Read Hadiyya 1 Agannuwwi Kitaaba 20 Bible Online

1 Agannuwwi Kitaaba 20 - Hadiyya bible

1 Agannuwwi Kitaaba 20

¹Adilluwwi lonsita'a orina mattam qaraax agananne Yoo'aab ixxi gogota awwonsaa maraa Amoo'n uulla bi'isukko; ihukkaarem adil Daawiit Yerusaaleemannem hee'ukko; Yoo'aabim Raabaa'i beero'o kibbaa amadaa bi'isukko.

²Milkoom yakkam Amoo'n uulli qophpha'n waa'ina 34 kiilo'i qaxa kee'mmoo worqinne baxamaakkoo adilla'n mare'e hee'ukko; eehanni woronnem inqu'u yakkam bito xee'aalli kin hee'ukko; Daawiitim ee adilla'n mare'e ixxi gaqqi horoorenne issukko; ee beero'iinsim lobakat luwwa qeefadaa massukko.

³Ee beero'i minaadabim magaazinne, doominnee heedinnee baxxamisa issukko; Amoo'n uullanne hee'oo mulli hoffi beero'uwwi minaadabim eehido'isinne baxxamisa issukko; ee lasage Daawiitii ixxi gogotii hundim Yerusaaleema daba'llito'o.

⁴Ee lasage odim Geezeeraa yakkam beyyonne hee'llam Filisxee'm mannanne or ihukko; Hushaa'i moolliinsetti ihoo Siibaakaay Raafaayim moollika Siiphaaya yakkam malaayyaam mancho shukko; Filisxee'm mannim kaa'anto'o.

⁵Mulli ammane odim Filisxee'm uulli manninne or ihukko; ee ammanenne Yaa'iir beet Eelihanaan Gaatik Laahim, Gooliyaad abbaayyo shukko; Laahimim amadaa hee'u bagaxxi qaalleenchi eddechcha dadoo manni dadu eddechcha xaaxoo xaa'l qaxa geejji hee'ukko.

⁶Mulli orim Gaatanne ihukko; ee orannem lamem angannee lamem lokkonnee loh-loh maxxaar yoo mat malaayyaam manchi hee'ukko; ixxim gaassi doollenne malaayyaam hee'llo'i Raafaayim shumo'iinsette hee'ukko.

⁷Ixxim Isra'ee'l oosinne sha'llamukko; ixxom Daawiitina abbaayyi hee'u Shaama'i beet Yoonaataan shukko.

⁸Daawiitii ixxi gogotii shito'i ku sasem manchim Gaatanne hee'llam malaayyaam Raafaayim shumo'iinsette hee'llo'o.