Read Hadiyya 1 Agannuwwi Kitaaba 13 Bible Online

1 Agannuwwi Kitaaba 13 - Hadiyya bible

1 Agannuwwi Kitaaba 13

¹Adil Daawiit shaalaquwwaa xibbalaquwwaa ikko'i o'l awwonsaaninne a'llamukko.

²Ee lasage hundem Isra'ee'l minaadabinam «Ki'nnuww iittantakkoasii ni Moollanni Waa'i doo'l ihulasii gatto'i mulli ni uulli mann Qeessuwwii Leewi'i oosii hee'llam hoffi beero'uwwa hundam asse'ammaano asse'nnaa keyye waatta'a niinninne dummitona issinona.

³Saa'ool adil ihaa hee'u doolle xadamaa hee'u Waa'i Hidi'l Saga'l Saaxina manna eemboommo» yukko.

⁴Minaadabim ee sawwitenne liiramaa iitamukko.

⁵Daawiitim Hidi'l Saga'l Saaxina Qiiryaatyi'aariimiinsi Yerusaaleema worimmina woroo'n qarinnee Gibxi uulli gabala, hanaa'n qarinnee odim Haamaata higakkam beyyi afeebe'e Isra'ee'l uullanne hundannem hee'oo minaadaba wixxaa'ukko.

⁶Daawiit minaadab hundinnem Kiruubee'l ladanne afuuru Waa'i summinne weeshamu Moollanni Hidi'l Saga'l Saaxina woreena Yihuxxi uullanne hee'oo Ba'aalaa yakkam Qiiryaatyi'aariim beero'o marukko.

⁷Ee Hidi'l Saga'l Saaxinam Amiinaadaab miniinsi fissita'a haareechchi faraxxi gaarre'enne iyyiisso'o; Uuzii Ahiiyii ee faraxxi gaarre'e ushe'llam hee'llo'o.

⁸Daawiitii minaadabii hundim maasinqo'oo diitta'aa lellitu'uuyyii doola chilchichilchi'aa'llu'uuyyii xurumba fuggu'uuyyii ixxuwwina yoo qax malaayyinne hundinnem Waa'i lombina zammattam hee'llo'o.

⁹Kiidoo'n oodo'om affo'oohaannonne gaarre'e gosaasam hee'u mirgo'uwwi bobaru bikkina taritarukko; Uuzim anga asse'aa Hidi'l Saga'l Saaxina amadukko.

¹⁰Uuzim ee Saaxina nakku bikkina Waa'i quuqaa ee'ammanem shukko; ee bikkina Uuz ee beyyonnem Waa'i illagenne lehukko.

¹¹Oo beyyim kaballi afeebe'em «Pherexuuza» te'im «Uuz iiqancha» yamamaa weeshamookko; Waa'i quuqaa Uuza shu bikkina Daawiit lobakata kichche'ukko.

¹²Ee lasage Daawiit Waa'a lobakata baddu bikkina «Eehannah Waa'ika Hidi'l Saga'l Saaxina i mine hinkid masseena xanoommo» yukko.

¹³Daawiitim ee bikkina Hidi'l Saga'l Saaxina Yerusaaleema massimmi bikkinne Gaat beero'onne hee'oo Oobeedi'eedooma yakkam manchi minenne uraa urukko.

¹⁴Saaxinim eekke'enne sas agana hundam afuurukko Waa'im Oobeedi'eedooma ixxi abaroosaa ixxena yoo luwwaa hundam maasse'ukko.