Read Hadiyya 1 Agannuwwi Kitaaba 10 Bible Online

1 Agannuwwi Kitaaba 10 - Hadiyya bible

1 Agannuwwi Kitaaba 10

¹Ee lasage Filisxee'm uulli manni Isra'ee'l oosinne qaxxancha asheetto'o. Isra'ee'l oosim ixxuwwi illagiinsi gibbo'o; ixxuwwiinsim lobakata Giilbo'i duunanne oranne shakko'o.

²Ihukkaarem Filisxee'm Manni hollanta'a affa'a Saa'ool oosiinsi saso Yoonaataana, Aminaadaabaa Maalkiishu'aa shito'o.

³Orim Saa'oolanne qoxxukko; ixxim diina'i xiyyi qasukkaare jorisa madukko.

⁴Ixxim ee ammane o'l mu'uta amadoo woraadichchi beetina «Ku ballachchantoo'nno'i Filisxee'm manni eesenne naacantoo'n gaassitaa kiikka bisa'a fissitaa eese qassaa shihe» yukko. Ihukkaarem oo woraadichchi beet eekka isseena lobakata baddukko; ee bikkina Saa'ool ixxi gagim ixxi bisa'annem ubaa lehukko.

⁵Oo beetim Saa'ool lehukkisa moo'aa lasage ixxim ixxi bisa'annem ubaa lehukko.

⁶Ee bikkina Saa'ool ixxi sasem oosinnem lehukko; ixxi adillaninam lasaanchi ihukko.

⁷Yizra'ee'l cebbanne hee'llo'i Isra'ee'l oos o'l gogot gibukkisaa Saa'oolii ixxi oosim leto'isaa macceessa'a lasage ixxuwwi hee'llam beero'uwwa utta'a gibbo'o; Filisxee'm mannim waatta'a ee beero'uwwa amaddo'o.

⁸Eehanniinsim la'm balla daram Filisxee'm manni leto'i Isra'ee'l oos mu'uta maxatteena mattamaare Saa'oolekii ixxi oosikii leesh Giilbo'i duunanne ubaakkookkoka siiddo'o.

⁹Saa'oolika horoore mutta'ahii edde'aa hee'u o'l mu'utam sheelatta'ahii lasage asse'amaanonne amadiissa'a ixxuwwi waa'uwwinaa ixxuwwi minaadabinaa mishiraachcha kuttona asse'llo'o.

¹⁰Ee lasage ee o'l mu'uta ixxuwwi waa'uwwi minneewwanne dissito'o; ixxi horoorem «Daagoona» yamamoo qophpha'n waa'i minenne dissito'o.

¹¹Gali'aadanne hee'oo Yaabeeshanne hee'llam minaadab Filisxee'm uulli manni Saa'oolanne issito'i luwwa macceessa'a lasage

¹²lobakat malaayyaammuwwi ikko'i manni matta'a Saa'oolikaa ixxi oosikaa leesha Yaabeesh afeebe'e eebbo'o; eekke'em mat geejji qilxokkichchi lugumonne waammita'a lasage lamar ballina soommanto'o.

¹³Saa'ool Waa'ina amma'nnamaakkoohan ihimmi hoogimminne lehukko; ixxi Waa'ikam ijaajo egerimmaa ixxom xa'mmimmaa sabaa lehu manna weeshsham keeniinsi sogitano xa'mmukko.

¹⁴Ee bikkina ixxo Waa'i shukko; ixxi Adillanom Issayyi beet Daawiitina higisaa uwwukko.