Read Hadiyya 2 Adilluwwi Kitaaba 7 Bible Online

2 Adilluwwi Kitaaba 7 - Hadiyya bible

2 Adilluwwi Kitaaba 7

¹Eelsa'am «Waa'i yookkoka macceese! Soodo kido'i ammanenne Samaare'i beero'onne sas kilo'i doo'l arasa te'im loh kilo'i so'o mat kin birina bitaa'akkamo» yaa dabarukko.

²Ee ammanenne adilina hincixxi gassaanchi ihu ixxi awwaadaanchi Waa'i manchi Eelsa'ana «Waa'i ixxi gagoomim iima'n gooccuwwa fooqaa'aa hurbaata xee'nnisa ga'nnisuta'nnim kuk hore'em iheena xanooyyo!» yaa malanchinne wocukko. Eelsa'am «Ee hurbaata ki illinne moo'llootto! Ihukkaarem eehannika ma'lluwwam duuqqooyyo» yukko.

³Ixxuwwi oddomachchonne baddisoo jabbi yoo soor manchi Samaare'i beero'i goociinsi biireen hee'llo'o. Ixxuwwina'i ixxuwwim «Leneembe'i afeebe'e ka beyyonne mahina afuulloomane?

⁴Beero'o aagimmi niina maham awwaadooyyo; eekke'e aangumlas sibaarinne lenoommo. Ka beyyonne afuullummaarem lehiinsi gantoommoyyo. Ee bikkina Sooriy gaadaan wiiddanta'a yo'i beyyo mallaa anga uwwinona; ixxuwwi neese shitobeelas lehiinsi gantoommo; shito'aarem lenoommo» yaqqanto'o.

⁵Ee lasage uulli hiimeena ihaakkoohaannonne Sooriy gaadaan wiiddanto'i beyyo matto'o. Ee beyyo affamaare ee wiiddananne ayyim hee'ukkoyyo.

⁶Mashka'oomim Waa'i Sooriy uulli gaadaanina faradinnee faraxxi gaarre'innee waaraakkoo lobakat gogoxxi sagara macceesisaa hee'u bikkina ixxuwwina'i ixxuwwim ‹Oono'o Isra'ee'l adil neese qaseena Hiite'ikkaa Gibxi adilluwwaa bitaa'aa waaraakko› yaqqanto'o.

⁷Ee bikkina ee balla uulli hiimukkisam Sooriy gogot ixxuwwika dukkaannuwwa, farado, hallaa wiiddanta'a hee'llo'i beyyoo hundam utta'a ixxuwwi foorina gibba'a hee'llo'o.

⁸Oo soorem manchim Sooriy gaadaa'n wiidda'n gadano affa'a mat dukkaa'n woro aaggo'o. Ee beyyonnem siiddo'i luwwi hundam itta'atii agga'atii bira, worqaa eddechchaa amadda'a matta'a maaxxo'o. Odim daba'llita'a mulli dukkaa'n worom aagga'a ee'isam issito'o.

⁹Ee lasage ixxuwwina'i ixxuwwim «Neese er baxo banxummoyyo. Oono'o, kaballi lophphaakkoo mishiraachchi balla. Ka danaam aganna maanxaa gatisimmi niina hasisooyyo. Ka er woshsha kulloo'n soodeebe'e afuullummaare neessenne hawwi afookko. Ee bikkina kaba mallaa adi'l gaaxxi awwonsaanina kullona!» yaqqanto'o.

¹⁰Ee lasage oo manni Sooriy uulli gaadaa'n wiidda'n beyyiinsi ki'lla'a Samaare'i uulla daba'llita'a matto'o. Ee beyyo affo'isam ee beero'i gooca egeraano weeshsha'a «Neese Sooriy gaadaa'n wiidda'n beyyo mallaa hee'nnummo. Ihukkaarem ee wiiddananne matem manchim te'im macceesamoo sagarim bee'e. Faradii hallii karamukkisam yookko. Dukkaannuwwim Sooriy gaadaan utta'a matto'i bikkina diihaakko» yita'a kutto'o.

¹¹Oo gooca egettam waardiyyuwwi ee woshsha la'amoo'isa issito'i bikkina woshshoom adi'l gassi min afeebe'e macceesamukko.

¹²Oo ammanim hiim hee'ukko. Ihukkaarem adil iinse'u beyyiinsi ki'aa ixxi gassaanina «Sooriy gaadaa'n sawwite an ki'nnuwwina kuroommo. Neese sibaallummisa laqqo'i bikkina ‹Hurbaata hasseena fittam ammane foorinnem ixxuwwa qeefandoommo; ixxuwwi beero'om matem hawwi bee'em aangoommo› yita'a hax uullanne maaxamteena ixxuwwi wiiddaniinsi fitto'ookko» yukko.

¹³Ee gassaaniinsi mat «Hofqax mannim ka beero'onne gatu faraxxeka onto amadda'a ka woshsha xassitona asse'nnona; ixxuwwi leto'aarem leto'ok keyyi gatu mulli Isra'eelim lehoo'isame. Ee bikkina oo manni matta'a ee duuha'a xassita'a waattona» yaa sawwite hincaa'ukko.

¹⁴Ee bikkina lam faraxxi gaarre'uwwa faradinnem doo'llito'o. Adilim «Mattakka'a ee beyyonne ihu luwwa moo'llehe» yaa Sooriy manni gogoxxi hanenne asse'ukko.

¹⁵Oo mannim ee beyyiinsi ki'lla'a Yoordaanoos daajji afeebe'e matto'o; goog hundannem Sooriy uulli manni gibbu'uuyyi uunjita'a matto'i eddechchaa mu'utaa hundam moo'llo'o. Ee lasage daba'llita'a waatta'a ee woshsha hundam adilina kutto'o.

¹⁶Ee lasage minaadab gaaggaabaa firaa Sooriy manni wiidda'n beyyo bogukko. Ee bikkina Waa'i illageen wocukkisam sas kilo'i muccur aras te'im loh kilo'i so'i mat kin birina biteesamukko.

¹⁷Ee ammanenne Isra'ee'l adil ee beero'i ooxxi gooca ixxena hincixxi gassaanchi egeroo'isa issaa hee'ukko. Ihukkaarem ee egeraancho minaadab hance'amu bikkina ee beyyonnem lehukko. Ookkim ihukkok adil Eelsa'a atoorasseena maru ammane Waa'i manchi Eelsa'a ee awwaadaanchina wocu hiraaqqi sagar wo'mmu bikkinatte.

¹⁸Ee bikkina Waa'i manchi Eelsa'a adilina «Soodo kido'i ammanenne Samaare'i beero'onne sas kilo'i muccur aras te'im loh kilo'i so'i mat kin birina biteesamookko» yukkok wo'mmukko.

¹⁹Oo gassaanchim «Waa'i ixxi gagoomim iima'n gooccuwwa fooqaa'aa hurbaata xee'nnisa ga'nnisuta'nnim kuk iheena hore'em xanooyyo» yu bikkina Waa'i manchi Eelsa'a «Ee hurbaata ki illinne moo'llootto. Ihukkaarem eehanniinsi ma'lluwwam ittooyyo» yaa hee'ukko.

²⁰Ee bikkina beero'i gooca egeram hee'u gassaanchi Samaare'i beero'i goocanne minaadab hance'amukkaare lehukkok ku hiraag ixxonne wo'mmu bikkinatte.