Read Hadiyya 1 Agannuwwi Kitaaba 19 Bible Online

1 Agannuwwi Kitaaba 19 - Hadiyya bible

1 Agannuwwi Kitaaba 19

¹Hofqax ammaniinsi lasage Amoo'n adil Naa'oos lehukko; ixxi beet Hanuunim ixxi beyyonne adil ihukko.

²Adil Daawiitim «Ixxi anni Naa'oos iina issukisam anim ixxi beet Hanuunina amma'nnamaammoo beshichchi ihaa anga dabaroommo» yukko. Ee bikkina Daawiit Hanuunik anni lehukkaare kichche'ukkisa la'iseena asse'amaano asse'ukko. Daawiit asse'u manni Hanuun yoo Amoo'n uulla qoxxiseena afu ammanenne,

³Amoo'n uulli gassaan adilina «Daawiit kiyyanni lehukkaare kichche'ukkan ihaa ka manna asse'ukkok kiyyanna lonsaa labissaahinnihe? Ixxi ka manna asse'ukkok ka uulla weeraraa amadeena makkoo'isina shaashshitonatte» yito'o.

⁴Ee bikkina Hanuun Daawiit asse'u manna amadaa haareedda hogoossukko; sha'ixxi orachchi moo'ameebe'i afeebe'em lamadiinsi aad yoo ixxuwwi edde'llo'i eddechchika lamadiinsi aad yoo qaxa muransaa ixxuwwi uulla mattona hollukko.

⁵Ixxuwwim ixxuwwi mine daba'llita'a waatteena tuutto'o. Daawiitim ee woshsha hundam macceesaa lasage ixxuwwi yo'i beyyo asse'amaano asse'aa «Ki'nnuwwik haareeddi li'eebe'i afeebe'e Yaarko'onne afuullehe. Ee lasage waattakkamo» yukko.

⁶Amoo'n uulli manni ixxuwwi anginnem Daawiita diinakkichchi issito'isa laqqo'o; ee bikkina sadee soor kum kiilo'oo ihoo qax kin bira miqqa'a faraxxi gaarre'ee faradaanoo, hanaa'n Masphexoome'ennee Sooriyannee hee'llam Maa'ikiinsii Xoobaa'iinsii eebbo'o.

⁷Awwaaxiteena miqqa'a eebbo'i sadii lam kum faraxxi gaarre'ii adil Maa'ikki o'l gogotii waatta'a Meedaab gadanonne wiiddanto'o; Amoo'n mannim hee'llam beero'uwwiinsi fitta'a orina guddo'o.

⁸Daawiitim eekka macceesaa Yoo'aaba hundem gogotinne maqirem gaadina asse'ukko.

⁹Amoo'n mannim waatta'a ixxuwwika lob beero'i Raabaa'a aagakkam gooc gadanonne beyyo amadda'a guddo'o; ixxuwwina hara'mmiteena waatto'i adilluwwi odim biir ihaakkoo hax ullanne beyyo amadda'a guddo'o.

¹⁰Yoo'aabim illaginnee lasaginnee o'l gogot yoo'isa la'ukko; ee bikkina Isra'eeliinsi la'anto'oo geedduwwa doo'llaa Sooriy o'l gogoxxi illagenne uullisukko.

¹¹Gatto'i qax odim ixxi abbaayyi Abiis uwwoo ijaaccisinne Amoo'n manninne qasantamisina illaginne uullisukko.

¹²Yoo'aabim Abiisina «Sooriy uulli manni qoxatta'a eese kaa'lleena hincito'isa laqqilas at iina agaage; anim Amoo'n uulli manni keese kaa'lleena hincito'isa la'umlas kiina agaagoommo.

¹³Qoxxe! Ni minaadaphphi bikkinaa ni Waa'i beero'uwwi bikkinaa qoxxinaa orammona; Waa'im ixxi doo'llika hundam issona.

¹⁴Yoo'aabii ixxenne yo'i gogotii Sooriy manninne oranteena mikmikito'i ammanenne oo Sooriy manni ixxuwwi illagiinsi gibbo'o.

¹⁵Amoo'n mannim Sooriy manni gibbo'isa moo'lla'a ixxuwwim Abiis illagiinsi gibba'a beero'onne aaggo'o; ee lasage Yoo'aab Yerusaaleema daba'llukko.

¹⁶Sooriy uulli manni Isra'ee'l oosinne kaa'anto'isa laqqo'i ammanenne Efiraaxiis daajjiinsi eelliinchi firinne hee'llam Sooriy uulluwwiinsi o'l gogota eebisso'o. Ixxuwwam Xooba'i uulli adil Hadaadi'eezeerina o'l awwonsaanchi hee'u Shoobaak awwonsoo'isa issito'o.

¹⁷Daawiitim eekka macceesaa lasage Isra'ee'l o'l gogota hundam wixxaa'aa Yoordaanoosiinsi eeqidonne orameena beyyo amadukko; Sooriy uulli mannim ee'isam beyyo amadda'a Daawiitinne oranto'o.

¹⁸Sooriy uulli mannim Isra'ee'l oos illagiinsi gibbo'o; Daawiitim lamar kum faraxxi gaarre'e ushe'llam hee'llo'i keenoo sor kum lokkaanoo ee gogoxxi awwonsaanchi hee'u Shoobaakaa shukko.

¹⁹Hadaadi'eezeer gassi woronne hee'llam awwonsaanim Isra'ee'l oos illagenne kaa'anto'isa laqqa'a Daawiitinne iittanto'o. Ixxenam gibiraan ikko'o. Ee lasage Sooriy manni Amoo'n mannina hara'mmiteena hasso'oyyo.