Read Hadiyya 1 Agannuwwi Kitaaba 21 Bible Online

1 Agannuwwi Kitaaba 21 - Hadiyya bible

1 Agannuwwi Kitaaba 21

¹Sheexaanchi Isra'ee'l oosinne uullixxameena ki'aa Daawiit Isra'ee'l ooso xigoo'isa issukko.

²Daawiit Yoo'aabinaa o'l gogoxxi awwonsaaninaa «Mattakka'a Daaniinsi ki'isaa Bersaabe'i afeebe'e yoo Isra'ee'l minaadaphpheka xigo xiggakka'a iina la'issehe; an minaadaphpheka xigo la'eena hasaammo» yaa ijaajukko.

³Yoo'aabim «Adila, Waa'i Isra'ee'l minaadaba kaba yoohaanniinsi hanaan xibbi kore lonsona; ixxuwwi hundim kiina awwaaddam awwaadaanoyyonnihe? At minaadaba xigimminne minaadaba hawwodaan issitoottok mahinatte?» yukko.

⁴Ihukkaarem Yoo'aab ee ijaajo wonshoo'isina adil ijaajukko; Yoo'aabim adi'l illagiinsi firaa minaadaba xigeena Isra'ee'l uullanne hundannem do'aa lasage Yerusaaleema daba'llukko.

⁵Ixxim oranteena xantam qax mannika xigo Daawiitina la'isukko; oo keenim Isra'eeliinsi mat kaakumaa mat xibbi kumaa, Yihudiinsi odim soor xibbee lamarayyi kumaa hee'ukko.

⁶Ihukkaarem Yoo'aab adil ijaaju ijaajonne iittamubee'i bikkina Leewi'i sulloo Biiniyaam sulloo edaa xigukkoyyo.

⁷Waa'im eehannonne quuqu bikkina Isra'ee'l minaadaba guzumo'ukko.

⁸Eehanniinsi lasage Daawiit «An kaka issimminne lobakata kee'mmaalli baaxiiloo qawwoo'm baxoo baxaammo; ee bikkina hay iina haafihe» yaa Waa'a uunxukko.

⁹Waa'im Daawiitina hiraagaanchi hee'u Gaada

¹⁰«Mattaa Daawiitina ‹oono'o, an kiina sas doo'lla uwwaammo; anim at doo'llittoka keesenne ihoo'isa issoommo› yoolla» yitaa kure yukko.

¹¹Gaadim Daawiit beyyo maraa Waa'i ixxina wocukkoka hundam Caakkisaa kurukko.

¹²Ixxim «Uullanne sas hiinchi sibaar ihimma te'im sas agana ki diina'i bisa'inne qasseena keese hollimma te'im Waa'i ki uullanne sas ballina bisa'inne aphphisimmiinsii boobana uullanne eebaa Isra'ee'l minaadaba lehinne aphphisoo Waa'i asse'ammaancho asse'immiinsii hinka doo'llitootto? Anim Waa'ina dabaroommi dabachchina at doo'llitoka kure» yaa xa'mmukko.

¹³Daawiitim «Oono'o, an doo'lleena xanoombee'isanne yoommo; ihukkaarem manni anganne ubimmiinsi Waa'i qishixxaalli ihu bikkina ixxi eese guzumo'ona» yaa dabarukko.

¹⁴Ee bikkina Waa'i Isra'ee'l minaadaphphi hanenne booban ihoo'isa issukko; minaadabiinsim lamarayyi kuma ikkam qax beeddito'o.

¹⁵Ee'isam Waa'i Yerusaaleema bi'isoo ixxi asse'amaancho asse'ukko; oo asse'amaanchim bi'iseena hincaakkoohaannonne iheena yoo bichchi bikkina Waa'i moo'aa qishixxukko; Waa'im ee ixxi asse'amaanchina «Kaba ihookko, ki anga dabare» yukko; ee ammane oo asse'amaanchi Iyyaabuus uulli Oorin oodo'i gadanonne uullaa hee'ukko.

¹⁶Daawiitim Waa'i asse'amaanchi Yerusaaleemanne qara dabaraakkoo bisa'a ixxi anganne amadaa iimanenne uullaakkoo moo'ukko; ee ammane Daawiitii xiddi eddechcha edde'lla'a hee'llo'i minaadaphphi awwonsaanii hundim illillaachcha uullanne ubbo'o.

¹⁷Daawiitim «Waa'a! Minaadab xigamoo'isina ijaajummok anette; baaxiilo baxummokii lobakatam hawwodummokii anette; ku xummaan minaadab ma'issaate? I Moollanni Waa'a! Eesee i abaroosaa at guzumo'e bagaan ku booban ki minaadabanne ihoone» yaa uunxukko.

¹⁸Ee lasage Waa'i asse'amaanchi Gaadina «Daawiit Iyyaabuus uulli manchi hee'u Oorin oodo'o maraa Waa'ina kitima hincaa'akkam beyyo baxona kure» yukko.

¹⁹Daawiitim Gaad Waa'i summinne kuru saga'llisannem baxeena marukko.

²⁰Ee oodo'onnem Oorin ixxi soor oosinne maqirem arasa ganam hee'ukko; ixxim laso daba'llaa Waa'i asse'amaancho moo'ukko; ixxi soorem goo'n oosim ee asse'amaancho moo'lla'a gibba'a maaxamto'o.

²¹Daawiitim ixxuwwi kolli waaroo'isa Oorin moo'aa oodo'iinsi firaa maraa Daawiitina aad heeshukko.

²²Daawiitim «Minaadabanne ubu booban ki'ona Waa'ina kitima hincaa'akkam beyyo baxeenatti ihu bikkina ka ki oodo'o biteese; anim kiina oodo'i bikkenne wo'm bito miqoommo» yukko.

²³Orinim Daawiitina «Adila, massitaa at hassitti luwwi hundam isse; kiti'm beyyonne shokkoo kitimina ka mirgo'uwwa, kiti'm beyyonne aphphoo giirina ihona ka hurbaata ganakkam haqqaa hurbaaxxi kitimina ihoo ka arasaa hundam masse; oona'a an hundam kiina uwwaammo» yukko.

²⁴Ihukkaarem adil Daawiit Oorinina «Ee'isa ihoone, hundikam bito an kiina miqoommo; ki gaqqi amaxxi ihukkokaa bito maham miqummibee'i luwwaa Waa'ina kitim issaa hincaa'eena hasoommoyyo» yaa dabarukko.

²⁵Ee bikkina Daawiit Oorinina ixxi oodo'i beyyi bikke loh xibbi saqila worqa bira uwwukko.

²⁶Daawiitim ee beyyonne Waa'ina kitima hincaa'akkam beyyo baxaa shokkiisakkam kitimaa mateeyyoo'm kitimaa hincaa'ukko; Waa'am uunxukko; Waa'im kitima hincaa'akkam beyyonne yoo kitima itoo giira iimaniinsi asse'aa ixxi uunxatina dabachcha uwwukko.

²⁷Waa'im ixxi asse'amaanchina «Ki bisa'a seejjanne aagise» yukko. Ixxim ijaajamukkisanne issukko.

²⁸Eehido'isinne Waa'i ixxekka uunxato macceesukkisa Daawiit la'ukko. Ee lasagem Iyyaabuus uulli manchi hee'u Oorin oodo'i beyyonne yoo kiti'm beyyonne odim kitima hincaa'ukko.

²⁹Muse'e udma'i uullanne baxu Waa'ina otossakkam dukkaanii kitim hincaa'am hee'u kiti'm beyyii ee amman afeebe'e Gaba'oonanne Waa'ina otossakkam beyyuwwanne hee'ukko.

³⁰Ihukkaarem Waa'i asse'amaanchika bisa'a baddu bikkina ee beyyo maraa Waa'a xa'mmeena xanukkoyyo.