Read Hadiyya 1 Agannuwwi Kitaaba 17 Bible Online

1 Agannuwwi Kitaaba 17 - Hadiyya bible

1 Agannuwwi Kitaaba 17

¹Adil Daawiit ixxi adilla'n minenne afuuraa hee'ukkisam hiraagaanchi Naataana weeshisaa «Oono'o, An digibinne baxamaakkoo minenne yoommo; ihukkaarem Waa'i Hidi'l Saga'l Saaxin dukkaa'n woronne yookko» yukko.

²Naataanim «Waa'i kiinninne maqire yoo bikkina at ki wodanonne sawwit luwwi hundam isse» yaa dabarukko.

³Ihukkaarem Waa'i ee hiimom Naataanina

⁴«I awwaadaanchi Daawiit beyyo mattaa ‹An hee'oommi Keesammi Mine baxxoottok ateyyo.

⁵Isra'ee'l minaadab Gibxi uulli agiddaniinsi wolabbanonne fissummi ammaniinsi kid kabad afeebe'e minenne hee'aa la'oommoyyo; hundi ammanem dukkaa'n woronne ihaa mat beyyiinsi mulli beyyo daba'llamam hee'ummo.

⁶Isra'ee'l minaadabinne maqire taakke'ummi doollenne hundannem i minaadabanne awwonsaan ikkona doo'llummi awwonsaanniinsi matom ‹Digiphphi haqqinne Keesammi Mine iina mahina baxxakko'oyyo? yummi amman hee'aatennihe?» yukko.

⁷«Ee bikkina kaba at i awwaadaanchi Daawiitina gogoxxi Moollanni Waa'i ‹An keese gereebba allaaraanchi hee'l beyyiinsi ki'isaa Isra'ee'l I minaadabanne awwonsaanchi issummo.

⁸At mattitti beyyi hundannem an kiinninne maqire hee'ummo; ki diina'a hundam ki illagiinsi bi'isummo; kabadem an ki summa ka uullanne la'amaakkoo manni summiinsi hundiinsem lophphaa la'amaakkoohan issoommo.

⁹I minaadab ikko'i Isra'eelina hee'llam beyyo uwwoommo; kanniinsi eehid heekke'antambee'isa ixxuwwi gaqqi beyyonne hee'llamisa issaa kaasoommo; gaassi doollenne i minaadab ikko'i Isra'eelanne awwonsaano doo'llummi ammane wor amaddam keen od u'nnissamoyyo; ki diina'a hundam an sholliisoommo. Eehanniinsi hundiinsim an Waa'i kiina adilla'n mine baxeenatti ihukkisa caakkisaa kuroommo.

¹¹At gaassi kiyyanno'isam letoo ammane ki oosiinsi mato an adil issaa ki'isoommo; ixxi adillanom qoxxaalli issoommo.

¹²Keesammi Mine iina baxookkokim ixxotti ihookko; ixxi adillanim heer heerina qoxxaakkoohan ihoo'isa issoommo.

¹³Ixxena anni ihoommo; ixxim iina beet ihookko; heer heerina hee'oo i iitto kiinniinsi illageen hee'u Saa'ooliinsi massummisa ixxeensi hore'em massoommoyyo.

¹⁴I minaadabannee i adillanonnee heer heerinam hee'oo'isa issoommo; ixxi adillaninam tungi hee'ooyyo› yihe» yukko.

¹⁵Naataanim ka kaalti sagara hundam Daawiitina kurukko.

¹⁶Ee lasage adil Daawiit Waa'ina otossakkam duukkaa'n beyyo maraa Waa'i illagenne afuuraa «I Moollanni Waa'a! Kannina afissittok an ayyette? I abaroosdu ayyette?

¹⁷I Moollanni Waa'a! Kabadem odim at lophphaakkoo luwwa issittuuyyatte; waaroo doollenne ki'llam shumo'ina at lobakat neeyyaxxi sagara uwwitaatto; eesem geejji manchi issitaatto.

¹⁸Ki awwaadaanchi eese lonsitti bikkina kanniinsi loboka an keese mayyeena xanoommo; at i bikkina lonsitaa laqqootto.

¹⁹At iina kaka issitoo'isaa ka lasage eese lonsitoo'isaa la'isseena ki doo'llaa mare'ee issitaatto.

²⁰I Waa'a! Kiinninne kobi'llamookkok hore'em bee'e; neese macceensummisam kiinniinsi bagaan mulli Waa'i bee'e.

²¹Ki minaadaba ki gaqqan issiteena agiddaniinsi gatissitti Isra'eeli'nnoo mulli minaadab hore'em bee'e; at ixxuwwina issitti maalalsiisoo lob luwwiinsi ki'aa la'antaattoohaannoom uulli hundannem macceesamaakko; ki minaadaba Gibxi agiddaniinsi gatissitto; ixxuwwi illagiinsi mulli minaadaba hollitto.

²²Isra'ee'l minaadaba heer heerina ki gaqqi minaadab issitto; Waa'a! Atim ixxuwwina Waa'i ikkitto.

²³«Moollanni Waa'i, kabadem kiina ki awwaadaanchinaa i shumo'inaa aaggitti neeyyaxxi sagara wonshe; issoommo yitti luwwa hundam isse.

²⁴Oohim ki summi heer heerina qoxxaakkoohannee la'amaakkoohanee ihonatte; mulli minaadabim heer heerina ‹Gogoxxi Moollanni Waa'i Isra'ee'l Waa'a› yitonatte; iikka ki awwaadaanchikam mine heer heerina qoxxissootto.

²⁵Waa'a! At mine baxxoo'isa ki agishshina la'issitti bikkina ka uunxato ki kollonne hincaa'eena an iggimma siidaammo.

²⁶Waa'a! At hanqo'i Waa'a; ka malallisiisoo neeyyaxxi sagara iina uwwitaatto.

²⁷Ee bikkina ki illagenne hee'oo'isinaa iikka ki awwaadaanchika mine maasse'lloo'isinaa ki doo'l ihona; Waa'a! At i abaroosa maasse'llaatto; ixxuwwim heer heerina maasse'anto'oo keen ikkamo» yaa uunxukko.