Read Hadiyya 1 Agannuwwi Kitaaba 14 Bible Online

1 Agannuwwi Kitaaba 14 - Hadiyya bible

1 Agannuwwi Kitaaba 14

¹Xiiroos uulli adil Kiiraam Daawiitina adilla'n mine baxxam anaaxe'ee kininne baxxam baxaanoo digiphphi haqqaa Daawiit beyyo asse'ukko.

²Daawiitim Waa'i Isra'eelina adil issaa qoxxisukkisaa ixxi minaadab Isra'ee'l bikkina adillano iimiimaa'ukkisaa la'ukko.

³Daawiitim Yerusaaleemanne lobakat meento edaa eebukko; lobakat goonaa landam qarukko.

⁴Ixxim Yerusaaleemanne hee'u ammane qaru goo'n oos Shaamu'atte, Shoobaabatte, Naataanatte, Salamoonatte,

⁵Yibihaaratte, Eeliishu'atte, Eeliipheeleetatte,

⁶Noogaahatte, Neefeegatte, Yaafi'atte,

⁷Eel iishaama'atte, Be'eelyaadattee Eel ifeeleexattee hee'ukko.

⁸Daawiit Isra'ee'l uullanne hundannem adil ihukkisa Filisxee'm manni macceessa'a ixxo qeefadeena gogota gaadisso'o; ixxim eekka macceesaa ixxuwwinne orameena firukko.

⁹Filisxee'm mannim Raafaayi'm cebba waatta'a weeratto'o.

¹⁰Daawiitim «Filisxee'm manninne oramummaare at ixxuwwa i anganne higissaa uwwitoohonnihe?» yaa Waa'a xa'mmukko. Waa'im ixxena dabaraa «Eeyya, fittaa ixxuwwinne orame; an ixxuwwa ki anganne higisaa uwwoommo» yukko.

¹¹Daawiitim Ba'aalfaraaxiima yakkam beyyonne Filisxee'm manna qasaa kaa'aa lasage «Diina'i gogota dirisisa iiqaa higona Waa'i iina hara'mmukko» yukko; ee lasage oo beyyi «Ba'aalfaraaxiima» yamamaa weeshamukko.

¹²Filisxee'm manni gibbu'uuyyi ixxuwwi waa'uwwa uunjita'a gibbo'o; Daawiitim oo waa'uwwi hundim shokkoo'isina ijaajukko.

¹³Filisxee'm manni odim ee cebbanne ee ammanem daba'llita'a weeratto'o.

¹⁴Daawiitim Waa'ika doo'lla xa'mmukko; Waa'im «Ixxuwwiinsi afaree'n kollinne oda'i haqqi gammallinne aa'llaa qase bagaan ka kollinne biqe fittaa qasantitte;

¹⁵an ki illaginne maraa Filisxee'm gogota aphphisoommi bikkina oda'i haqqi hanenne shaahookki sagara macceesoo ammane qase» yukko.

¹⁶Daawiitim Waa'i ijaajukkoka hundam issimminne Filisxee'm manna Gaaba'ooniinsi ki'isaa Geezeer afeebe'e kaachcha issaa hollukko.

¹⁷Ixxekim sad beyyi hundam afukko; Waa'im Daawiita mulli minaadaphphi adilluwwi illagenne hundannem lophphaakkoohan ihoo'isa issukko.