Read Hadiyya 1 Agannuwwi Kitaaba 16 Bible Online

1 Agannuwwi Kitaaba 16 - Hadiyya bible

1 Agannuwwi Kitaaba 16

¹Hidi'l Saga'l Saaxina massita'a Daawiit gudisu dukkaa'n woronne dissito'o; ee lasage shokkiisakkamokaa mateeyyoo'm kitimaa Waa'ina hincaa'llo'o.

²Daawiitim ee kitima hincaa'aa lasage minaadaba Waa'i summinne maasse'ukko.

³Isra'ee'l minaadabina gooninaa meentinaa mat mat xeffo'i daabbo'o, maaraa mat mat xeffo'i zabiibaa uwwukko.

⁴Odim Leewi'i oosiinsi hofqaxam Hidi'l Saga'l Saaxi'n illagenne ikka'a Isra'ee'l Moollanni Waa'ina galataa lombaa hincaa'llona doo'llukko.

⁵Ixxuwwinam awwonsaanchi Asaafatte hee'ukko; Zakkaaryaasim ixxena hara'mmaanchi ihaa doo'llammukko. Yi'ii'eel, Shamiiraamoot, Yihii'eel, Maatiitiy, Eelii'aab, Baanaay, Oobeedi'edoomii Yi'i'eelii maasinqo'oo diitta'aa lelliteenaa Asaafim doola chilchiyyeeseenaa doo'llanto'o.

⁶Ee'isam Baanaayii Yaahazii'eelii lamem qeessuwwim Hidi'l Saga'l Saaxi'n illagenne hundi ammanem xurumba fuggeena doo'llanto'o.

⁷Daawiit Asaafinaa Asaafinne maqire Yo'i Leewi'i oosinaa Waa'ina hincoo galaxxi mazmuurina awwonsaan ikkamisa issu luxxi balli ee balli hee'ukko.

⁸Waa'a galaxxehe Ixxi summam weeshshehe Ixxi baxu bax hundam minaadabina kullehe.

⁹Waa'ina galaxxi mazmuura zammallehe. Ixxi baxu maalalsiisoo luwwi hundam kullehe.

¹⁰Ixxi keesammi summanne liirammehe Waa'a hasookki manni hundikim wodan liiramona.

¹¹Waa'aa Waa'ika malaayyee hassehe, hundi ammanem ixxo hassehe.

¹²Ki'nnuwwi ixxena awwaadaan Isra'ee'l shumo'o Ki'nnuwwi doo'llantakko'oo Yaaqoob ooso Waa'i baxu maalalisiiso luwwaa oogatu oogatoo baxu agannaa sawwi'llehe.

¹⁴Waa'i niina Moollanni Waa'a ixxi oogatim uulli hundannetteme.

¹⁵Ixxi aagu hidi'l sagara heer heerina ijaaju sagaram kum qaranchina sawwoohane.

¹⁶Ixxi Abrihaamanne aagu hidi'l sagara Yisaaqinam uwwu neeyyaxxi sagara

¹⁷Yaaqoobina seer issaa qoxxisukko Isra'eelinam heer heerina hee'oo hidi'l sagar issukko.

¹⁸Oohim, «Kani'aa'n uulla kiina uwwoommo; ixxim kiina sharad ihookko» yoohane.

¹⁹Waa'ik minaadab xigonne hofqax hee'llo'o. Kaani'aa'n uullannem waaraan hee'llo'o.

²⁰Ixxuwwi mat uulliinsi mulli uulla mat minaadaphphi uulliinsi mulli minaadaphphi uulla karkaaddo'o.

²¹Ihukkaarem Waa'i ixxuwwa ayyim woramadona cawwukkoyyo. Ixxuwwi bikkinam adilluwwa

²²«Doo'llanto'oo i awwaadaano nakkitakkotte. I hiraagaanom hawwoddakkotte» yaa axeerukko.

²³Ka uulli minaadab hundim Waa'ina zammallehe ixxi gatisaanchoo'mmekam er mishiraachcha balli hundam alallaattehe.

²⁴Minaadab hundinam ixxi lomba kullehe; manni hundinam maalalsiisoo ixxi baxo kullehe.

²⁵Waa'i lobane; lophphaakkoo galatim ixxena hasisoohane; ixxo qophpha'n waa'uwwiinsi hundiinsim loboka baddimmi hasisoohane.

²⁶Mulli minaadab otossitam waa'uwwi anginne baxamaakkoo misilluwwa; ihukkaarem Waa'i iimane qooccu Waa'a.

²⁷Lombii hibbii ixxi kululleetanne yookko. Ixxi minem malaayyii liiranchii wo'mmoo'isa issaakko.

²⁸Uullanne hee'llakkam minaadab hundim ixxi lombi bikkinaa ixxi malaayyi bikkinaa Waa'a galaxxehe.

²⁹Waa'ika lombaam summa galaxxehe. Kitimina ihoo luwwa amaddakka'a ixxi mine aaggehe. Keesammi Waa'i moo'amoo ammane ixxena otossi'llehe.

³⁰Uulli minaadab hundim ixxi illagenne huxe'llehe; uulli qoxxaallisa shooto'amu bikkina heekke'ooyyo.

³¹Uullii iimanii liirammehe; minaadab hundinam Waa'i adil ihukkisa kullehe.

³²Dambalaqii dambalaq woronne wo'mmaa yoo luwwii hundim ilil yihona; uullii uullanne mutu luwwii hundim liiramona.

³³Waa'i uullanne oogateena waaroo ammane doo'm woronne yoo haqquwwi ixxi illagenne liiranchinne zammarookko.

³⁴Biijaallaa ixxek iittim heer heerina hee'oohanee ihu bikkina Waa'a galaxxehe.

³⁵Ixxom «Neese gatisaanchi Waa'a! He'i niina at agaage; keese laqqambee'i minaadaphphi lambe'iinsi neese ni uullanne at wixxaa'e; ee ammane neese keese galaxxinoommo; ki keesammi summam lonsinoommo» yi'llehe.

³⁶Heerii heerina Isra'ee'l Moollanni Waa'i galaxxamaakkoohan ihona; Minaadab hundim «Eeyya ihona» yito'o; Waa'am galaxxito'o.

³⁷Adil Daawiitim Asaafaa Asaafinne maqire hee'llo'i Leewi'i oosoo Hidi'l Saga'l Saaxin yoo beyyonne Waa'ina otossakkam seerina hundi ammaninam awwonsitamisa issukko; ixxuwwim eekke'enne ballina ballina awwaaddam hee'llo'o.

³⁸Ixxuwwinam hara'mmitona Yiduutuun beet Oobeedi'eedoomaa ixxi moolliinsi odim lohayyee sadeenti manchoo eedaa doo'llukko. Yiduutuun beet Hosaa'ii Oobeedi'eedoomii ooxxi gooca egeraan ikko'o.

³⁹Qeessichchi Saadooqii ixxi beshshuwwi ikko'i mulli qeessuwwii Gaba'oonanne yoo Waa'ina otossakkam dukkaa'n illagenne ihoo awwaadina hundinam awwonsaan ikko'o.

⁴⁰Eekkam issukkok ixxuwwim Waa'i See'l kitaabanne kitaabamaa yoo Isra'ee'l oosina uwwamu ijaaccisinne shokkiisakkam kitima kitimakkam beyyonne daraa maaro'oo hincaa'llamisinatte.

⁴¹Eekke'em ixxuwwinne maqire Heemaanii Yiduutuunii Waa'ina heer heerina hee'oo iitto sawwimminne hundi ammanem ixxena galaxxi mazmuura hincaa'lleena annanni ikka'a doo'llanto'oo mulli mannii hee'llo'o.

⁴²Heemaanii Yiduutuunii xurumbuwwina, doolinaa galaxxi mazmuur zammaramoo ammane awwaaxxakkam mulli mu'uttuwwinaa hundinam egeraan hee'llo'o. Yiduutuun oos ooxxi gooca egetteena doo'llanto'o.

⁴³Ee lasage minaadab hundim ki'aa ixxi gaqqi mine marukko; Daawiitim ixxi abaroosa maasse'eena mine daba'llukko.