⁰Adilim eekka macceesu ammanenne ixxeka eddechcha kichchechchinne dereerukko. Ki'n ooxxi hanenne uullaa hee'u bikkina ee ammane ixxi gadanonne uullita'a hee'llo'i manni adil ixxi eddechchi worinne kichchechchi eddechcha edde'aakkoo moo'llo'o.

³¹Adilim sagara iimaa'aa «Eelliinchi kaballa aagoo'n illageen Safaax beet Eelsa'ik horoor muramoo'n garulas Waa'i eese lehinne guzumo'ona!» yaa wocukko.

³²Ee ammanchom Eelsa'a amadaa worona mat mancho asse'ukko. Ee ammane Eelsa'a ixxo moo'lleena waatto'oo hofqax lommanninne maqirem minenne hee'ukko. Adi'l asse'amaanchi afeena illageenim Eelsa'a ee lommannina «Oo foore shaanchi eese shisiiseena mat mancho asse'aakko; ixxi keyye afoohaare gooca xuffehe; woro aagona uwwitakkotte; adilim ixxo awwonaa waaroolla» yukko.

³³Eelsa'a ee lommanninne woconam asse'amaanchi afukko; adilim dangonne waaraa «Ka hawwo neesenne eebukkok Waa'a! Eehannah ka lasage an Waa'iinsi egeroommi luwwi maha?» yukko.