Read Hadiyya 1 Agannuwwi Kitaaba 26 Bible Online

1 Agannuwwi Kitaaba 26 - Hadiyya bible

1 Agannuwwi Kitaaba 26

¹Keesammi Mi'n waardiyyuwwi ikko'i Leewi'i oosik bax sharad kanniinsi woroon yoohane. Qore'i Moolliinsi Asaaf abaroosiinsi Qore'i beet Mashelemyatti hee'ukko.

²Ixxenam lamar goo'n oos hee'ukko; oo oosim ixxuwwi umu'llisinne Zakaaryaasa, Yidii'i'eela, Zabaadya, Yaatinii'eela,

³Eelaama, Yahohanaanaa Eelyaaho'eenaayaa yakkam keen hee'llo'o.

⁴Sadeenti goo'n ooso uwwimminne Waa'i maasse'aa hee'u Oobeedi'eedoom yakkam mulli manchim hee'ukko; ixxi oosim ixxuwwi umu'llisinne Shamaa'iya, Yihoozaabaada, Yoo'aha, Saakaara, Naatinaa'eela,

⁵Aamii'eela, Yisaakooraa Pha'ultaayaa yakkam keen hee'llo'o.

⁶Oobeedi'eedoom won beet hee'u Shamaa'iyina loh goo'n oos hee'llo'o. Ixxuwwim Ootin, Raafaa'eela, Oobeeda, Eelzaabaada, Eelihu Saamaakiyaa yakkam keen hee'llo'o. Ixxuwwim lobakata lachchaammuwwi hee'llo'i bikkina ixxuwwi moollina awwonsaan hee'llo'o; annannam Eeliihu'ii Saamaakiyii lobakata lachchaammuwwi hee'llo'o.

⁸Kukeen hundim Oobeedi'eedoomina shumo'o; ixxuwwii ixxuwwi oosii ee'isam ixxuwwi qarmannii baxo baxxeena xantam qoxxaalluwwi hee'llo'o. Oobeedi'eedoom shumo'i hundikim xig mat ihaa 62 hee'ukko.

⁹Masheleemiyina lachchi yoo kee'nnek 18 goo'n oosii abaroosii hee'ukko.

¹⁰Meeraar moolliinsi soor goo'n oos hee'u Hoosaa yakkam mat manchi hee'ukko; ixxi oosiinsim maham won ihubeeta'nnimii ixxi anni awwonsaanchi issaa hee'u Shiimiratte,

¹¹la'mmek Hilqiyatte, saxxek Xabaalyattee soo'llek Zakaaryaasattee hee'llo'o. Hoos abaroosiinsi Keesammi Mine egattam egeraa'nnek xig 13 hee'ukko.

¹²Keesammi Mi'n waardiyyuwwi ixxuwwi abaroosisinne baxxamanta'a ixxuwwi abbaayyuwwi ikko'i mulli Leewi'i oosisam Keesammi Minenne bax uwwamaa hee'ukko.

¹³Woraadam ihukko lommanna annannissitoo'n ixxuwwi abaroosisinne hundem goocam egerimmina saamo issaqqantam hee'llo'o.

¹⁴Sheeleemyina eelliinchi firinne yoo ooxxi gooca egerona saam afukko; hundi ammanem er sogitano sogam hee'u ixxi beet Zakkaaryaasina odim hanaa'n qarinne yoo ooxxi gooca egerona saam afukko.

¹⁵Oobeedi'eedoominam woroo'n qarinne yoo ooxxi gooca egerona saam afukko; ixxi oosim mu'uta dissakkam minneewwa egettona saam afukko.

¹⁶Eelliinchi aagginne yoo ooxxi goocinaa hanaa'n gooqqi kollinne yoo Shaaleketa yakkam ooxxi goocina, Shuphphiiminaa Hoosinaa saam afukko; oo egechchim annanni annanni baxxanchanne baxxansamaakkoohan ihaa tara ege'llaakkoohan hee'ukko.

¹⁷Hundem ballam eelliinchi firinnee loh egeraan, hanaa'n qarinnee soor egeraan, ee'isam woroo'n qarinne odim soor egeraan egettam hee'llo'o; odim hundem ballam soor egeraan mu'uta dissakkam mine egettam hee'llo'o; ixxuwwiinsim lamii mat mu'uxxi mine, lamii odim mulli mu'uxxi mine egettam hee'llo'o.

¹⁸Eelliinchi aaggi googonne hincaa baxamu wixxixxi beyyi gadanonne soor egeraan egettam hee'llo'o; ee wixxixxi beyyo odim lam egeraan egettam hee'llo'o.

¹⁹Qoraahaanninaa Meeraar moollinaa uwwamaa hee'u waardiyyoo'm awwaad ee'is hee'ukko.

²⁰Leewi'i oosiinsi Akiiy Keesammi Mi'n mu'uxxi mininaa Waa'ina annanni ihaa hincoo mu'uttuwwa dissakkam minneewwinaa gassaanchi hee'ukko.

²¹Laadaan Gershoon moolliinsetti ihukkuuyyi ixxim Yihii'eelina anni hee'ukko; ixxi shumo'iinsi lobakat keen ixxuwwi moollisinne abaroosa awwonsaan hee'llo'o.

²²Zeetaamaa Yoo'eelaa yakkam Yihii'eel mulli lam oos Keesammi Mi'n dooninaa mu'uxxi mininaa gassaan hee'llo'o.

²³Aamraamaannina, Yixihaaraannina, Keebiroonaanninaa Uzii'eel shumo'inaa baxik sharad uwwamaa hee'ukko.

²⁴Muse'i beet hee'u Gershoom moolliinsetti ihoo Shaabu'eel Keesammi Mi'n mu'uxxi mi'n gassaanina awwonsaanchi hee'ukko.

²⁵Shaabu'eel, Gershoom abbaayyi Eeli'eezar kollinne Shaloomiitina qarmanchi hee'ukko; Eeli'eezar Rahabiya qarukko; Rahabiy Yishaa'iya qarukko; Yishaa'iy Yooraama qarukko; Yooraam Ziikira qarukko; Ziikir Shaloomiita qarukko.

²⁶Shalomiitii ixxi abaroosii Adil Daawiit, moollo awwonsaan, giichcho awwonsaanii gaadaa'n awwonsaanii Waa'ina keessa'a hincaa'llo'i mu'utina gassaan hee'llo'o.

²⁷Ku awwonsaan oranne qeefadamu luwwiinsi hoffokam massita'a Keesammi Mi'n baxina annanni issitam hee'llo'o.

²⁸Shaloomiitii ixxi abaroosii hiraagaanchi Saamu'eel, adil Saa'ool, Neer beet Abaaneerii Xaruy beet Yoo'aabii Keesammi Mi'n baxina annanni issita'a uwwito'i luwwi hundinam gassaan hee'llo'o.

²⁹Yixihaar shumo'iinsi Kanaaniyii ixxi oosii Keesammi Miniinsi haxonne ihoo luwwanne gassaanoo daannuwwaa ikka'a Isra'eelanne doo'llanta'a hee'llo'o.

³⁰Keebiroon shumo'iinsi Hashaabiyii ixxi qarmannii 1,700 ikkam qooxxaalli manni Waa'ikaa adi'llekaa baxo hundam baxxeena Yoordaanoosiinsi eelliinchi aagganne hee'oo Isra'eelanne doo'llanta'a hee'llo'o.

³¹Keebiroon shumo'i doonanne kitaabanta'a yo'isanne Yiriiy ixxuwwina awwonsaanchi hee'ukko. Daawiit adil ihu soo'l hiinchonne Gala'aaxxi uullanne Keebiroon shumo'iinsi qoxxaalli manni hee'llo'is aganni doonanne hasamaa siidamukko.

³²Adil Daawiit ee qarmanniinsi doo'llanto'oo lam kumaa lamar xibbi manchoo abaroosina awwonsaan issaa doo'llukko; ixxuwwam Yoordaanoos daajjiinsi eelliinchi firinne hee'oo Roobeelaannonne, Gaadaannonnee Minaas kolli sulli gassi uullannee Waa'anee adi'llanee ihu quuxxuwwanne gassaan issukko.