Read Hadiyya 2 Adilluwwi Kitaaba 8 Bible Online

2 Adilluwwi Kitaaba 8 - Hadiyya bible

2 Adilluwwi Kitaaba 8

¹ Eelsa'am is beeto lehiinsi ki'isu Suunaa'm uulli meentichchona «Waa'i lamar hiinchi afeebe'e afoo sibaaro ka uullanne ihona qoodaakko; letakkambee'isa ki abaroosinne maqirem ka uulliinsi ki'llaa mulli uulla mare» yukko.

²Ee bikkina Eelsa'i sogitano macceessa'a is abaroosinne maqirem Filisxee'm uulla matta'a lamar hiincho afuutto'o.

³Ee lamarem hiinchiinsi lasage Filisxee'm uulliinsi daba'llita'a waatto'o. Isem adi'l illagenne hincita'a is uullii minii daba'llaa uwwamona xa'mmito'o.

⁴Adilim Waa'i manchi Eelsa'i awwaadaanchi Giyaaza «Hino'o Eelsa'a baxu maalalsiisoo agannuwwa hundam iina kure» yaa xa'mmam hee'ukko.

⁵Eelsa'a is beeto lehiinsi ki'isu meentichchi bikkina Geyaaz adilina kuronam oo meentichcho waatta'a is mi'n bikkinaa is uulli bikkinaa adilina kutto'o. Giyaazim «Adila! Oo meentichcho tannette! Eelsa'a lehiinsi ki'isu beetim kane!» yukko.

⁶Adilim «Kuk hanqamennihe?» yaa ee meentichcho xa'mmukko. Isem kutto'o. Ee lasage adil mat gassaanchina «Isena hee'u luwwi hundam uullaa lamarem hiinchonnem is uulliinsi firu atootaa hundam dabassiise» yaa ijaajukko.

⁷Sooriy uulli adil Beenhaadaad xissaakkoohaannonne Eelsa'a Damaasqo'o marukko. Adilinam Waa'i manchi Eelsa'a waarukkisa kurakko'o.

⁸Ixxi gassaaniinsi mat hee'u Azaaheela weeshaa «Waa'i manchina irifo'o amaddaa mattaa ka jabbiinsi fayye'oommisina Waa'a xa'mmona uunxe» yukko.

⁹Ee bikkina Azaaheel Damasqo'onne hee'oo doo'l ee uulli uwwanchi hundiinsim sor gaameela'anne iyyiisaa Eelsa'i beyyo marukko. Azaaheelim Eelsa'i illagenne uullaa «Ki awwaadaanchi Sooriy adil Beenhadaad ‹An ka jabbiinsi fayye'eena xanoommonnihe?› yaa eese ki beyyo asse'aakko» yukko.

¹⁰Eelsa'am «Beenhaadaad lehoo'isa Waa'i iina caakkisaakko. Ihukkaarem at mattaa «Fayye'llootto» yaakko yitaa kure» yukko.

¹¹Ee ammanenne Azaaheel tuureebe'e ixxo xuxxaa moo'ukko. Ee lasage odim oo Waa'i manchi Eelsa'a indiidda fissaa wi'llukko.

¹²Azaaheelim «I moollanna, mahina wi'llitoolla?» yaa xa'mmukko. Eelsa'am «At Isra'ee'l minaadabanne afissoo hawwo la'aatette. Ixxuwwika girbuwwa giirinne shokkiissootto. Ixxuwwika woraadduwwa bisa'inne duttootto. Ciilluwwa kinanne xooqissaa shitootto. Lamfoor meentika godabo dereettootto» yaa dabarukko.

¹³Azaaheelim «An mahinam awwaadoombee'i kora'i manchi kaka hinkid isseena xanoommo?» yaa xa'mmukko. Eelsa'am dabaraa «At Sooriy uullanne adil ikkoo'isa iina Waa'i moo'isaakko» yukko.

¹⁴Ee lasage Azaaheel daba'llaa waarukkaare «Eelsa'a mayyukko?» yaa Beenhaadaad xa'mmukko. Azaaheelim «At hanqinam fayye'lloohan ihukkisa iina kuraakko» yaa dabarukko.

¹⁵Ihukkaarem la'm balla daram Azaa'eel bullukko'o wo'onne cefaa eehanninne adila urussaa shukko. Azaaheelim Benhadaad beyyonne adil ihukko.

¹⁶Isra'ee'l adil Aki'aab beet Yooraam adil ihu onti hiinchonne Yoosaafix beet Yihooraam Yihuxxi minaadabina adil ihukko.

¹⁷Ixxim adil ihukkok ixxek umur sadee lamoo ihaakkoohaannonnette hee'ukko. Ixxim hee'oo beyyo Yerusaaleemanne issaa sadeenti hiincho gassukko.

¹⁸Ixxi meentichchom Aki'aab landichchotte hee'llo'i bikkina Aki'aab abaroosisam Isra'ee'l adilluwwi issitam hee'llo'i jolli googo awwonukko. Jor baxo baximminnem Waa'a kichche'isukko.

¹⁹Ihukkaarem Waa'i ixxeensii ixxi shumo'iinsii heer heerinam adillano hooroobee'an ihukkisa ixxi awwaadaanchi Daawiitina neeyyato uwwaa hee'u bikkina Yihuda bi'iseena hasukkoyyo.

²⁰Yihooraam adillaninne gassam hee'u doollenne Eedoo'm minaadab Yihuxxi minaadabanne ki'llo'o. Ixxuwwi gaqqi adilam doo'llito'o.

²¹Ee bikkina Yihooraam ixxeka faraxxi gaarre'uwwa hundam wixxaa'aa Xaa'ira yakkam beyyo gaadukko. Eedoo'm uulli gogotim ixxoo ixxi faraxxi gaarre'uwwa ijaajaanoo gaadaaninne maqirem kibbito'o. Hiimonne ixxii faraxxi gaarre'uwwa ijaajaanii kibbanto'i beyyiinsi iiqqa'a xotto'aare gaadaan hundim gibba'a mine elle'llo'o.

²²Eedoo'm minaadab ee ammaniinsi ki'isaa Ayihuxxi minaadabiinsi bangujjaatinne fitto'o. Ee ammanenne Libi'n beero'i minaadabim bangujjito'o.

²³Yihooraam issu mulli luwwi hundim Yihuxxi adilluwwi aganni kitaabanne kitaabamaakko.

²⁴Yihooraam lehukko. Ixxim Daawiit beero'onne yoo adilluwwa waammakkam beyyonne waammamukko. Ixxi beyyonnem ixxi beet Akaaziyaas adil ihukko.

²⁵Isra'ee'l adil Aki'aab beet Yooraam adillano aa'u tommonnee la'm hiinchonnee Yihooraam beet Akaaziyaas Yihuxxi uullanne adil ihukko.

²⁶Ixxim adil ihu ammane ixxek umur lamiyyee lam hiinchoo hee'ukko. Ixxi hee'oo beyyom Yerusaaleemannette issaa mexxo'i mat hiincho gassukko. Ixxi amakim summi Ataaliyatte hee'ukko; isem Isra'ee'l adil Oomirina landichchotte hee'llo'o.

²⁷Akaaziyaas adil Aki'aab abaroosina ballichchi ihu bikkina ixxuwwi matto'i jor googom awwonaa Waa'a kichche'isukko.

²⁸Sooriy adil Azaaheelanne alallaatamu oranne adil Akaaziyaas Isra'ee'l adil Yooraamina hara'mmaa gaadukko. Lamem adilluwwi gogotim Sooriy uulli gaadaaninne maqirem Gala'aadanne yoo Raamootanne oramu ammane Yooraam ee oranne mada aa'ukko.

²⁹Yooraam ee ammane aphphixxu madiinsi fayye'eena Yizra'ee'l beero'o daba'llaa marukko. Yihuxxi adil Yihooraam beet Akaaziyaasim Yooraama moo'eena ee beyyo marukko.